GYPSY - 10

CHAPTER--10

By:- Rs Thangluah✍🏼

"Khapa kha tunge?,"Amuana chuan a rawn ti vat a.

"U Hriatpuia,"tih chiahin ka chhang a. Amuana chu a lungawi loh hmel kher mai,"Ka tel lovin khawiahmah kal tawh suh ang che,"a ti leh hmuk a. Engtinmah ka chhang lo, ngawi rengin ka banah chuan min rawn vuan a. In neitu te chenna In lam pan chuan kan chho nghal a.

Kan bungraw neih beitham tak chu Taxi chhungah chuan kan dah leng vek a. Amuana chuan Driver hnenah chuan Bazar lama kal turin a hrilh a, Bazar lam pan chuan kan in phur chho ta a. Hmeichhe 3 te chuan kan lu chu kan tuam vek a, Taxi driver chuan a hmaa darthlalang aṭang chuan min rawn melh leh zauh ṭhin a. Thui fê kan tlan hnu chuan,"Thil zawh che u ka duh a, pawi in tih loh chuan,"a rawn ti ta nge nge a. Mahriati chuan,"Aw eng nge ni ta?,"a lo ti ve nghal vat a.

"Tunhnai a Social Media lama hmeichhe awmṭha duh lo 3, an sam an meh kawlh sak ho kha in ni em?,"tiin in thlahrung tih hriat tak chuan a rawn sawi a. Mahriati chuan,"Ani hi chu mi thianghlim a nih hi, hmeichhe awmṭha duh lo tia a hming in sawi ve hi rem kan ti lo a nia,"tiin min rawn melh a. Taxi Driver chu a nui suk a,"Ni e, kha video kha a rawn darh nual a. A zia lo khawp mai,"a ti leh a, engmah a sawi zawm tawh lo.

Kan kalna duhna hmun chu kan thleng chho a, Taxi Driver chuan,"Chuan man a ngai lo a nia,"tiin chuan man pek kan tum pawh chu a la duh lova. Lawmthu kan in hrilh luam hnu chuan min kalsan ta a, kan kalna hmun chu ka vawikhat hriatna a ni hauh lo. Amuana nen kan tal hrep tawhna hmun kha a ni.

Kan bungraw neih ang ang chu mipa 2 te chuan an rawn la a, chumi hnuah mipa 1 a rawn kal leh a,"Kha hei chahbi aw, zan dar 9:00pm-ah ka rawn hmu ang che,"a ti a,  chahbi chu Amuana a pe a. Amuana thil tih tum chu ka hrethiam nghal uarh uarh mai; mahse, engmah ka sawi lo. Ngawi rengin hmeichhe 3 te chuan Amuana chu kan zui hnak hnak hlawm a.

Room 1 lian vak lo chu kan thleng phei a,"Hetah hian zan khat bak kan riak thei dawn lova.  Chumi chhung chuan keiman sum ka thawk chhuak ang,"tiin min rawn melh a. Mahriati chuan,"In in hlan leh dawn em ni?,"a lo ti vat a. Amuana chuan a lu a lo bu nghut a,"A hlauhawm zia i hria tiraw?,"Mahriati chuan a ti leh a. Amuana chuan engtinmah a chhang lo, Mahriati bawk chu a rawn ṭawng leh a,"He thil hi chu ti lo la ka duhpui khawp mai che,"a ti leh a. Amuana chuan,"Tun bak ka ti tawh lo ang,"a lo ti vat a.

Zan dar 9:00pm ah chuan mipa 1 hi a rawn kal a, Amuana nen chuan an in bek bawr sur sur a, a chhuak leh nghal a. Amuana chuan,"Zan dar 11:00pm hmain ka rawn haw lo a nihchuan, min lo ngaihven zui su aw,"a ti a, a chhuak nghal vut a. Mahriati chuan,"Hepa luhlul lutuk hi chu tih ngaihna ka hre lo. A thil tih tur hi a hlauhawm zia lah a hre chiang tu ber a ni bawk si,"a ti zui mawlh mawlh a.

"Eng pawh nise, lo nghak phawt mai ang u,"ka ti a, rilru mumal put a har khawp mai. Lily chu a rawn riat nawk nawk a, a khawng ti tih der mai. Mahriati nen chuan kan buaipui nghal vat a,"Ka bag kha rawn seh tir vat rawh,"a ti a, Lily chu a sawi nawk nawk a. Lily kâ ah chuan Mahriati bag chu ka hnawh lut nghal nawk nawk a, a mit meng chuan mi rap lek lek mai. A chil phuan a rawn chhuak bawrh bawrh a, ka van hlauthawng hman tak êm! Dawhkana tui chu ka la a, a lu velah chuan ka thin huh nghal mawlh mawlh bawk a. Amuana suffer kha vawi 2/3 vel chu ka buaipui ve nual tawh tho a; mahse, ngaiah neih a har ngei mai. Rei ngial kan buaipui hnu chuan a rawn harh ve leh thei hram a.

"Engtinnge ka awm?,"a rawn ti nghal vat a, a mit meng chu a la vai ruai mai.

"I tlu a, i intauh na deuh a niang,"tiin Mahriati chuan a lo chhang vat a. Lily chuan engmah a sawi tawh lo, ngawi rengin a ṭhu a, a buai leh ang tih ka hlau kher mai.

Zan dar 11:00pm rik hma hret chuan Amuana pawh a rawn haw ve thei hram a,"Min lo la nghak char char a ni maw?,"a rawn ti lut nghal a. Mahriati chuan,"Nghak ang chu, he thil hi chu ti tawh lo la ka duh ngawt mai,"a lo ti nghal vat a. Amuana chu a nui suk a,"Ka share tur a thlawnin ka neih theih phah a, a ṭha phian zawk a sin,"a la ti ham ham zui a. Mahriati chuan,"Dry hi i tum ve miah lo em ni?,"a ti leh a.

"Ka tum a, awmzia awm lo. Hrehawm ka tuar peih tawh lo."

"Hrehawm kan tawrh peih a ngai reng a lawm. Kei chu dry char char ka tum tawh dawn,"Mahriati chuan a lo ti leh a. Lily chuan kil khat aṭangin,"Amuan, i share chu tlem te min lo pe ve teh aw. A hrehawm em mai,"in thlahrung tih hriat tak chuan a rawn ti zawi ve sap bawk a.

Amuana chuan a ipte aṭang chuan pawisa hi a rawn phawrh a, min rawn pe a,"Hei zawng hi ka hlawh chu a ni mai,"a rawn ti zawi sap a.

"Lily chu i pe ve dawn em?,"Mahriati chuan a lo ti vat a. Amuana chuan,"Imm hrehawm a tih viau chuan ka lo pe dawn nia. Mahse, kan ti hmasa phawt ang aw,"tih pahin Bath room lam chu a pan nghal a. Lily chu ka khawngaih ve reng mai, a mit meng te chu a la dik zân loh bakah a inthlahrun hmel khawp mai. Rei vak lo hnuah Amuan pawh chu a rawn chhuak leh a,"Syringe hi 1 chiah ka nei a, pawi i ti em? Ka thisen chu a thianghlim tho a nia,"a rawn ti a. Lily chuan âw khur deuh dar dar in,"A pawi lo, a pawi lo,"a lo ti nghal vat a. Amuana Syringe ken lai chu a la a, Bath room lamah chuan a lut nghal a. Amuana chuan,"Lawk, hei ber hi i la hleinem,"tih pahin a kekawr ipte aṭang chuan a chhin sen te chu a rawn phawrh a, Lily chu a umzui leh a.

"Kei chu helai hmun hi ka ngaina lo riau mai,"Mahriati chuan a rawn ti hlawl a. Amuana chu a lo nui leh suk a,"Nang lah hi i inla fel ṭan riau mai,"a lo ti vat a. Mahriati chuan,"Chutiang a ni lo, an mahni hrim hrim hi ka ngainat chi an ni lo,"a lo ti ve leh a. An inhnial bap bap a, kei erawh chuan engmah ka sawi lem lo. Lily erawh duh aiin Bath room lamah a awm rei ta, ka ngaih a ṭha tawh hauh lo mai. Amuana leh Mahriati lah an la inhnial bap bap bawk a,"Lily hi a van rei tawh ve,"ka tih chuan, Amuana chuan,"A rawn chhuak ṭep ang,"a lo ti ringawt a. Mahse, thlamuangin ka awm thei lo,"Kei chu ka ngaih a ṭha miah lo,"ka ti leh a. Mahriati pawh chuan,"Ni e, i sawi takah chuan ka rin aiin a rei daih. A dry na a rei ve tawh ang reng si a, ani hi a dose aia sang hi a lo ti palh hlauh ang e. Ka va ngaihven chhin teh ang,"tiin Bath room lamah chuan a phei nghal a. Bath room kawngkhar chu a kik a,"Lily, i ṭha em? Lily, Lily,"tiin a ko mawlh mawlh a. Mahse, chhanna a awm lo, bath room lamah chuan Amuana nen chuan kan phei ve nghal vat a. Bath room kawngkhar chu kan chum ri dawt dawt a,"Lily, ka ṭawng i hre thei em? I ṭha em?,"kan ti  mawlh mawlh a. Mahse, Lily hnen aṭang chuan chhanna kan dawng thei lo, Amuana chuan,"Tikhan lo ko char char u la, midang ka va ko ang e,"tih pahin a tlan chhuak nghal a.

Midang an rawn thlen hnu chuan Bath room kawngkhar chu tih chhiat a ni a. Lily chu Bath room chhuatah chuan a lo mu a, a chil phuan a rawn chhuak buah buah bawk a. A mar ka dek vat a, a mar a awm tawh lo,"Amuan, a mar a awm tawh lo,"ka sawi zawng chuan ka mittui chu a rawn parawl nghal ṭuam ṭuam a. Lily chu room chhungah kan zawn lut a, Khumah kan mut ṭhat tir a, a hmel chu ka en a ka van lainat tak êm!,"Aw Lalpa, kan ṭhiannu hi lo kuangkuah ang che aw,"tiin ka rilru in ka ṭawngṭai mawlh mawlh a. Mahriati chuan,"Lily, ngatinge heti hian i awm tak mai le? A van hrilhhai thlak ve maw le,"tiin a in sut ve feih feih bawk a. Amuana pawh chuan in thiam loh hmel zetin,"Lily, a van pawi tak êm! Lo tuar chhuah tir law law che ila ṭha mai tur a ni a, ka thiam loh vek a ni,"a ti ve mawlh mawlh bawk a.

Lily ruang chu kan khuh ṭha a, engtia tih chi nge tih chu hriatthiam har tak a ni. Mahse, tuna kan awmnaa an hotu ve deuh hmeichhia chuan,"Naktuk zing khawvar hma in kan in phur chhuak ang a. Kan huanah kan phum dawn nia, kan huanah chuan amah chauh lo pawh midang chhungte nei lova boral hi kan phum nual tawh a nia,"a rawn ti hlauh mai a, ka van lawm tak êm! Tichuan, Lily ruang chu kan lumen ta a. Zing khawvar hma in Maruati van in kan in phur chhuak ta a, huan lam pan chuan kan chhuak ta a. Amuana tih loh mipa 3 in min zui bawk a, huan chu kan thleng thla a. A sawi ang chiahin midang chu an lo phum ve nual tawh a. Lily thlan tur chu mipa ho chuan an in laih chhawk ta a, Lily chu ka lainat kher mai. Kuang kan nei lova, puan in kan tuam tawp a. Chutiang chuan kan phum dawn chu a ni si a, hmuh a van hrehawm tak êm! A thlan tur chu 6ft vela thukin an lai a, Lily ruang chu kan thlak ta. Kan vur hma in ṭawngṭaina hman ka duh thu ka sawi a, tuman min hnial lem lo. Lily thlah nan chuan mittui parawl ṭeuh chungin ka ṭawngṭai ta a,"Aw Lalpa, kan Pathian min hmangaih tu. Kan thil tawn mek chu nangin i hria e, kan ṭhiannu Lily chu min laksak ta si a. Khawngaihin i thlazar hnuaiah lo humhim ang che aw. He khawvela a chen laiin i duh loh zawng te lo ti ṭhin mah se, khawngaihin i ngaihdamna kan rawn dil sak mawlh mawlh e. Ani chuan, hringnun kal siam a rel sual ta si. I âng chhungah khawngaiha lo hum turin kan rawn dil bawk e. Tin, keini a ṭhian te pawh hi mi chak lo tak tak te kan ni a, i lam kan hnaih zel theih nan min pui turin kan rawn dil bawk e. Kan tihsual leh kan sawi sual awmah chuan min ngaidam la, chung zawng zawng chu i hnena lawmthu sawi chungin kan rawn dil a che, Amen!,"ka ṭawngṭai zawh chuan Lily ruang chu lei chuan kan vur ṭan ta. En reng chu harsa ka ti a ni, Mahriati nen chuan kan inkuah a, inhnem tur chuang pawh kan awm lo. Kan theih tawpin kan ṭap hawm hawm a ni ber mai, mipa ho chuan thlan an vur zawh chuan thlan chungah chuan kross an vit phun a. Lily hming leh a thih ni leh thla te chu kan ziak ve thlap a, harsa ti tak chung leh phur lo zetin Lily zalhna thlan khur thim chu ka kalsan ta a.

A van hrehawm tak êm! Tumah mah chu ṭawng zai kan rel thei lo, kan ngawi ṭhap a kan ngui bâr hlawm mai a. Lily boralna chuan min ṭhawngin min tina ve hlawm takzet a ni. Kan 3 ngawi reng a, kan awm lai chuan hotu nu(hotu nu tiin sawi tawh mai ang) leh mipa 1 hi an lo kal a,"In ṭhiannu in a kalsan si che u a. In tan pawh a hrehawm ang tih ka ring, chuvangin tunkar chhung chu hetah hian in awm ka phal sak ang che u. Mahse, room luah man erawh min pek ve a ngai thung ang, pawisa thawh chhuah dan chu in lo ngaihtuah ve tawh mai dawn nia,"a rawn ti a, min chhuahsan leh nghal a. Mahriati chuan,"Kei chu awm reng nan chuan ka duh hauh lo,"a lo ti nghal vat a. Amuana chuan,"Hetah kan awm lohvin khawiahnge kan awm ang a?,"a lo ti vin hluk a. Mahriati chuan,"Thlanmualah te pawh kan riak leh mai ang chu,"a lo ti sam et a. Amuana chuan,"I duh leh thlanmualah chuan riak la, kei chu thlanmualah ka riak lo ang,"a ti vin leh hlak hlak a. An inhnial thinrim thei dawn tak ngialin ka hria a, ka inrawlh ve nghal vat a,"Duhtawk rih teh u, kan awmdan tur hi ṭha deuha ngaihtuah a ngai a nia,"tiin thu lai la tak chuan ka ṭhelh thei hram a.

"Heta ṭang hian chhuak ringawt pawh ni ila, thlanmualah bak riahna tur kan nei dawn lo. Chuvang chuan a theih chhung chu hetah hian awm ka duh,"Amuana chuan a rawn ti ve leh a.

"Kei chu thlanmualah pawh riak dawn ila, helai hmuna awm aichuan ka la thlang fe zawk,"Mahriati chuan a rawn ti ve leh bawk a. Engmah a sawi kuak hleih theih loh a ni ber e, a tawpah chuan hlauh ang ngei ngeiin an in ti thinrim ta. Hmeichhe kawlh leh kawlhrawng Mahriati chu a thinchhiat a chhuak ta,"Zomuanpui, i duh duha awm turin min ti reng reng suh aw. I thu hnuaia awm ka nih loh hi aw,"a ti phiar phiar mai a. Amuana lah tlawm a tum si lo,"E he he, i van zak lo tak e aw. Ka duh duhin awm tir che ka tum ka hre lo, kei chuan ka duhdan ka sawi mai zawk a ni. Hetah hian i awm duh loh leh thlanmualah chuan han riak la ti nia,"a rawn ti vin ve ṭhak ṭhak bawk a. Hotu nu te chuan an inhnial thawm chu an hria ang tih ka hlau si, an inkarah chuan ka ding leh a,"Amuan, mipa zawk i nihkha duhtawk rih rawh. Mahriat, nang pawh mipa an hnial an hnial ngai lo, duhtawk tawh rawh u,"tiin ṭha deuhin ka hrilh hnu chuan la inhnial leh deuh deuh mah se, an inhnial rei ta lem lova.

"Khawiah pawh kalin awm mah ila, tuman'Ka ui, ka ar'min ti dawn lo tih chu kan hre chiang vek ngei ang. Hetianga inhnial vak vak hian awmzia a nei lo, chuvangin kan awmdan tur chu rilru fim tak pu chunga kan ngaihtuah a ngai a ni,"ka ti leh a. Kan sawi khawm kan sawi khawm hnuah chuan helaia awm a, kan theih ang anga sum deh chhuah chu kan ti thlu ta a. Mahse, kar 1 chhung chiah kan awm theih dawn vangin, rim taka hna kan thawh erawh a ṭul dawn a ni.

Amuana chuan a hmaa a thil tih ang chu tih leh a tum viau a. Mahse, Mahriati nen chuan rem kan tih sak loh vangin hna dang thawk turin a tei chhuak ve ta nge nge a. Keini hmeichhe pahnih pawh pawisa thawh chhuahna tur zawngin kan vak kual ve nasa kher mai. Mahse, min han en chiang a, tuman an hnuaia hna thawk turin min chhawr duh reng reng lo mai. Kan hmel min en a, min hre chiang a, kan lu a kawlh bawk a. Hmeichhe awmṭha duh lo lu an meh kawlh sak kha kan ni miau si a. Min chhawr duh lo ho tu te pawh chu ka dem hran love, an dinhmunah ding ni ve ta ila an tih ang tho hian ka tih ka ring a ni.

Tunah chuan ka bei a dawng ve takzet tawh a ni. Pawisa chu kan la nei nual mai; mahse, a awmsa rin ngawr ngawr chu a buaithlak ve hret a ni.

"Aw Lalpa, tunah i kutah kan in nghat tawp a ni. Aw Lalpa, tunah hian ka bei a dawng tak zet tawh a ni. Khawngaihin he hrehawmna khur aṭang hian min hruai chhuak hram teh,"tiin ka rilru in ka ṭawngṭai mawlh mawlh a. Chhanna erawh engtikah nge a rawn thlen ang tih erawh ka hre lo a ni.

Mahriati nen chuan beidawng takin kan inzui haw leh hnak hnak a. Amuana chu a lo haw daih tawh a, a lo ṭhu ngui lap mai a. Thil awmzia kan zawh chuan,"Kan awmna hi Police hovin an hre tawh a, zaninah min rawn luh chhuah an tum a. Zanin dar 7:00pm hma in kan chhuah a ngai, Hotu nu hnen aṭanga ka hriat a ni a. A rang lamin kan sahimna zawnga kan chhuah a ngai,"a lo ti a. Kan thu hriat chuan min ti lawm lo kher mai,"A van beidawn thlak ngai ve le,"ka ṭhu hnawk a, Pathian hi a awm lo tak tak ta emaw ni aw tiin rilru ka siam ve hman ṭep a ni. Mahse,tun thlenga nunna min pe tu chu amah Pathian hi a ni miau si a.