MIZORAM POLICE-IN A THLAWNIN SUZUKI GIXXER SF 250 PANGA A DAWNG

Aizawl | Feb 15, 2020: Suzuki Motorcycle India Private Limited (SMIPL) chuan Nimin (Feb 14) khan LBS Suzuki Showroom, Bawngkawnah Mizoram Police Traffic unit leh CID unit ṭanpui nan Suzuki Gixxer SF 250 panga a hlan.


SMIPL Head of Institution Sales, Pu JS Rathore San chuan Traffic Senior SP Pu Rodingliana Chhawngthu leh CID (SB) Senior SP Pu K Lalremsanga hnenah chahbi a hlan a, thilpek inhlanna an ziak fel nghal bawk.


 SMIPL chuan a hranpa liau liauin pilot bike changkang leh ṭha tak a duang a, Mizoram Traffic Police hnenah pathum a hlan a ni. CID unit hnenah ṭangkaia an hman turin Gixxer SF 250 pahnih a pe bawk a, bike panga an pek hlut zawng hi cheng nuai sawm vel a ni.


Pu Rodingliana chuan Mizoram Traffic Police-ten an mamawh em em pilot bike ṭha leh changkang tak a thlawna an nei thei ta mai chu malsawmna hlu tak a nih thu a sawi a, LBS Suzuki-in hma a lakpuina leh SMIPL chungah lawmthu a sawi.


Pu Remsanga chuan CID unit-ten an phu loh thilpek an dawng nia a hriat thu a sawi bawk a, mi sual umna turin bike chak tha leh changkang an nei thei ta chu hmasawnna a ni, a ti.


LBS Suzuki Managing Director Pu H Ngurdingliana chuan company-in Corporate Social Responsibity (CSR) scheme a kalpui mekah Mizoramin hlawkna a tel thei chu thil lawmawm tak a nih thu a sawi a, sorkar department ṭanpui nan leh vantlang nun a lo him thei nen Police department hnenah thilpek hlan a ni, a ti.

Pu Ngura hian an company-in CSR a kalpui mek aṭangin ṭanpui ngai leh chhawmdawl ngai bakah, mipui vantlang mamawh leh ṭangkai siamna turin sum an hmang chhuak thei dawn tih a puang bawk a ni.

Input from - Marova Colney

Post a Comment

0 Comments