Aizawl | April 23, 2020: Prime Minister, Pu Narendra Modi-a kaihhruaia nimin-a Union Cabinet thukhawm chuan COVID 19 dona lama hmalakna "India COVID-19 Emergency Response and Health System Preparedness Package" atana sum ruahman thahnem tak cheng vaibelchhe 15,000 an pawm a. He sum ruahman hi hlawm thum a hman tura pekchhuah a ni dawn a. COVID 19 emergency Response atan a tul leh mamawh anga hman nghal theih tur cheng vaibelchhe 7,774 dah a ni a, a dang erawh chu medium term support (kum 1 atanga kum 4 chhung) atana mission mode approach ang a hman tura dah a ni.
He package hnuaia hmalakna tur langsar zingah hian India rama COVID 19 darh zau tur leh darh chak tur venna atana emergency response thuam chak a tel a. Hemi atana hian COVID kai zawn chhuahna tur leh a enkawl bikna tur treatment facilities din te, medical equipment pawimawh leh COVID 19 kai damlo enkawlna atan a damdawi mamawhte centralised procurement ang zawnga lak theih tura ruahmanna siamte, natna hrileng thei laka invenna leh a lo len palh a lo inralring thei tura rampum leh state health system-te thuam chakte, laboratory din leh natna zawn chhuah lama hmalakna tih chakte, ram mipuite biological substance hlauhawm laka venghim thei tura bio-security lama inbuatsaih that te, hripui leng zirchianna neihte leh natna thlen thei nunphung lam chi ah te mipui vantlang bengvar zawk a siamte a tel a. Heng hmalakna tur leh ruahmanna te hi Ministry of Health and Family Welfare hnuai a kalpui tura tih a ni.
A thawhkhatna hnuaiah hian Ministry of Health & Family Welfare chuan a kaihhnawih ministry-te puihna in hmalakna thahnem tak a lo kalpui tawh a:
He package atang hian State/UT -te hnenah additional fund cheng vaibelchhe 3,000 pek chhuah a lo ni tawh a. Hei hi COVID enkawlna tur bik damdawiin, COVID enkawlna tur bik Health Center leh COVID enkawlna tur bik Care Center atana health facility neihsate thuam chakna atana tih a ni a. Inkaihhruaina kimchang, inkhunghran (Quarantine), Isolation, testing, in enkawlna, natna darh tur venna, hmunhma then thianghlim, midang nena inhlat a awm/social distancing leh a zawnchhuah lam hnathawh (surveillance) chungchanga protocols leh kalpui dan turte siam a ni tawh a. Natna darhna hmunte zawnchhuah ni tawhin a darh zel tur venna atan ruahmanna te pawh kalpui mek a ni tawh a ni.
A natna hrik enfiahna laboratory te pawh tihlen a ni a. Nitinin test theih zat hi a tam chho mek zel a. Hemi bakah hian National TB Elimination Programme hnuaia natna hrang hrang test theihna hmanrua pawh hman tangkai a ni a. COVID 19 test hi tihzauh theihna turin diagnostic kit nuai 13 order tawh a ni.
Community Health Volunteer (ASHA-te) tiamin damdawi lama thawktu health worker zawng zawngte chu "Pradhan MantriGaribKalyan Package: Insurance Scheme for Health Workers lighting COVID-19" hnuaiah insurance tihsak vek anni a. Personal Protection Equipment (PPE), N95 masks leh ventilators, testing kits leh inenkawlna damdawite sorkarlaipui atang a pek chhuak mek a ni.
Sum ruahman atang a a tam ber hi emergency response thuam chakna atan a hman tur a ni a. Rampum huap leh state health system tihhmasawnna atan te, hripui leng zirchianna lam leh multi-sector national institutions leh One-health lam hawi hmalaknate, vantlang tihbengvarna lamte, risk communications leh implementation te, management, capacity building, monitoring leh evaluation lam atana hman tur a ni a. Ministry of Health and Family Welfare chu he package hnuaia sum hman theihte hman dan tur leh implementation agencies hrang hrang (National Health Mission, Central Procurement, Railways, Dept. of Health Research/ICMR, National Centre for Disease Control) te hnena mamawh anih dan ang zel a sem rual chungchangah thuneihna pek a ni.
- PIB Aizawl
Post a Comment
He post chungchanga i ngaihdan lo sawi ve rawh: