MZU Southern Campus academic session tharah tan hman tum; Pukpui VC in ram pe, Temporary Campus atan Mizoram Engineering College

# MZU Southern Campus academic session tharah tan hman tum; 

# Pukpui VC in ram pe, 

# Temporary Campus atan Mizoram Engineering College

# MZU Southern Campus, Lunglei leh Eastern Campus, Champhai rawtna thlen zingah HRD in Southern Campus, Lunglei din phalna a rawn pe

# MZU campus Tanhril compensation vangin buai hrep

Aizawl | Feb 4, 2020: Higher & Technical Education Minister Dr R.Lalthangliana chuan academic session tharah MZU Southern Campus zirna kalpui turin bultan nise, Temporary Campus atan Mizoram Engineering College, Pukpui chu hman theih a nih a beisei thu a sawi.

Ministry approval la tura pawimawh hmasa ber pahnih ram pekna lehkha leh temporary campus hman tur a awm thu chu a rang thei ang bera tihfel a nih tur thu sawiin Mizoram sawrkarin a tih tur ang ang chu a ti nghal dawn a ni a ti a. Mizoram Chief Minister Pu Zoramthanga pawhin a phurpui hle a ni tih sawiin temporary campus luah tura Mizoram Sawrkarin a tih la ngai campus panna kawng siam, tui leh electric pek leh staff transit accommodation sak chungchang pawh cheng vaibelchhe 11 senga tih tum mek a nih thu a sawi.

He thu hi vawiin a amah hova Mizoram Sawrkar hotute leh Mizoram University hotuten Secretariat Conference Hall, MINECO ah Mizoram University Southern Campus din dan tur chungchang an sawihona ah sawiin, he hunah hian Mizoram Youth commission Chairman Pu Vanlaltanpuia, Bamboo Development Board Vice-Chairman Pu K Pachhunga, MLA leh Higher & Technical Education department hotulian ten an tawiawm a, Mizoram University atang an Vice-Chancellor Prof. KRS Sambasiva Rao hovin Head of Departments hrang hrang leh officer te an tel a ni.

Vawiin sawihona ah hian Mizoram University Southern Campus bul tan tura thilpawimawh hrang hrang leh hmalak hmasak tul te tarlan a ni a. Prof. K.R.S. Sambasiva Rao chuan Mizoram University Southern Campus nei tura hmalak a nih dan sawilangin Secretary, Ministry of Human Resource Development hnenah lehkha vawi engemawzat thawn a nih thu leh Higher & Technical Education Minister Dr. R. Lalthangliana pawhin ngaipawimawh a lehkha thawn thu a sawi a. Mizoram University Southern Campus, Lunglei leh Eastern Campus, Champhai rawtna thlen zingah Ministry of Human Resource Development chuan Mizoram University Southern Campus, Lunglei din phalna a rawn pe ta tih a sawi a ni.

Prof. Rao chuan Mizoram University Southern Campus chu hmathlir thui tak nei chunga bultan a pawimawh tih sawiin hmunhma tha leh zau tha tak an mamawh dawn a ni tih a sawi a, a rang thei ang berin ram pekna “Land Allotment” lehkha leh Campus sak fel a nih hma a course kalpuina tur hei hi Mizoram sawrkar kut a nih angin hma lak ni nghal thuai se a duh thu a sawi a ni.

Pu Vanlaltanpuia, Mizoram University Southern Campus dinna tura ruahmanna hmun Pukpui awmna bialtu MLA ni bawk chuan Pukpui ram chhunga zirna in thar engemawzat din tawh a nih thu leh din mek a awm nual bakah tunah Mizoram University Southern Campus din tum a ni lehzel chu lawmawm a tih thu sawiin Pukpui Village Council hotute pawhin lawm taka ram acre 100 aia zau an pek nghal phal thu a sawi a, Pukpui chu Chhim lama zirna hmunpui a nih dawn thu leh Mizoram tana malsawmna thlentu a nih a beisei thu a sawi a ni.

Bamboo Development Board Vice-Chairman Pu K Pachhunga, MLA pawhin Lunglei a Mizoram University Southern Campus dah a nih theih nan thanghnih lian zet chu hma lak a nih tawh thu leh amah ngei pawhin theihtawp a lo chhuah ve thin thu sawiin a hlawhtlinna tura Lunglei mipuite, khawtlang hruaitute leh Mizoram University thuneitute thawhrimna ah lawmthu a sawi a ni.

Mizoram University official te chuan Mizoram University Southern Campus tihhlawhtlinnan theihtawp an chhuah dawn thu leh hemi rual hian sawrkar Laipuiin dan zawm tur a siamte an zawm ngei ngei a tul thu an sawi a, hmabak thui tak a la awm thu sawiin sawrkar laipui dan ah chuan University dinna hmun tur chu a thlawn a pek an nih tur a ni tih an sawi rualin Mizoram University, Tanhril din anih dawn tuma an buaina tawh ang kha tawk tawh lo tura an inbeisei thu an sawi a, Mizoram University hotute chuan Mizoram University din a nih dawn in Tanhril Village Council-in a thlawn a ram an pe ni a an inhriat laiin hma an lak tak tak meuh chuan mimal ram deuh vek a lo nih thu leh compensation vanga an buai hrep thu te, Sawrkar Laipui pawh a lungawi loh thu leh an tan pawh a zahthlak hle a ni tih an sawi a, hetiang hi a thlen tawh loh an beisei thu an sawi chu bialtu MLA Pu Vanlaltanpuia chuan chhangin an fimkhur thu leh chutiang harsatna chu a awmloh a beisei thu a sawi a ni.

Mizoram University official te chuan Pukpui khawtlangin Campus dinna tur ram tha tak an pek theih dawn avanga an lawmthu an sawi rualin hmathlir thui tak an nei tih an sawi a, University tha leh changtlung din turin a lo berah a ram acre 150 tal an mamawh a ni an ti a, Sawrkar Laipui chuan Mizoram sawrkar in a ngaihpawimawh dan an thlir reng dawn a ni an ti bawk.

Hei bakah hian University a Course kalpui tur chungchangah fimkhur a tul thu sawilan niin Course zirtur thlan rual hian India sawrkar hmalakna pui pakhat “Act East Policy” pawh rilru a ngaihtuah tel a tul thu te, Course lar leh tlanglawn ringawt ngaihtuah lova Mizoram tana tangkaitur leh Mizoram Mipuiten kan hlawkpui tur thlan apawimawh tih sawilan niin uluk taka inrawn tlan a pawimawh thu an sawi a ni.

•• Website a Fakna lo lang i click apiang khan Explore Mizoram kal zelna atan tha i thawh ve a ni. ••

•• Post hi link nen i lo share ve zel dawn nia. ••