HRD vice chairman in Lengteng bial chhunga Covid 19 laka invenna enpui; Manipur leh Myanmar atanga luhna te khar

Aizawl | March 24, 2020: Human Resources Development Board vice chairman leh bialtu MLA ni bawk L Thangmawia chuan Lengteng bial chhunga Covid-19 laka invenlawkna leh hmalakna hrang hrangte tlawhin a enfiah.


HRD vice chairman hi Saitual District Bawrhsap VL Hruaizela Khiangte, Superintendent of Police PC Lalduhthlanga, Addl DC R Lalnghakliana, Ngopa Civil SDO Vanlaltanpuia leh Ngopa Police Station-a thawktute’n an tawiawm a. Mimbung, Teikhang, Hrianghmun, Khawkawn, Ngopa leh NE Khawdungsei khuate tlawhin Covid-19 dona kawnga hmalakna hrang hrang leh dan leh thupek kenkawh dante an enfiah.

 

Inter-State leh Indo-Myanmar ramri depa khaw hrang hrang an tlawhnaah hian Village Level Task Force hotu leh Check Gate vengtu sipai te nen inkawmhona leh an hmalak dan thlir hona neiin, tihtur leh tih loh tur hrang hrang te inhrilhfiahna neih a ni a. Venhim hna kengkawhtu Sipai leh Village Level Task Force hotute chu Manipur leh Myanmar atangin tumah Mizoram lo luh tir lo tur leh Mizoram atang pawha tumah chhuahtir lo turin an hriattir nghal bawk a ni. 

 

Tun dinhmunah Ngopa SDO Civil huamchhungah hian Check Gate 4; Khawkawn, Mimbung, Teikhang leh Hrianghmunah-te awm mekin, heng hmunahte hian Sipai leh Village Level Task Force-te an duty zel a, Manipur lam atanga Mimbung luhna hi Tuivai leiah Mimbung Village Level Task Force hmalaknaa khar phui tlat ani a. Manipur atanga Mizoram luhna dang Tuivai Lei kana Khawkawn kaltlang pawh Khawkawn Check Gate-ah dan a ni bawk.

 

 

22-Lengteng A/C bialtu MLA L Thangmawia hian sipai duty mekte tan buhfai leh pawisafai a hlan a, Saitual DC VL Hruaizela Khiangte-in Village Level Task Force-te tan pawisafai leh silpaulin a hlan bawk.

Post a Comment

0 Comments