BREAKING NEWS: Mizoram Speaker hlui Hiphei a boral

Aizawl | April 8, 2020: Mizoram politician lar leh hlun, Mizoram Assembly Speaker hial lo ni tawh Hiphei (82) chu tukin dar 7:45 khan Civil Hospital, Aizawlah a boral.


Mizoram Legislative Assembly-a Speaker leh Deputy Speaker hlui Hiphei hi Aug 13, 1937-ah a piang a; Congress party-a a awmlaiin Speaker leh Deputy Speaker a nih tawh bakah Rajya Sabha MP-ah áš­um hnih (1990 & 1996) a lo tling tawh.



Kum 2018 khan Congress chhuahsanin BJP a zawm ta a ni.

Mizoram BJP chuan thuchhuah siamin Hiphei an ui thu an tarlang. An thuchhuah chuan, Mizoram tan leh Mizo hnam tan hna alo thawh tawh na te, ILP kan neih zel theihna tur a Rajya Sabha (MP) anih laiin, Assembly session anneih naah ILP chungchanga state dang ten Mizoram a ILP neih hlip tur a an tih laiin, Pu Hiphei hian thiam takin ILP kan neih theihna tur in thu tha tak a sawi a, chuvang chuan tun thleng hian ILP kan neih chungchang ah harsatna kan nei tawh lo te hi Mizoram tan chuan a lawm awm in a hlu kan ti hle a ni. MLA ah tum 7 ngawt thlantlin niin, Minister leh Assembly Speaker ani tawh bawk a, amah ang a pa fing leh rem hria thluak tha hi mizo zingah hian kan tam awm lo ve, tin Mizoram tan mai bakah Siaha District tan a, Pa nih tling tak a ni leh Mara mipui phei chuan an hnam Pa ang hial a an chhal kan chan ta mai hi apawi kan tiin, kan ui tak zet a ni," tiin a tarlang.


Hiphei hi 1990 leh 1996 khan Indian National Congress Party ticketin tum hnih atan India Parliament-ah Rajya Sabha Member of Parliament (MP) atan Mizoram atangin thlan tling a lo ni tawh a. He dinhmun hi 1990 atanga 1996 leh 1996 atanga 2002 thleng a chelh a ni.

2013 khan Palak constituency atanga Mizoram MLA atan thlan tlin leh niin Mizoram Assembly-ah Speaker dinhmun a chelh a, he nihna zahawm tak hi November 5, 2018 a banna a thehluh a, a hnu darkar reilote-a BJP a a luh hma zawngin a chelh a ni.





Hiphei hi India Parliament MP a nih bakah Mizoram MLA niin, Speaker a ni a, Mara Autonomous District Council-ah Member of District Council atan thlan tlin lo ni tawhin, chairman dinhmun hial a lo chelh tawh a ni.

7th Mizoram Legislative Assembly a, Speaker lo ni tawh Hiphei hi August ni 23, kum 1937 khan Siaha district a Chapui ah a lo piang a, a pa chu Pu Zate (L) a ni. Thiamna lamah I.A a ni. Politics ah a lut hma hle a, Indian National Congress Party atangin a hun tam tak ram rawngbawl nan a hmang a ni.

A nupui Pi Sathlie nen fanu 2 neiin; Chaltlang ah an khawsa a, Siaha ah an inpui a awm. Lehkhabu chhiar hi nuam a tiin; a hriatna a zau tha a, a hunawl hman dan ber pawh a ni. Mizoram sawrkar inrelbawlna hrang hrang District Council atanga Union Territory, State kan nih kum 30 hnu ah pawh Active Politics ah a a inhmang hle a.

Pu Hiphei hi Politics ah hian a zinkawng a tluang hle a, Inthlanah a tling thei em em zel a ni. MLA ah hian kum 1972, 1978, 1979, 1984, 1987, 1989 leh 2013 ah te thlantlin niin; tum 7 ngawt MLA ah thlan tlin a ni tawh a ni. India Parliament Rorelna sang, Rajya Sabha ah term 2 - kum 1990-1996 leh kum 1996-2002 inkarah te khan M.P a ni bawk.


Hiphei hi pa thluak tha leh titi thiam, hriatrengna (memory) nei tha tak niin, date leh events te chhinchhiah thlap a, hre zui reng thei mi a ni, a bula awm a nuamin presence of mind nei tha tak a ni bawk. Khawvel hmun zau zawk a fang hnem tawh hle. USA, U.K, France, Egypt,  UAE, Israel, Switzerland, Barbados, Myanmar, Singapore, Hong Kong leh Japan ah te a zin tawh a ni. Kum 2018 Assembly Inthlan dawnah khan BJP a zawm a, BJP Mizoram Pradesh ah hian Core Committee Member nilai a ni. Kum 2020, April ni 8 hian chatuan ram a lo pan ta a ni.

with Input from - V. Lalnunthara (Mathara)



EXPLORE MIZORAM
email: admin@exploremizoram.com

Instagram: https://www.instagram.com/exploremizoram

(A hnuaia fakna hi lo hmet ve rawh.)

Post a Comment

0 Comments