Aizawl | May 16, 2020: Union Union Minister of State (Independent Charge) Development of North Eastern Region (DoNER), MoS PMO, Personnel, Public Grievances & Pensions, Atomic Energy and Space, Dr Jitendra Singh chuan vawiin khan NE state 8-a Chief Secretary leh senior officers te COVID chungchanga an hmalakna te a sawipui.
Darkar khat chuang video conference hmanga sawihona ah hian Arunachal Pradesh, Assam, Manipur, Meghalaya, Mizoram, Nagaland, Sikkim leh Tripura atangin an hmalakna theuh te sawiho a ni a, migrant labourer leh hmun dang atanga an state theuh a hruai chungchang te an sawi ho bawk. PM in 20 lakh crore economic package a puan chuangchang leh inkharkhipna dan zawi muanga thlah dul theih dan chungchang te an sawiho a ni.
Dr Jintendra Singh chuan DoNER Minister a nihna angin State sawrkar tin ten Corona pandemic puan a nih hnua an hnathawh dan te chu a fak a. An inpekna avangin North East ah he hri leng tur hi nasa taka ven a nih thu a sawi.
Hmun dang atanga North East tlawh te chungchangah Minister chuan passenger list zawng zawng te chu State Sawrkar leh Ministry of DoNER in Resident Commissioner leh Nodal Officer te kaltlangin an neih vek a tul thu a sawi a. Heng mite hi enzui zel turin State sawrkar te a chah bawk a, nimin lawka Gujarat atanga Guwahati lam thleng te awmna hmun tur Meghalaya leh state hrang hrangten an buaipui zia a sawichhuak bawk a ni.
Guwahati a thlawhna service chhunzawm chungchang sawiin Dr. Singh chuan Ministry of Home Affairs leh Ministry of Civil Aviation te nena in biak rem hmasak a ngaih tur thu a sawi a. Rel tam zawk tlan theihna turin Railway Ministry nena hmalak mek a ni a ti bawk.
Dr. Jitendra Singh chuan Ministry of Development of North Eastern Region (DoNER) in a tum ber chu hmasawnna tura ruahmanna siam sa chawlh mek te a rang lama chhunzawm theih tura hmalak a ni a ti a. Hun tiam chhunga thawkzo tura an hma lak a nih mek thu sawiin, State sawrkar tinte chu a rang lama Utilization Certificate leh document pawimawh te thehlut thuai turin a chah bawk a ni.
Chief Secretary te chuan tun atanga hun rei lo te ah State thenkhat ah chuan inkharkhipna dan thlahdul theih a nih thu an sawi a. Hei hi tih hlawhtlin a nih chuan rang zawkin project te hi thawh theih a ni ang an ti.
Secretary DoNERInderjit Singh, Secretary North Eastern Council Moses leh North East Ministry senior official te an tel a ni.
- PIB Aizawl
Post a Comment
He post chungchanga i ngaihdan lo sawi ve rawh: