DINTHAR THILTHLENGAH DANPUI BAWHCHHIATNA A AWM - HIGH COURT

Task Force-te hnathawh that mahnia thuneihna inpe te'n an tih hmingchhiat vek a hlauhawm - High Court

- The Frontier Despatch / https://www.facebook.com/thefrontierdespatch/
(The Frontier Despatch Editor phalnain a ngai anga lakchhawn a dah a ni e.)

Aizawl | April 29, 2020: Gauhati High Court, Aizawl Bench chuan vawiin (April 29) khan kar kalta Inrinni zanlaia Dinthar-a thil thleng chungchang ngaihtuahin, Aizawl Bawrhsap leh Aizawl Superintendent of Police-te chu chawlhkar hnih chhunga thil thlen dan tarlanna 'status report' thehlut turin a hriattir a.

Dinthar Local Level Task Force (LLTF) member-te laka thubuai ziahluh kher tur tihna erawh a ni lo, a ti.

Chanchin thar leh chanchinbua thuchhuahte thlirin Dinthar-a thalai pariat, ganja zu-a puhte kutthlak an nih chungchangah hian ram danpuiin 'Tu nunna leh zalenna mah dan hnuaiah lo chuan chhuhsak theih a ni lovang' a tih bawhchhiat niin a lang a.

Ganja nena man an nih chuan thalaite hi Police emaw, Excise emaw hnenah hlan tur an ni a. Curfew/lockdown an bawhchhia a nih chuan police hnenah hlan tur an ni thung, High Court chuan a ti a.

"Thalai pariatte dan bawhchhiatna chu dan bawhchhiatna thovin thungrul tur a ni lova, thil dik lo pahnih belhkhawmin thil dik a hring lo," a ti bawk.

Local Level leh Village Level Task Force-te'n coronavirus darh tur ven kawngah an thawk tha hle niin hriat mah se, he an hnathawh thate hi mahnia thuneihna inpek tumte avangin a hmingchhiat a hlauhawm thu court chuan a sawi a.

State sorkar pawhin LLTF/VLTF te thuneihna mumal tak a duan a tul tiin, heng TF-te hi a khuahkhirh loh chuan hun rei lo te-ah coronavirus leng tur dan tumnaah hrilhhaina, rorelna mumal lo, harsatna leh dan bawhchhiatna a thlen a hlauhawm tiin court chuan state sorkar pawh LLTF/VLTF-te thuneihna tichiang turin a hriattir nghal bawk.

High Court chuan hemi chungchang ngaihtuahna thubuaiah hian state sorkar, State Level Task Force chairman, Home Secretary, Aizawl Bawrhsap (District LTF chairman ni bawk), Aizawl SP, Vaivakawn police station-a Officer-in-Charge (OC) leh Dinthar LLTF-a chairman-te chu 'respondents'-ah a rinlut.