COVID 19 | Mi 58930 endik tawh zingah Sample test tur 11 la tawh; Positive la awm lo

Aizawl | March 22, 2020: Covid 19 hri leng mekah vawiin thleng khan Mizoram-ah test tura sample lak tawh mi 11 an awm a, test tawh zingah covid 19 positive an la awm lo.

Sawrkar thuchhuahin a tarlan danin, vawiin thleng khan mi 58930 endik tawh an ni a, vawiin leh nimin khan mi  3519 an en dik a, India ram pawn atanga rawn lut mi pasarih chu khunghran an nia, vawiin thleng khan India ram pawn atanga Mizoram lo lut khung hran hi  179 an tling tawh.

Hetihlai hian India ram chhung state hrang hrang atanga nimin leh vawiina lo lut khunghran tura hriattir hi mi  582 an ni a, hei hi a tam chhan chu state hrang hrang a hna thawk leh zirlaite an rawn haw mek vang nia rin a ni. February thla atanga vawiin thlenga India ram state hrang hrang atanga Mizoram rawn lut khunghran tura hriattir tawh zat hi  1838 an tling tawh niin sawrkar website chuan a tarlang.

Khunghranna tur hi mahni in bakah sawrkarin hmun tam tak a ruatin a buatsaih tawh a ni.

February, 2020 atang khan   Lengpui Airport leh ramri-ah zin mite chu he natna an vei leh vei loh endik thin an ni.

He COVID-19 lo darh zel tur ven anih theih nan mipui te chu sawrkarin mipui himna tura a thuchhuah te zawm vek tur a ngen kan ni. Mitin ten kan khuhin kiu/ban thlepin ka kan hup tur a ni a, tui leh sabawnin fai takin kut sil fo tur a ni. COVID-19 vei awmna ram/state atanga lo haw te chu, an lo thlen  ni atangin ni 14 tal, mahni inah emaw sawrkar hmun ruat bikah khunghran tur an ni. Hei hi natna neilo te pawhin an zawm ngei tur a ni.

COVID-19 chungchanga hriat duh nei te leh khawsik, khuh leh thawhah nei te chuan Helpline no. 102(toll free), 0389 2323336, 0389 2318336 -ah phone tur a ni.

Post a Comment

He post chungchanga i ngaihdan lo sawi ve rawh:

Previous Post Next Post