ZONUN ZEMAWI CHAWISAN

-✍🏻 Vidpuia Hrahsel

Zo hnam te, hnam dang laka kan hranna leh kan danglam na hi eng nge ni ang le? hnam a min siamtu Pathian hian hnam hrang hrang te, hi ze hrang hrang, chin dan hrang hrang nei ṭheuh in min din a. Mizo Hnam kan vanneina em em chu Nun ze mawi neitu Isua Krista hian hringnun ze mawi tak min hnutchhiah reng mai hi a ni. Mizo Hlaphuah thiam Dr Ramdinthara Sailo pawhin a hla ah :

Ṭhuro iang zaidam nunnem,

Kan thinlung rawn luah khat la;

Nun ze mawi, Lal Krista nun mawi tak kha,

Ni tin min zirtir ang che.

tiin a lo phuah tawh a, min siamtu Lal Isua, mi nunnem leh zaidam, nun ze mawi tak neitu hian, kan hnam min hmangaih zia hi a hriatchhuah loh theih loh ṭhin. Zonun Zemawi chu eng nge ni ang le?. Mihring nundan mawi, kan pi leh pute aṭanga kan chhawm Tlawmngaihna, Aia Upa Zah, Rinawmna leh Huaisenna te hi Mizo Rohlu, Zonun zemawi ti lang tu, hnamdang te laka kan danglamna, mizo nih ti nuamtu, kan khawtlang leh mihring nun ho na, ti nuamtu leh Isua Krista nun ze mawi tak kan zir thar zel na a ni mai awm e.

Khawvel a thil nung tinreng te hi, in mamawh tawn vek kan ni a, tu pawh mai hi, mahni te mai chuan kan khua a har mai ṭhin, tlai na tur kan zawng ṭheuh a, midang kan mamawh ang bawk hian, an ni pawhin min mamawh hun a awm, Pathian thu aṭanga kan hmuh pawhin, kawp tura duan kan nih zia chu hai rual a ni lo e. Kan Pi leh Pute hunlai khan, mi tlawmngai tak tak te kha chawimawina Nopui an dawm tir ṭhin a, an in chawimawi dan hi a hunlai khan a ropui khawp ang le, tlawmngaihna hi hnamdang te neih ve loh, Mizo rohlu a ni a, sapṭawng pawhin a awm lo. A hrilhfiah theih dan ber chu, midang te tana inpek emaw thil ṭha tih tiin. Mi tlawmngai te hi chawimawi an phu a, kan chawimawi deuh deuh a, kan chawisang deuh deuh a, kan ngaihsan chuan zonun zemawi kan chawisang zel mai dawn a ni.

Zonun Zemawi tak hi chawisan angaih tak mai chhan hi eng vang nge ni ang le? He nun zemawi tak, chhawm nung a, nunpui tur hian keimahni ṭheuh kan pawimawh a, midang te kawhhmuh tu, a ṭha lam zawnga midangte hnena lantir a, kan nitin nun a, he zemawi tak hi kan sengluh a, kan pai a ngai. Zonun zemawi hi paidam ngawt chi a nilo a, ze nghet tak kan put a, kan thinlung a, tuh ngheh ringawt hi a tawk lo, a taka a lantir huna kan lan chhuah tir te, Zonun Zemawi par chhuah tir tur chuan taimakna te, huaisenna te, beihna te hi a va ngai em. Kan Pi leh Pute zemawi hi kan kal san ngawt chuan ṭhangthar ten min dem mai dawn, Mizo hnam lo la awm tur zel ten, kan hnam zemawi tak, an chawisan a, an inchhuan lah theih nan nang leh kei hi kan va pawimawh teh lul em.

Zonunmawi tiin, Pu Zirsangzela Hnamte khan Mizo te tan hla mawi tak, Zonunmawi chuai mai atan a phal loh thu a phuah a, a hla chang thumna ah khan :-

Mizo nih mai hi a tawk lo

Ram hmangaih mai a tawk lo,

I nun ah Zonunmawi lar chhuak ngei rawh se.

Zonun Zemawi chhawm nung a, chawisang tur chuan i nun ah khan i ti lang tur a ni tiin a phuah a, Mizo nih ringawt hi a tawk loh zia a tarlang a, Mizo kan nihna anga, kan tih tur chu kan Pi leh Pute Zemawi kan chhawm nun zel te, Tlawmngaihna lantir huna, tlawmna nun neih te, huaisen angaih huna huaisen ngam turin min fuih a ni. Mizo Hla Phuah thiam hmasa te khan kan ram tan hian sulhnu ṭha tak an hnutchhiah a, kan ram tan eng nge ka tih ve theih ang tihna rilru an pu a, an hmangaih a, zonun zemawi an nunah an vul tir kha an ngaihsan awm in, an va hlu tehkher em. Chawisan phu te chawisang a, chawimawi zel turin keini Mizo Ṭhalaite hi inzir zel ang u.Pu Liandala khan 'Pi Pute Rothil Hlu' chu Aia Upa Zah hi a ni tiin a sawi a, rangkachak ai pawhin a hlutna a tehkhin hial, chu aia upa zahna chu vanhnuai hring mi cheng te awm dan tur reng a ni a, aia upa te kan zah chuan nunmawi min put tir a, mizo nih a ti nuam a, kan la tawn ve vek tur anih avangin ṭhangthar te chu aia u te biak dan tur thlengin a hla ah chuan a ziak nghe nghe. Aia Upa Zah tih hi sawifiah kher a ngailo awm e. Kan nun ṭheuh ah, kan aia u te kan zahthiam a, mizo nun ze mawi hi khawvel changkanna hian a herliam pui mai loh na turin keini hi kan va pawimawh em. Inzirtirna leh inhrilhriat tam kan mamawh a, zirna in leh chhungkaw tin ah he kan pi pu te rothil hlu hi kan inzirtir zel hi a ṭul hle.

Zonun Zemawi chawisan zel na atan chuan chhungkua aṭanga inzirtir kan mamawh, kan seilenna a zir hian, kan nungchang put te leh kan hawiher hian thu a sawi thei hle a, kan seilenna chhungkua hi a pawimawh khawp mai. Chhungkua aṭangin Zonun Zemawi hi inzirtir ṭhin ila, a va duhawm em. Chhungkua aṭangin Zirna Inah inzirtir a, ngaihsan tur dik, chawimawi tlak te chawimawi te, mizo nih nawm zia te, kan hnam ze danglamna, inhrilh tam te hian kawngro a su em em ang, Pathian thu ah pawh :-

Thufingte 22:6 : Naupang chu a kalna awm kawngah chuan zirtir ula, A upa hun pawhin a thlah lo vang.

tiin a inziak kan hmu a, kan pi leh pute hunlai angin, Zawlbuk kan nei thei tawh lo a, Zirna in hi kan tunlai khawvel a, kan Zawlbuk a ni a, hmanlai ah pawh khan naupang thing fawm rual te, tlangval te chenin, Zawlbuk kha vantlang inzirtirna hmun a ni a, tun dinhmun a, kan zawlbuk Zirna In aṭang te pawh hian Zonun Zemawi hi kan in zirtir a, naupang te hnen a kan hrilh ngun hian kawng ro a sut ka va ring em. Zonumawi tak hi par ang chul mai atan zawng, a uiawm lua e, parmawi te zawng, uaiin chul mahse, a vul leh mai a, zonunmawi a vul theih nan nang leh kei hi kan pawimawh, vul reng turin vawiin aṭang hian kan nunah lantir ṭheuh i tum zel ang u.