Chi leh chi hnam ang zawnga rilru pu-a harsatna leh buaina siam kan awm chuan kan zavaia tan a pawi thei a ni - Er Zira

Aizawl | April 23, 2020: Road & Infrastructure Development Board Vice Chairman leh Mamit bialtu MLA Er H Lalzirliana chuan vawiin khan tun hnaia thil thleng chungchang-ah Zomuantlang khua a tlawh.  Er Zira chuan, "Chi leh chi hnam ang zawnga rilru pu-a harsatna leh buaina siam kan awm chuan kan zavaia tan a pawi thei a ni" a ti.

Road & Infrastructure Development Board Vice Chairman leh Mamit bialtu MLA Er H Lalzirliana hi  4IR Deputy Commandant Lalthakima Ralte chuan lo dawngsawngin IR Constable pahnih te chunga thil thlen dan khawtlang hruaitute nen an sawiho.

Pu Zira Chuan Corona virus(Covid-19) hrileng mekin, Mizorama a lo luh lohnana Zomuantlanga khua a duty 5IR Constable pahnih Zairemmawia leh C.Lalhruaitluanga te'n misual kut an tawrh chungchângah a hmun ngeia tlawhin thil thlen dan kimchang Zomuantlang khawtlang hruaitute leh Force lam hruaitute nen an sawi ho.

Bialtu MLA chuan min vênghimtu tur sipaite misual te'n kut an thlâk rawn chu pawi atih thu a sawi a. Khawvelah hripui hlauhawm tak a leng mek a, mitin kan buai em em laiin suahsual rawngbawl pâwl kan awm hi pawi hle a, tûn ang boruak rit tak kan hmachhawn mek laia, hnam ang zawng emaw chi leh chi anga lo buai hi a hun lo a, hnam inpumkhatna tichhe zawnga buaina chawkchhuak an awm a nih phei chuan an demawm hle ang a ti.

Pu Zira chuan khawthlang fate chu hnam hrang hrang awmkhawm, India hnampa Mahatma Gandhia'n pangpar huan mawi tak tia, sawite zînga mi kha kan ni a. Inlungrual leh inngeih tlang taka khawsaho tur leh tawrh a tul huna tuar tlanga, tanrual a huna tangrual tur kan ni a. Chi leh chi hnam ang zawnga rilru pu-a harsatna leh buaina siam kan awm chuan kan zavaia tan a pawi thei a ni ti. Heng hunah hian thudik tawk lo Social media hmanga vawrdarh awm thin chu a pawi em em, kan ram leh hnam pumkhatna ti chhe zawnga thuchhuah leh sawilo tura fimkhur a tul thu a sawi bawk. Zomuantlang khaw tan hian Covid- 19 hrileng do nana hmanrua bakah ei leh in tur a hlan nghal bawk a ni.

Covid-19 hrileng dona kawngah mitinte kan pawimawh em em veka, kan zavaia himna turin, Force lam, khawtlang hruaitu, VLTF- te chhun zana mahni inlumah pawh awm theiloa riakchhuakte, vengchhung theuha duty-te, an hah em em a, chutiang taka duty hahte kan tawiawm theihna chu mipuite'n thuawih taka sawrkarin dan a siamte zawm theuh turin Bialtu MLA hian bial mipuite a ngen nawn leh a ni.

Er H Lalzirliana hian bial chhûng khaw thenkhat tlawh nghalin  khawtlang dinhmun leh harsatna an neihte khawtlang hruaitute nen sawiho zui nghal a ni a. VLTF- te tanpuina pawisa bakah mipuite hnêna sem tur mamawh hrang hrangte  a hlan nghal bawk a.Tuipuibari leh Andermanik khua thlipuiin In a tih chhiat chhungkaw sâwm hnênah Chhawmdawlna pawisa leh silpouline a pe bawk a ni.

Bialtu MLA hian Rajiv Nagar khua-a Nl. Rohmingthangi, Memorial Mission Compound leh School tlawh nghalin tanpuina a hlan a. New Kawnpui 5IR Duty-te tan Rs 5000/- a hlan nghal bawk a ni.