Aizawl Bawrhsap Pisa in Kum 130 tling

Aizawl | April 23, 2020:  Aizawl Bawrhsap Pisapui chu nimin khan kum 130 a tling. Kum 130 tlin hriatrengnan Aizawl Bawrhsap Pisa-ah a lawmna hun mi tlemte sawmin buatsaih a ni.

He hunah hian Mipuite hmuh theih turin hmanlaia hmanrua, ruhro, document hrang hrang leh record hlui tak tak pisapuia la vawn thatte phochhuah a ni. Heng document pawimawh leh hlu tak tak te hi tunkar chhungin DC Conference Hall-ah phochhuah a ni ang a, a tlawh duh tan Aizawl DC-ah pass dil theih a ni ang.

Aizawl Bawrhsap Pisapui Kum 130 tlin lawmnaah hian Aizawl SP Pu C.Lalruaia’n a hmanpui.

Aizawl DC Office:
Vailen vawikhatna a liam a, Lusei (Mizo) lalten an chhehvela khawsa hnamdang British awpna hnuaia mite an run leh ta fo a. Salahte an man thin a, inrun a lar leh ta viau a ni. Hei vang hian Lushai Hills chu British in awpbeh tak tak a tulin a hre ta a. Lushai Hills Expedition 1889 – 1890 (vailen vawihnihna) a duang leh ta a ni. Kum 1890 ah Government of Assam hnuaiah North Lushai Hills a piang ta a. Headquarters atan Aijal (Aizawl) thlan a ni a. North Lushai Hills a Bawrhsap hmasa ber (Political Officer) atan Captain HR Browne IA, Luseite chanchin thui tak lo hre sa tawh chu British Sawrkarin a ruat a. Incumbency chart-a a lan danin a hna hi April 22, 1890 ah a zawm a, September ni 9, 1890 thlengin he hna hi a chelh.

Aizawl Bawrhsap Pisapuiah hian Bawrhsap - Political Officer 7, Superintendent 32 leh Deputy Commissioner 45; avaiin Bawrhsap 84 an awm tawh a. A kum 130-na a Bawrhsap ni mek chu Pu Vanlalngaihsaka IAS a ni.

Aizawl Pisapui Bawrhsap hmasa ber HR Browne hian Mizo lalte chu kum 1890 khan remna (sauitan) a neihpui a, hemi hnu lawk hian mizo lal thenkhat ten bei thutin September ni 10, 1890 a Shillong a kal tur chu Sairang thlang lawk, Changsil thlen hma km 2 velah lo lambunin amah vengtu sipai pathum an kaphlum a. Captain Browne hi Sakawrin Changsil kulh a tlanlut hram nain a taksa hmun thum a silai hliamna tuar zo lovin Changsil kulh chhungah a boral ta a ni. Changsila sipai hotu, Lt. Loch-an a dawm hlum a ni.









Aizawl Pisapui hi North Lushai Hills area a office hmasa ber a nih avangin Mizo chanchin (history) nen thuk takin a inkungkaih a. Office building hi State Heritage Building-ah puan a ni tawh a. Sap ho sulhnu mai bakah hmanlai Mizo lalte chanchin, chhiarpui, electoral roll, leh record hlu dang tam tak dahthatna hmun a ni. Record pawimawh thenkhat hi Mizoram State Archive Office lamah dah phei ni tawh mah se, record hlu tak tak engemaw zat pisapuiah hian vawnthat tlat a ni a. Mizo history zirchiangtute tan pan manhla tak a ni.

Post a Comment

0 Comments