Aizawl | Feb 3, 2020: Mizoram Governor PS Sreedharan Pillai chuan vawiin khan kumin Republic Day a Literature huanga Padma Shri Award dawngtu C Kamlova, Salem Veng, Mualpui Tlang, Aizawl a cheng mek, Hindi tawnga thuziaktu leh Mizorama Hindi tawng zirna kawnga thawh hlawk tak chu Raj Bhavan-ah lenglutah sawmin thingpui ruai nen a hlawhtlinna a lo lawmpui a. Lawmpuina thuziak bakah tangkafai a pe tel bawk a ni.
Padma Shri Award hi India khua leh tui mi chhuanawm leh hnathawktha chungchuangte chawimawina sangber zinga mi a ni a, Bharat Ratna leh Padma Vibhushan leh Padma Bhushan tih lohah chuan ngaihhlut ber a ni a. Kumin hian Pu C.Kamlova, Hindi tawnga Thuziakmi chuan he lawman hi Pu Ramnath Kovind, President of India hnen atangin a dawng dawn a ni.
Governor PS Sreedhara Pillai chuan India ram mipui Vaibelchhe 134 zingah Mizoram mi pahnih India rama vantlang inchawimawina sang ber pali dawngthei kan ni hi thil ropui tak a ni a, a chhuanawm em em a ni a ti a. Pu C.Kamlova chu hunrei tak chhung Mizo ten India rama tawng tlanglawn ber Hindi an thiam theihna tur hmalatu a ni a ti a. Governor chuan khawi hmunah pawh mahni pianpui tawng(mother Tongue) a pawimawh ber a, India ram bikah chuan National language – Hindi hi a pawimawh chho zel si a; mipui ten thiam kan tum zel pawh a ngai a ni a ti. C Kamlova chu a hnathawh that te Rastrapati Bhavan in an lo hriat saka an chawimawi chu thinlung takin a lawm pui tih a sawi a. A hawlhtinna chu Mizo mipui zawng zawngte hlawhtlinna leh hmingthatna ni a ti a. Padmashree chawimawina dawng phak hi India ram state dangah te an ngai hlu hle a; hetiang lawman dawngphak michhuanawm tak tak Mizo ten kan nei hi inchhuanna chang kan hriat a, a dawngtute ngaihsanna chang pawh kan hriattel a a ngai a ni a ti. Padma Shri C Kamlova rawngbawlnaah hian Hnam inpumkhatna atana tangkai tak Hindi zirtirna chu Mizoramah a hlawhtling chho tan mek tih a sawi a. C Kamlova chu a thuziak te chhunzawm zel tur leh Hindi tawnga Mizo Literature pawimawh te dah kawngah theihtawp chhuah chhunzawm turin a chah a ni.
Padma Shri C Kamlova pawhin a lawmman dawn chungchangah a hmasa berin Pathian leh mipuite hnenah lawmthu a sawi a. A suangtuah ngai miah loh chawimawina a dawn avang leh a beisei ngai loh Governor lawmpuina leh duhsakna Raj Bhavanah a dawng chu thinlung takin a lawm a ni a ti. A theih ang tawka Hindi Literature huanga Mizo te tan hmahruaitu zingah a tel thei chu vannei a in tih thu a sawi a. Hindi tawng hmanga hnam inpumkhatna kawngah a theih anga hma lak chhunzawm zel a tum thu a sawi a. Pu C.Kamlova hian Governor hnenah a lehkhabu ziak 4 leh a hlaphuah 2 a pe nghal bawk a ni.
Post a Comment
He post chungchanga i ngaihdan lo sawi ve rawh: