— Centenary C. Lalzahawma
Columnist, Explore Mizoram
Kei Ngei Hi Ka Lo Ni - Good Friday Poem
1. Kei ngei hi ka lo ni,
A nuam chin zêla zuitu ṭha leh huaisen;
A harsa laia hnung tawlh leh mai ṭhìn zuitu dawihzep,
Thil tih aia ṭawng chak zâwk chu;
Tu dang an ni lo!
2. Kei ngei hi ka lo ni,
Ka Lal leh ka Pathian hnénah,
“Rinawm takin ka zui ang che,”
Tia phatsan lehtu Juda kha.
Tu dang an ni lo!
3. Kei ngei hi ka lo ni,
“Kraws-ah khéngbet rawh,
Kraws-ah khéngbet rawh,”
Tia aw ráwl tàwp chhuahtu kha;
Tu dang an ni lo!
4. Kei ngei hi ka lo ni,
Ka natnate phura;
Ka lungngaihnate phurtu Lal Isua,
Mi sual ber anga chhuaha thi tùra thu petu kha;
Tu dang an ni lo!
5. Kei ngei hi ka lo ni,
Vuakna hrui hrual hmanga;
Dimna tel lova vuaa lalber kutthlâktu leh,
Hmusit taka nghaisatu Rome sipai nunrâwng kha;
Tu dang an ni lo!
6. Kei ngei hi ka lo ni,
Amah [Isua Krista] lei leh vàna roréltu;
Kalvari thing anchhe dawng kraws nèna fukè kilh zawm a,
A nâka fei hmâwra vittu kha;
Tu dang an ni lo!
7. Kei ngei hi ka lo ni,
Jerusalem mîte dem a;
An dik lohna hre thar fo ṭhìn,
Dik bîk chuang hauh si lo chu;
Tu dang an ni lo!
8. Kei ngei hi ka lo ni,
Lei leh vàn lalber kraws lèra tuihàla au;
Tui in tùr a mamawh tih hre reng chung a,
Tui in tùr aia thil dang petu kha;
Tu dang an ni lo!
9. Kei ngei hi ka lo ni,
Hmangaih vànga chatuan thihna ată chatuan nunna chang ve tùrin;
Chungnung bera'n a fapa thisenin min lei ta!
Tih hre reng chunga làwm nacháng hre lotu chu;
Tu dang an ni lo!
10. Kei ngei hi ka lo ni,
Kraws kawng aia dam chhúng khawsak ngaihtuah zâwk;
Kumhlun tùr ang maia in leh lo ngaihsak,
Mi dang ṭanpui hman lo léka mahni tána bei ṭhintu chu;
Tu dang an ni lo!
(A hnuaia fakna hi lo hmet ve rawh.)
Post a Comment
He post chungchanga i ngaihdan lo sawi ve rawh: