MHA in thu belhchian dawl lo a darh loh nana hmala turin State leh UT te ngen

Aizawl | April 2, 2020: COVID-19 avanga mipuiin harsatna an tawh chungchanga au hla(writ petition) ngaihtuah tura Supreme Court thukhawmin state danga hnathawk migrant labour te ti ralkhela, thu belhchian dawllo darh vel vanga a huhoa an haw darh ta chiam mai chu thil pawi tak a ni tiin Court sang ber chuan he thil avang hian mipuiten an tuar nasa hle tih a sawi.

Supreme Court thu bawhzuiin, Pu Ajay Kumar Bhalla, Secretary, Ministry of Home Affairs chuan thu belhchian dawl lo a darh loh nan hma la turin State leh UT-te ziakin a hriattir a. Mipuiin thudik leh diklo an thliar thiam theih nan Sawrkar Laipui-in web-portal an siam tur thu MHA hian a sawi a, State leh UT te pawh hetiang bawka hma la turin a ngen a ni.

Court sang ber chuan state danga atanga inhlawhfa migrant labour te ei leh in, damdawi, chenna lailawk leh mamawh dangte an neih theih nan NDMA/MHA thuchhuah leh kaihhruaina anga hma la turin a hriattir a. COVID-19 hripui darh zel tur ven nan Central Sawrkar kaihhruaina/thurawn/thupek te khauh taka kalpui turin State te leh UT te chu MHA in a hriattir bawk a ni.

- DIPR

Post a Comment

0 Comments