CORONAVIRUS PANDEMIC AVANGIN WHO LEH USA INZAWMNA TRUMP-AN A TIH TAWP THU A PUANG

Aizawl |  May 30, 2020: United States President Donald Trump chuan Zirtawpni khan World Health Organisation (WHO) leh an ram United States inzawmna chu "tih tawp" anih thu a puang. Hei hi WHO insiam țhat an tum loh vangin kum khata   $450 million an lo thawh țhin pawh khawvel huap pawl dang tan te pek a nih tur thu a sawi.

President hian  United States in Hong Kong hnena dinhmun țha bik( special status) an pek pawh tih tawp nghal a nih thu sawiin Mainland China nen dinhmun inang  pek an nih tawh tur thu a sawi. China khua leh tui US universities, colleges zirlai țhenkhat te chu an zir chhunzawm zel a remchan tawh loh tur thu a sawi bawk. He thu hi President Trump hian  China in Hong Kong tan buaina leh harsatna chawk chhuak thei tak  _national security law_ a barh luih vang leh  Hong Kong zalenna rapbet leh pal zut lui zawnga a chet hnua puang a ni.



“A chhan chu, insiam țha, ințhuahfai tura ngenna ngei pawh an bengkhawn duh lo a, hetiang anih avang hian vawiin ațang hian  World Health Organization nena kan inzawmna chu kan ti tawp ta a, he pawl tan sum kan lo thawh ve țhin pawh khawvel huap pawl dang vantlang hriselna atana thawk, a phu ngei leh rintlak hnenah kan pe ang, " tih thu President Trump chuan thu thar thehdarhtute hnenah a sawi.



Trump hian khawvel pum huap United States in siam țhat țul nia a hriat te hming pawh sawiin chung zinga pathum te hnena sum a lo pek țhin te a tih tawp vek tawh bakah member anihna pawh a lo inhnuk dawk tawh a, heng pawl te hi China hnuaia kun, leh a thunun te an ni.



“He pawl hian hma lam pan zawnga a kal thei a ni tih chu, China thu hnuaiah a kun lo ngei a ni tih a tak ngeia a lan tir hi a ni". WHO Director General  Dr Tedros Adhanom Ghebreyesus hnenah hetiang sawina lehkhathawn phek lia thui hi kar hmasa khan a lo thawn tawh bawk a. Chu lehkhaah chuan ni 30 chhung chhanna leh insiam țhatna atan hun a pe a ni.



 United States hi President Trump hnu hian khawvel huap pawl leh thawhhona engemaw zat a chhuahsan tawh a,  Trans-Pacific Partnership chu January 2017 khan an chhuahsan a, hei hi President office a luah  thla a ni.  Hemi hnu kum 2017 ah tho  Paris Accord on climate change ațangin a ni leh a, UNESCO ațangin kum 2017 ah tho, Iran deal 2018 leh  UNHCR kum 2018 ah te a ni. President hi  NATO leh  United Nations sum an thawhah hian a lawm lo hle bawk a, tunah  World Health Organization chungah a ni leh ta a ni. 


BELH VE E
Coronavirus pandemic WHO in a dawnsawn danah China thu hnuaia kun tlat leh Secretary General Dr Tedros, China in he dinhmun a chelh theihna tura nasa taka țan a lakpui anih avang hian President Trump hi a lungawi thei ngang lo a. China lahin Hong Kong enkawlna dan thar a mipui lam duh loh national security law a phar thluk hnan a, Taiwan Sorkar pawh China ram bung khat an laka hel mai nia ngaih anih thu te bakah south China sea lamah a hauh zau avangin a țhenawm ram te lungawi a rám an awm lo. Hei mai hi a la ni lo, India nen ram ri lamah na takin an inep mek a. Heng zawng zawng te bakah Coronavirus an ram ațanga ințan hian khawthlang ram an lawm lo hlawm hle a, a bikin President Trump hi a thinrim zual hle a ni.


China lam an ngawi mai bik lo. India leh China sipai inep chungchangah an inkara palai hna thawh Trump inhuamna thu pawh an pawm chuang lo, India pawhin ramri chin fel chu ram pahnih te inkar a nih avangin ram dang inawlh rem an ti lo bawk.


Coronavirus pandemic in khawvel mihring nunna nasa takin a suat mek a, India ramah nitin kai thar an pung tual tual a, US ah ngei pawh he hri avanga thi mihring nuai khat an pel tawh a, he hri lo darh chhuahna China a lo ni kher nen, boruak muanawm tak hnuaiah he khawvel hi a awm zel thei  dawn em tih hi ngaihtuahna a ti thui khawp mai. 


Source :
Hindustan Times
May 30, 2020
@ 01:20 IST

===30==05==20===
- Huna Kawlvawm

Post a Comment

0 Comments