COVID 19 | International border khar rih dawn: State border-ah entry point siam dawn

Aizawl | March 09, 2020: Mizoram Sawrkar chuan Covid 19 darh mek vangin Mizoram leh ram dang inrina international border te chu khar rih dawn, state border ah entry point siam a tum.

Khawvel ram hrang hranga natna hri coronavirus leng mek leh he virus in natna a thlen COVID-19 laka invenna kawnga hmalak a lo inpuahchah dan ngaihtuahin vawiin chawhnu khan Chief Minister Pu Zoramthanga hovin CM Conference Hall ah Cabinet Minister te, Chief Secretary leh sawrkara thawktu pawimawh tak tak dang thukhawmin Mizoram leh ram dang inrina international border te chu khar rih ni se tiin an rel.

Meeting hian Chief Secretary kaihhruaina hnuaia task force din ni se tiin, department hrang hrangte nen a tanghovin COVID-19 laka invenna kawnga hmalakna te chu state level ah a bawhzui dawn a ni.

Meeting ah hian Mizoram leh ram dang inrina international border te chu khar rih ni se tia rel a ni a. State dang pathum te nen a inrina hmun hrang hrang zingah entry point siam niin, chungte chu Assam nen inrina Bairabi leh Vairengte, Manipur nen inrina Khawkawn leh, Tripura nen inrina Kanhmun a ni a. Heng entry-point ah hian enfiahna, screening ukul taka kalpui a ni ang a. Heng hmunah chauh hian state chhung luh phal a ni ang.

Mipui himna tur ngaihtuah a nih laia mipui mamawh hrang hrang lo chheprelh te, thil man lo ti to vak vak te chu dan anga an chungthu ngaihtuah reng theih a nih thu vawiin meetingah hian sawi a ni a. Task Force hmalakna in Police te leh FDA te nen tangkawpin thil man leh supply dinhmun thlithlai reng a ni ang.

Khawvel hmun dangah hri leng hi a tam avangin India khua leh tui nilo, foreigner te chu Mizoram an lo luh phal rihloh mai ni se tiin vawiin meeting chuan a rel a. Foreigner bakah state dang atanga lo lut turte pawh chakkhai phur tur te leh ei leh bar atana pawimawh te chu uluk taka enfiah an nih hnu ah ILP pek an ni ang a. Chutiang mi nilo chu ILP pek rihlo tur niin, labourer tur pawh Mizorama awm mek an nih loh chuan mi thar lo lut tur, new entry chu ILP pek rihloh ni se tih a ni.

Lengpui Airport a screening tih mek chu uluk leh khauh taka kalpui zel bakah, natna hri pai nia rinhlelh te dah hran a enthlak a tul hlauh hun atan Lengpui Tourist Lodge chu ‘Quarantine Camp’ atan buatsaih tura rel a ni.

Vawiin meeting chuan mitin te loh theihloh thilah lo chuan fimkhur thu hlaah puipunna a tel tamloh ni se a ti a. Mizoram pawn a zinchhuah pawh theihna chin chinah tih tam loh ni se tiin mipui a chah bawk.

Natna hri vei hmuhchhuah an awm hlauh thula anmahni hnaih a lo awm te chhuichhuah, "contact tracing" awlsam zawk nen khualzin sumo leh bus ten an customer te hming leh contact number leh address kimchang zawk dah tha vek tura hmalak a ni dawn bawk.

He natna hrileng laka invenna tur atana mamawh hrang hrang awmte chu health department hmalakna in ruahmanna siam ni se tia rel a ni a. Hmalak zelna turah, a bik takin ramri dep khaw hrang hrangah te in hrilhhriatna nei a vil turin a khawtlang hruaitute leh NGO te chu police, BSF, Assam Rifles te nen tangkawpa hmalak ni se tia rel a ni.

COVID-19 chungchangah hian thuthang diklo a tam avangin Principal Director, Health Department atanga Information & Public Relations Department kal tlanga thu chhuak a nih loh chuan Mizoram-ah he natna chungchang thuthang dang reng reng chu thutling ah pawm tlak a nih loh thu sawi a ni bawk.

Chief Minister Pu Zoramthanga chuan COVID-19 laka invenna kawngah Mizoram sawrkar chuan theihtawp chhuahin hma a lak zel tur thu a sawi a. Vawiina ruahmanna siam te chu invenna hmanrua a nih angin mipuiin buai phah na atan an hmanloh a duh thu a sawi.

Health Minister Dr. R. Lalthangliana chuan kumin January thlaa COVID-19 chungchanga meeting neih a lo nih tawh thu te leh department in hma a lo lak tawhna hrang hrangte a tarlang a. State Level Training neih thuai a nih tur thu leh district hospital hrang hranga isolation ward buatsaih dan chungchangte a sawi.

Mizoramah hian COVID-19 hi case hmuhchhuah a la nilo a. Ramdang atanga lo zin haw dahhran a enthlak (home quarantined) hi mi 67 awm tawhin, an zinga 6 chu natna an neih loh avangin quarantine atan hian an chhuak tawh a ni.

- DIPR