- K Remruatfela
Chhun ni sen sat vel vawl lâi takah chuan thâwklehkhatah kawmchhak bang chu a lo ri dawp a. Chu thâwm chuan pindan chhûngrila Bill Jack-a muhil chu a lo thâwng tho zawt a. A thâwm hriat chu eng nge ni tehrêng tih chiân tumin a pindan atang chuan a rawn tei chhuak vat a. Nimahsela, thil danglam engmah a hmuh lêm loh avangin a beng chhe ri mai mai ni ah ngaiin a pindanah bawk chuan a lût leh ta nghal a.
A hma zâna Apache hote nen lo infiam hrep tawh an nih avangin a chau deuh nge, a muhil zui leh nghal ta mai a. A mutthilh tui lâi tak chuan pâwnlam atanga tleirawl aw sîn relrawl takin 'Bill, Bill' ti-a a lo au ri chu a hre ta a. A thanharh chuan tukverh a han hawi chhuak a. Khua pawh a lo thim ruih tawh a. Pâwna a han chhuak chu Bathlâr bul lawkah hian tlangval tuai tir, chêr sîn rel rawl tak hi Sakawr bulah a lo ding zèl mai a. Bill Jack-a a han hmuh chiah chuan a kawrhma iptea lehkhathawn a ken chu a phawrh ta vat a. Bill Jack-a hnenah chuan a hlân ta nghal a. A hlan zawh veleh chuan a Sakawr chungah chuan chuangin a tlân lêt leh nghal ta vang vang a.
Chutia lehkhathawn lo pe tu a tlân liam veleh chuan Bill Jack chu pindan chhungrilah chuan a lût leh nghal ta vat a. Zawi muang hian a lehkhathawn dawn chu a han hawng a. A han chhiar chuan hawrawp chhe fahran hian, Bill Jack, i fapa hi i la duh chuan naktuk chawhnu ni tlâk hma ngeiin Buckhorn Sallon, Texas-ah lo kal ang che by Jessy James, Texas, tih hi a lo inziak a. Chu thu a han chhiar chuan Bill Jack chu a ding chhuak nghal hluai a, a fapa duat em em an lo ru bo a ni tih a han hriat chuan a sa ta phat a. A zân a zâna han luhchhuah nghal mai chu a duh rum rum hman a. Nimahsela, hun tiam hmaa han luhchhuah nghal mai chu thil pawi zâwk a thleng palh ang tih a hlauhthawn leh si avangin a inbengdai leh ta zâwk a. A khumah thu hnawkin a fapa a ngaihtuah lutuk chu a chek ta tlawk tlawk a. Insehruk hrep chung chuan, Oh! Where is my boy tonight, The boy of my tenderest care; The boy that was once my joy and light, The child of my love and prayer! tiin a chham chhuak ta hial a.
A tuk khua a lo vâr chuan chu chona hmachhawn tur chuan a inbuatsaih nghal ta vat vat a. A fapa chhanchhuah ngei tum chuan a hmanhlel ta hle a. Bill Jack hi pa sâng thlerh thlawrh, dâr pharh hlâi tha deuh, mit meng val kalh nei, hnar ngul sâng veh vawh, hmui zum lampang nei a ni a. Amah en mai pawh hian pa rorum leh huaisen, hlauh nei lo a ni tih a chiang em em a ni. Chawhnu lam a inher tan tihah chuan chu chona hmachhawn tur chuan a thuam famkim nen inbelin a Sakawr, Bigger tiha a koh mai thin nen chuan an chhuak dun ta a. Engemaw tâwk palh reng thei a ni tih a in hriatchian em avangin a Puak ruk pawh chu a kau ru reng a. A kekawr sîr chhûng lamah Chemte hriam ver vawr pawh a pâiah khungin hman nghal mai theih turin a paipawn ru kiau bawk a. A inpeih ta takzet a ni tih a chiang hle!
Mêl 33 vêl zet an tlân hnu chuan Texas khaw chhung chu an lût ta a. Buckhorn Saloon pawh chu a hmu ta thuai a. Saloon kawt a han thlen chuan inchhung thâwm chu a tha thawkhat hle tih pawh a hai lo. Nimahse, chûng thâwmte chuan Bill Jack mar phu erawh a tih danglam phah eih chuang lo! Tawi khawmuang lo chuan Buckhorn Saloon kawngkhar chu a han hawng ri ta thuai a. Chuveleh Saloon chhûnga lo awm, Jessey James leh a pâwlte chu Pistol inkau sa rûn hian thîp deuh hian an lo meng da vât hlawm a. Bill Jack erawh chu inringtâwk takin a lukhum parh khum vah chung hian Kawngkhar lâi takah chuan a ding khul mai a. Hlau leh zâm hmel pawh a pu hran lo. Saloon chhung hnung lam pang lâi taka lo thu, Jessy James hnenah chuan a mita chiang taka en kalh chung hian, Khawnge ka fapa chu le, amah tlan tur chuan ka nunna ka lo tháp e a ti ta chher mai a. Jessy James chuan tham lo ru deuh chung chuan Bill Jack-a chu a han en a, Han hawikual la, heng ka naute zawng zawng hi i hneh theih chuan i fapa chu ka pe kir leh ang che, a ti a, a nui chhuak ta hawk hawk nghal a. Bill Jack chuan muang ban chat hian, 'Hremhmun kotlânga thawn liam vat i duh loh chuan ka fapa chu min lo pe vat mai rawh', tih pah chuan chhuata bottle lo tla chu Jessy James lamah chuan a pet phei ta dâwrh a.
Chutia Bill Jack'an Jessy James bula Bottle a han pêt phei tih an hriat chuan Jessy James naute chuan an Pistol chu phawiin an hmaa Bill Jack lo ding chu kah tumin chêt an han la nghal vat a, chuveleh rang mangkheng hian Bill Jack chuan a Pistol Puak ruk pâi chu engtiklaiin nge a lo phawi chhuah hman tih hriat loh khawpa rang hian a han hmet puak ta pawp pawp a. Minute 1 pawh tling lovah chuan Saloon chhunga awm chu Jessy James chauh a ni ta! Jessy James hnenah chuan, 'Nun i la duh chuan ka fapa awmna chu min hrilh tawh rawh le', a han ti a. Jessy James pawh chuan dinhmun chhe zawkah a awm a ni tih a inhriat chiân tâk êm avangin tanhmun dang khawh pawh tum hranpa tawh a fapa chu Santa Fe Ranger neitupa, Billy the Kid hnenah an hnutchhiah thu a hrilh ta zung zung a. Santa Fe chu Texas atanga Mêl tam taka hlâ a la nih avangin a zân la la chuan a fapa lam tur chuan Bill Jack chu a Sakawr Bigger-a nen chuan an in phur chhuak nghal ta vang vang a.
A fapa a ngaihtuah lutuk chuan Bill Jack chu rilru fîm pawh a puttir hleithei tawh lova. Kawng tluanin a fapa ringawt chuan a ngaihtuahna a luah khat a, Where is my boy tonight, Where is my boy tonight; My heart o’erflows for I love him he knows, Oh where is my boy tonight? tiin chu Santa Fe zinkawng khawhar takah chuan chu thu lungkuai tak mai chu a chham chhuak ta mawlh mawlh a.
Vartiana him dam taka a fapa a han hmuh leh tâkah chuan a lawm lutuk chu a pawm nghal ta chung chung a. Lawmna leh inthiamlohna hlirin a khat zui ta bawk a. Chutia a fapa pawh venghim zo lova a awm chu nêp leh rintlâk loh hi a inti leh rum rum thin a. Mahni inthiam lo leh a fapa lainat tak chung chuan a chênna hmun Chicago chu chumi ni la la chuan an pan haw leh ta nghal a. Tuna chinah chuan a fapa venghim turin a inring reng tawh ang a, a inthlahdah thiang tawh lo a ni tiin amah leh amah chu a infuih ta mawlh mawlh bawk a.
Keini ringtu leh Krista hnung zuitu, sual râl do tura Lal ber sipai atana inpe tawhte pawh hian Bill Jack'an a fapa bo hnu a chhan chhuah leh tâk hnua rilru thar a put ang hi kan ni tin nunah kan put ve theuh hi a pawimawh em em a ni. Ringtute hi he khawvelah hian inthlahdah hman kan ni lova, sual râl do tura Felna hriamhrei inbela, inpeih renga kan awm hi a ngai a ni. Chuti lo chu, kan inthlahdah lai takin sual râlin min bei ang a, indan ngaihna hre lovin sual bâwi-ah kan pil thuai palh hlauh dah ang e. Hawh u, ni kin nî a kan inchhir tawh lohna turin hun tha kan neih lai ngei hian sual râl dova, Krista tana Pasaltha ni turin inring rengin i awm tlat ang u.
Râl kâp anga kalin,
Pathian mi te u;
Pathian mi te u;
In hmaa Lal Isua,
Enin kal rawh u.
(A hnuaia fakna hi lo hmet ve rawh.)
(A hnuaia fakna hi lo hmet ve rawh.)
Post a Comment
He post chungchanga i ngaihdan lo sawi ve rawh: