ZORO Thalaiin Zo Hnam inpumkhatna chungchangah seminar buatsaih dawn

Aizawl | Feb 4, 2020: ZORO Thalai chuan Zo-Hnam inpumkhatna tih thupui hmangin seminar neih an tum a. Mizoram kohhran hrang hrang te hnenah Zo Hnam inpumkhatna leh insuihkhawm chungchangah a tul anga hma lo la ve tura ngenna lehkha pek leh Aizawl khawpui college leh Higher Secondary School hrang hrangah awareness campaign nasa lehzuala neih an tum.

He thu hi Vawiin a ZORO Thalai Headquarters Aizawl chuan ZORO Office Treasury Square-a meeting ah relin, he meeting hi Tv Zohmingthanga Zote Vice President in kaihruai a, Pu Michael Lalramsanga Vice President in hunserh a hmang a ni. Meetingah hian ZORO President R Sangkawia leh ZORO Thalai President Tv L Ramdinliana Renthlei  ten thu an sawi bawk.

Seminar hi ni 17th February 2020 hian CYMA Hall Tuikhuahtlang ah neih tura rel a ni a. Zo hnam inpumkhatna seminar ah hian paper present turin Pu Jangkhongam Doungel Professor, Department of Political Science and Director, Internal Quality Assurance Cell(IQAC), MZU chu ruat a ni bawk. Tin, Mizoram kohhran hrang hrang te hnenah Zo Hnam inpumkhatna leh insuihkhawm chungchangah a tul anga hma lo la ve tura ngenna lehkha pek leh Aizawl khawpui college leh Higher Secondary School hrang hrangah awareness campaign nasa lehzuala neih nise tiin an rel bawk.

ZORO Thalai President L Ramdinliana Renthlei  chuan, “ZORO hi Political Party a ni lo a, ZORO chu Zofa khawvel hmun hrang hranga awm te rorelna pakhat a kan awm theih nan a bei tu leh Zofa khawvel hmun hrang hrang a awm te kan inpumkhata kan insuihkhawm theih nan a hmala tu a ni a, Zo-Hnam Politics tak tak tana thawktu leh bei thin tu a ni.”a ti a.

L. Ramdinliana Renthlei chuan, “Aizawl ah hian kan unau kan chipui thenkhat ten Duhlian tawng an hman loh avangin endawng leh nuihzat an hlawh thin a hei hi tha lo kan ti hle a, hetiang unau leh unau inkarah in nuihzatna leh in endawngna a thlen tawh loh nan hmalak kan tum dawn a, tawng avanga in unauna bo a ni lo a, thisen avanga in unau zawk kan ni tih hriattir zel thalai te ah kan tum a ni.” a ti bawk.

•• Website a Fakna lo lang i click apiang khan Explore Mizoram kal zelna atan tha i thawh ve a ni. ••

•• Post hi link nen i lo share ve zel dawn nia. ••