The Last Good Bye

(Depression hneh loh hmeichhe naupang vakvai leh kei )
- Thakima


‘Sir, i tap em ni?’

Ka phu zawk a, hnunglam ah chuan ka hriat hauh loh laiin hmeichhe naupang pakhat, mitmeng pawraih mai, thawmhnaw tet hrip hrep in bel, kum 6 mi vel tur, khaw lum em a vanga biang tai tek hi Pangpar sikhaw te te, tuifinriat kam vela hnimhnah hrang hrang te nena tel pawlh pawm bawr lak chung hian a lo ding ran mai a, eng mahin ka chhang lo. 

Mediterranean tuifinriat chu a fawn hlup hlup a, chulai Beach zawl pharh duai maiah chuan tuifawn chhaih leh tui cheng nula tlangval te chu an ri chel chul a, beach zawl bak a tlang zing zum, tuifinriata in khawh lut ruih mai, lungpui lian tak tak kar a Coconut khat taka a din thluah na lai hmunah chuan Coconut tlu awn ruah mai hi a awm a, chumi chungah chuan thu in; ‘theihnghilh ka duh ngawih ngawih i’ lo chu ka rilru leh mitthla ah eng dang mah a awm lo a, Ani kha ka hmangaih ani satliah mai lo a, duhthu ka sam pawhin ka duhthusam zawng zawng vawrtawp a piang kha amah ah khan a kim chauh zel a, tunah ngei pawh hian kan pahnih a tan tiin mel sang tel a hla ah thi leh thau pawlh tak meuh meuhin zirna sang zawk ka bei mek a ni a, mahse min lo rinawm loh san tih thian te kal tlangin ka hre chhuak ta chauh si, ka mittui chu ka khap per sawk a, ‘thihna aia thlan zawk tur thil dang enge ka tan hian awm ang aw’ tiin ka in ngaihtuah mek a nih hi.

‘Sir, pangpar hi min lei sak ve ta che; khawngaih tak in, tu emaw, i tana mi pawimawh tak hnen a pek a tan’ beisei nei tak hian min en heu reuh a, eng vangnge ka hre lo, mahse hmeichhe naupang ngainatawm tak ni hian ka hre ta tlat a, ka ip te a tangin ka walet phawrh pah in,

‘Eng zat man nge?’ 
‘Rs 15;... Sir’

Rs 50 pek pahin  tel khat chu ka han lak sak a, a hmel ah chuan pawi tihna a rawn lang a, makti takin  ka han en a, “Sir, vawiin a tana min dawr hmasaber tu i nia..” a han ngawi vang vang a, pawisa nawi min kir tur a nei lo va, ka dawr loh a hlau ani tih ka hria, kan piah deuh coconut daihlim hnuaia lungpui chungah chuan  ka hruai phei a, “he tah hian lo thu lawk rawh aw” tih pahin kan piah deuh mai a Ice cream nawrlirh hmanga an lo nawr na lam chu ka pan san a, a bula let leh pahin pakhat chu ka han pe a, in ngaihtuah nasa hmel takin a ban mai ngam lo a, a ngaihtuah chu hria in, ‘La rawh, pangpar man chu a pawisa in ka pe ang che’.

A mit ah chuan tu tanmah a hai rual loh hlimna, lawmna, hrilhhaina leh mak tihna a rawn lang  a, Lungpui chungah chuan a thuthluang dia a, a bulah chuan a pangpar pawm chu a dah darh niai a, tuifinriat thli fim te chuan a sam thur chhap chu a chhem leng siau siau a, Ice cream chu la in ei zawh mai hlau niawm takin  a tep hlek hlek a, ka awm ve tih leh kan vela tui cheng ri au ri teng tung mai te chu a theihnghilh vek ni ber in ka hria, reife  hnuah ka lam lo hawiin mi nel hmel tak in, “Sir, i hmangaih tu emaw i hlauh a mi i tah?” min han ti tha leh reuh a, chhanna chang hre lo in ka ngawi reng a,

 “Sir” a rawn tih leh chuan ka harh zawk a.
“Sir min ti tawh suh,’ Tete’ min ti rawh aw, nang enge i hming”

“Hming ka nei lo”
Mak ka ti tawlh tawlh mai, “Hming i nei lo maw? Anih engtinnge min an koh thin che?

Pawi sawi lo leh chapo hmel takin, “Kuu-tai”(South Indian hoin Naupang an auh duh dahna) min ti thin, 

“Anih khawnge i nu leh pa?” a thil ei lai chu a tep hlek hlek a, min rawn melh thuak pahin, “Nu leh pa ka nei lo” 
Ice cream a ei lai chu a a chawl a, tuifinriat  chung hla tak a sangha man tu lawng leng kal riai riai chu a thlir daih ni mai hian ka hria a, 

“Nau chu ka nei thin a, mahse Rel(Train) in min chil hlum sak a” a hmelah chuan lungleng hmel hi a rawn lang chhuak lek lek niin ka hria
“ i nu leh pa chu ngatinge i hriat loh a?” ka zawh rual rual in ka in chhir nghal a, a tlai lutuk tawh si, mak ti taka mi rawn en hau lai chuan rang takin, “Angela tiin ka ko ang che aw, chu chu i hming a tan tha i ti em?”

Bo deuh hmel hi a han pu phawt a, zawite, hmuiphun lek tak tak hian Angela tih chu a han lam sep a, chutah hlim deuh maiin, “Awle, ka lawm e, midang bulah pawh chu hming chu ka pu reng tawh ang” tih pahin phur hmel tak hian a han ding a.

“Angela, khawi lai ah nge in chen?”
“Sawtah sawn”  tih pahin kan piah hla taka Rel Station lam chu a kawk a, ka va hawi phei ngial na in eng mah ka va hmu lo, In a awm tlat lo va.
Ka hmel chu nuihzat hmel takin a lo thlir chho ha a, a kawh na hmasa aia hla zawk kawk niawm takin an kawk sang sawt a “Sawwwwtah (Beyond there) sawn a lawm ka tih” tih pahin Rail Station lam bawk chu an kawk leh a.

“Mahse Angela, in ka hmu hlei nem, Rail station chauh a lawm ka hmuh”

“Aw tah sawn, In ka nei hlei nem, tiang ah sawn a lawm ka riah thin, mi dangpawh tam tak pawh an awm a lawm” ngaihsam hmel takin a ti leh a, mak ka ti tawlh tawlh mai

“Vawiin ah chuan hetah; Cochin ah hian kan awm a, naktukah chuan hmun dangah, engtik ah emaw hetah ka lo let leh ang” tih pahin a pangpar chu a pawm tha a, ka sana chu a rawn en zauh a, hre thiam takin Rs 100 ka phawrh a, pangpar man a tana pek pahin, “Tikhan nei rawh, thilpek anih kha”

Awih loh hmel tak, hamhaih hmel nungsarh si in min rawn chhoh en haw a, bah deuh nakin, “Ka lawm e, ihhh... chuan Ice Cream a vang pawh khan ka lawm e, nasa takin” tih pahin a in her a; tawite an kal a, lo let leh pahin a pangpar bawr khat chu min rawn pek belh pahin

“Thilpek (Gift) anih hi, tu emaw, i tana mi pawimawh tak pe la, i hlim reng mai ang”
A nui sek a, a ha hmai bal seu karah chuan a hmel chu a nung sarh mai a

“Tap tawh suh aw Sir,  tuman kan duh kan nei kim ngai lo” 

Chu thu tawite chuan min deng dawt mai, Naupang kum 6 mi vel, hming, nu leh pa, laina leh in leh lo pawh nei lo chu Philosopher tha mi ang maiin a tawng reuh a, thiamna engmah anei lo a, mahse a thil tawn hringnun kawng chhuk chho tak tak mai chuan  kei aia puitlingah a chher chhuak si, a ni chuan hringnun hi kum 6 mi lek niin a sual a, a hmachhawn a, hringnun hi a hre thiam a, a chantawk a lungawiin midang hnem turin a in peih a sin, ka dinhmun nen a va inthlau em! he hmeichhe pakhat a vang hian eng chennge ka tah tawh a, eng chennge ka la tah dawn? Ka harh sawng sawng ni in ka in hria.
Lawmthusawi ka ba a ni, a lam ka han hawi leh chuan a lo awm tawh hauh lo mai a, ka hawi kual ruai ruai a, hla taka Sap nula 2 hnena a pangpar leisak tura a ngen niawm tak a a lo be lai leh ka lam hawi a a rawn kawk lai te chu ka va hmu a, nula 2 chuan bawr khat ve ve in an lak sak tih ka va hre thei.

‘Nangmah vang a ni’ ti niawm tak in a pangpar chu ka lam hawiin a rawn vai leuh leuh a, rel kal tur kiu ruai ruai thawm chu hria in hmanhmawh takin Rel lam pan chuan a tlan dar dar a, rel kal tan ruai ruai kawngka ah chuan lawn in min la rawn vai leh hram a, ka hmuh tawpna tur a ni tih hria in thinlung thawveng leh a thil mi zirtir a vanga lawm em em chungin ka ban ka vai let a.

A hmasaber a tan leh a hnuhnung ber a tan ani nghal tih hre rilru ran chungin a lan theih chhung chu ka thlir zui a, a thil mi zirtir hlutak chu theihnghilh ngai tawh lo tura in tiam chungin keima hriat tawk lek in ka phun sap a, 

“Good bye Angela”

Post a Comment

0 Comments