Aizawl | May 21, 2020: Nimin chawhnu lam ațanga khan thli pui Cyclone Amphan chuan W. Bengal, Odisha state te chu a nuai nasa hle a, mi 72 laiin nunna an chan tawh, tih Mamata Banerjee, West Bengal Chief Minister chuan a sawi. Cyclone Amphan vanga chhiatna leh thil a tih chhiat zat hi chhut chhuah a la ni lo a, Nilaini chawhnu lam ațang hian he thlipui hi chhim chhak, Bangladesh panin a tleh tih a sawi bawk.
Prime Minister Narendra Modi-an twitter kal tlanga W. Bengal state thli puiin a nuai avanga tuarpuina thu leh India ram chu an tan a ding tlat a ni tih a hrilh a, state Chief Minister Mamata Banerjee chuan Prime Minister chu cyclone in an state a tih chhiat te leh an tuar nat zual lai te a hmun ngeia tlawh turin a sawm a ni.
“Prime Minister Narendra Modi hi Cyclone Amphan-in a nuai chhiat nasatna lai hmun tlawh turin ka sawm a ni," tih thu Mamata chuan thu thar thehdarhtute a biaknaah a sawi. Cyclone Amphan avang hian tun thlenga hriat theih chinah mi 72 an thih tawh thu a sawi bawk.
“Cyclone Amphan avanga nunna chan chhungte hnenah zangnadawmna mi pakhat tan Rs 2.5 lakh zel pek an ni ang tih ka puang nghal e, " tih CM chuan a sawi.
Cycone Amphan vanga hloh zat hi West Bengal hian a la hre mai thei lo a, in leh lo chhe zat te, leh leimin leh thing tluin thil a delh chhiat hmun tam takah a awm a ni.
National Crisis Management Committee (NCMC) chuan nimin khan Odisha leh West Bengal-a Cyclone tleh dan dinhmun an sawiho a, NDRF team thawn luh belh thu chungchang te, chhanchhuahna hna thawh dan tur leh Kolkata khawpui thil a tih chhiat te siam țhat nghal ngai an ti bawk.
Union Home Minister Amit Shah chuan cyclone Amphan chungchangah hian Chief Minister pahnih Odisha leh West Bengal a biak tawh thu leh a dinhmun te a ngaihven reng thu leh Central ațanga țanpuina awm apianga țanpui an nih tur thu a sawi a ni.
- Huna Kawlvawm
Post a Comment
He post chungchanga i ngaihdan lo sawi ve rawh: