Aizawl | April 28, 2020: Hripui leng karah mahni mihringpuite hmangaihna leh Mizo mizona bakah 'Sem sem dam dam, ei bil thi thi' tia infuih thin hnam zia a lang zel. Tukin khan Electric Veng, Aizawl chuan Phuldungsei khua atangin chawhmeh chi hrang hrang Pickup trip 3 an dawng.
 |
| Mi dang tana malsawmna ni turin an phur hle |
Phuldungsei chuan hripui leng mekah Aizawl khaw chhunga veng khat tanpui turin thutlukna an siam a, chutah chuan Electric veng hi pawtfuhin heng tanpuina hi an hlan ta a ni.
 |
| Pik-up in chawhmeh an phur |
Phuldungsei khaw mi, MZP general Headquarters Executive Committee member Lalneihkimi Ralte (Mami Ralte) chuan, "In tin atangin mi pakhat tal chhuah tur tiin an auva, thil thleng khat a ni sia, chhungkua kuain kan chhuak a, a thenin phuihnam, a thenin tumbu-te kan zawng a, mahni theih leh neih angte kan khawn khawm a,kan phur tlang khawp mai," tiin Chawhmeh zawng tura Phudungsei khaw hmalak dan leh Mipui an phur zia a sawi.
 |
| Phuihnam zawng pawl pawh an phur hle |
Heng chawhmeh/thlai zozai phurh nan hian Phuldungsei Task force in diesel an tum a, pick-up pathumin nizan khan an phur a, tukin khan an thlenpui ta a ni.
 |
| Phuldungsei hmalakna hrang hrang | Picture Collage |
Heng chawhmeh-te hi Electric veng Task Force in lo dawngsawngin, Electric veng Mizo Hmeichhe Insuihkhawm Pawl (EMHIP) chuan an enfel ang a, vawiin tlai hian in tin-ah an sem chhuak dawn a ni.
 |
| Electric veng leh Phuldungsei task force-te |
 |
| Thlai hnah/an pawh uluk takin an fun |
Heng chawhmehte hi Electric veng chuan lo dawngsawngin, an lawm hle a, Explore Mizoram Contributing Editor Vidpuia Hrahsel chuan, "Kan veng group (WhatsApp group) chu Phuldungsei hlirin a khat, kan lawm lutuk a, lawmthu sawi dan tur pawh kan thiam lo zawk," tiin Electric veng mipui lawm thu a sawi.
 |
| Mizo kristian tih awm renga mawi thilpek chu... |
Explore Mizoram ah kan lo ziah tawh angin, Electric veng mipui chuan Electric veng YMA kaltlangin hmanni khan cheng tam tak thawhkhawmin Kolasib leh Mamit district chhunga Ramri hrula Task Force duty-te tan ei tur bakah Cheng nuaih 9 chuang an lo sem tawh a. ( hetah hian kimchangin a awm.)
Mizo kristian te hla sak ban loh, Kristian Hlabu nambar 590-na, Rev H Lengluta hla phuah,
Pe rawh u, tichuan, pekin in awm ang,
Pekah Pathian i hnehban thei lovang,
Pathianin Mihring lei a ba ngai lo,
Malsawmna hnar a lo ni si,"
tih chu Electric veng hian a takin an tawng a, Pek-ah Pathian hi hnehban theih a nih loh zia an hmuhchian thu group-ah an sawi nasa hle niin Vidpuia Hrahsel chuan a sawi bawk.
 |
| Electric veng-ah an enfel mek |
Phuldungsei khaw mipui hian lo leh huan thlai bakah ram chawhmeh chi hrang hrang an lakkhawm chu Khawpui-ah, a mamawhtute tan an hlan a. Khawpui-ah chuan Phuihnam tel khat pawh a hlut zia hmu thiamtu Phuldungsei khaw mipui an fakawm. Zokhua-ah chuan Tumbu leh Aidu chu hne hlui khawpa ei theih a nih laiin khawpui-ah chuan Tumbu pakhat pawh a hluin hmuh mai tur a awm lova, heng zawng zawng hmu thiam a, Lockdown karah chawhmeh-ah harsatna an tawk thei tih hriaa Aizawl khawpui tana Mamit district a khaw pakhat Phuldungsei khaw mipui inpekna a fakawm.
- H Zate
Founder/Editor
Explore Mizoram
(A hnuaia fakna hi lo hmet ve rawh.)
Post a Comment
He post chungchanga i ngaihdan lo sawi ve rawh: