Chief Minister-in ramri a COVID-19 duty te a tlawh; Kolasib District kawng siamthat ngai thenkhat a enfiah

Aizawl | May 25, 2020: Vawiin khan Chief Minister Pu Zoramthanga chuan Bairabi, Zophai, Phaisen leh Vairengte a Mizoram leh Assam inrinaa COVID-19 duty te chu a hmunah a tlawh. FCS&CA Minister Pu K. Lalrinliana, Kolasib bialtu MLA leh Rubber & Allied Crops Development Board Vice- Chairman Pu Lalrinsanga Ralte, Serlui bialtu MLA ten Chief Minister hi an tawiawm a, National Highway leh kawng dang siamthat ngai an enfiah nghal bawk.



Chief Minister chuan state pum him theihna tura theihtawp chhuah a ramria duty-te chu an chungah lawmthu sawiin an inpekna chu ropui a ti a. Tunhnaia state pawn atanga Zoram mi leh sa tangkhang lo hawte avangin Bairabi khua chu an hah phah hle thu leh, Vairengte chu bungraw chawkluhna luhka ber a nih avanga duty te an hah hle tih a hriatpui thu sawiin, an inpekna chu fakawm a ti a. Volunteer duty-te hi ram dang tan pawha entawntlak, sorkar laipuia hotute lakah pawh a zuk chhuan pui thin an nih thu a sawi a. Khawtlang mipuiten mamawh an neih hrang hrang te chu hriatpuiin, a remchan dan ang zela umzui sak an nih tur thu Chief Minister chuan a sawi bawk.

Chief Minister hian Kolasib Circuit House-ah Kolasib DC leh khawtlang hruaitute nen inkawmna hun an neihah mipui mamawh bungrua kan phurh luhna kawng chu kawng chhia vanga harsatna lian kan tawh loh nan tun fur pui rawn thlen hma hian a chhe zual lai siam that ngai te chu a remchan dan anga hmalak nghal thuai a pawimawh thu a sawi bawk a ni.

Chief Minister hian Bairabi khaw luhna lei (bridge) siam that mek chu enfiahin, Bairabi bypass road (Bairabi khua hel a rail station panna kawng) a enfiah bawk a. Helai bypass road hi kum 1998 a siam niin, FCI Godown atanga buhfai leh thildangte phurhchhuahna atana hman thin a ni a. NH-154 siam zawh hnuah kawng thar hman a nih zawk tak avangin he kawng hi hluihlawn a ni ta a. Tun COVID-19 hrileng avang hian mihring leh bungraw phur motor-ten khawchhung lut loa an kal theihna remchang atan ruahmanna siam tharin, a chhe zual lai te hnawh a hman tan leh a ni. 

Bairabi rel chawlhmun tlawhin Chief Minister hian duty-te a kawm bawk a. Chief Minister hian Bairabi khawtlang hruaituten Tlawng lui kam a lei min  thin venna tura lungrem siam an dil chu a hmunah a enpui a. Zophai leh Vairengte ramria leilet hmuna hmalak dante thlir bawkin, khawl hmanga tha tlem zawk leh hlawk zawka buh thar theih dan turte an sawiho bawk. 

Chief Minister hian Vairengte Check Gate-a screening point enfiahin, duty te nen an inkawm a. Thermal scanner thar, khawsik leh siklo enfiahna chu a en bawk a. Bungraw phur motor state chhunga lo lut an kahfai (sanitize)-te enin, 1st IR Battalion Camp a tlawh bawk a. Chief Minister hian COVID-19 avanga boral Pu H. Rohmingliana, Vairengte chu a ral bawkin, Vairengte Block MHIP te enkawl Hope Centre (Beiseina In) a tlawh bawk.

Chief Minister hian Bairabi Joint VC hnenah puihna sumfai Rs. 20,000 leh silpauline 6 pein, Vairengte Joint VC hnenah Rs. 40,000 leh silpauline 8 a pe a. Hand sanitizer litre 20, face mask 100 leh gloves pair 100 a pe ve ve bawk a. Zophai leh Phaisen police outpost-a duty te hnenah Rs. 10,000 ve ve leh silpauline a pe bawk a. Heng puihna sum te hi CM Relief Fund atanga pek a ni.

Chief Minister hi vawiin hian Kolasib District DC, SP leh district official dangte bakah Aizawl atangin PWD leh H&FW department hotuten an tawiawm a ni.

- DIPR

Post a Comment

0 Comments