ZORO IN CHIN-LUSHAI CONFERENCE VAWI-128NA HMANG

Aizawl | Jan 29, 2020: Vawiin ni 29th January, 2020 chawhma dar 11:00 khan MCCI Conference hall, MUP Building-ah Chin-Lushai Conference vawi-128na neih a ni a. He hun hi Pu Michael Lalthanmawia Treasurer in a kaihruai a, Pu R. Sangkawia President leh Tv. L. Ramdinliana Renthlei Thalai President ten thu an sawi bawk a ni.

He huna thusawitu ZORO President Pu R. Sangkawia chuan, "UNO hian keini ang Tualto hnam te min siamfel a, kan dinhmun leh kan chanvo dik tak kan chan theih nan hian tha leh sum a seng tam tawh hle a. Tualto hnam te dinhmun siamfel tur hian UN hian kum 10 dan zelah a buaipui tu tur a siam a, tuna kan dinhmun mek hi a vawi 3 na leh a final na a ni a. Kum 2024 hi a hun tawp a ni a, 2024 hma hian keini Zofate pawh kan inbuatsaih a ngai a ni. Hemi tur hian theihtawp kan chhuah tlan a ngai a ni."a ti a. 

R. Sangkawia chuan, "CAA hi ZORO chuan kan duh lo a, Sakhaw tih bikna dan hi kan duh loh avangin Human Rights Council ah lehkha kan thehlut a. Human Rights Council pawhin kan lehkha thehluh an hmuh thu min lo hrilh tawh a ni. CAA hi khua leh tui tan dan tha lo tak a ni."a ti bawk.

He huna thusawitu dang L. Ramdinliana Renthlei President ZORO thalai chuan, "ZORO hi political party a ni lo a, Zofate rorelna pakhat hnuaia kan awm theih nan leh Zofate khawvel hmun hrang hrang a awm te kan inpumkhat a kan insuihkhawm theih nana hma la tu a ni a. Hemi ti hlawhtling tur hian ZORO thalai chuan hma kan la dawn a, ZORO thalai chuan nasa zawkin awareness campaign kan nei dawn a ni. Khawvel hmun hrang hrang a awm Zofate Jerusalem Mizoram hi kan venhim a ngai a, kan Jerusalem Mizoram hi hnamdang in min tihbuai loh nan hma kan la dawn a. Kan state ramri te humhalh a, kan pi leh pute luahchin ram neih let a nih theih nan nasa lehzualin hmalak kan tum a ni. Tin, Aizawl ah hian kan unau kan chipui thenkhat ten Lushei tawng an hman loh avangin nuihzat leh endawng an tawk thin a, hei hi tha lo kan ti hle a, hetiang unau leh unau inkarah in nuihzatna leh in endawngna a thlen tawh loh nan hmalak kan tum bawk a, tawng avanga in unauna bo a ni lo a, thisen avanga in unau zawk kan ni tih thalaite a hriattir zel kan tum a ni."a ti.

CHIN-LUSHAI CONFERENCE vawi - 128na ah hian Zo Inpui sakna tura hmalak mek chu chak lehzual a kalpui nise tih rel a ni a. Chin-Lushai conference ah hian Zoram hmun hrang hrang atangin palai thahnem tak an kalkhawm a ni.