TBC Zaithanpuia'n nupui nei dawn; A nupui tur chu tunge?

Aizawl | January 4, 2019: Mizo Mipa Gospel Singer lar TBC Zaithanpuia chuan January 9 khian nupui a nei dawn.

 

TBC Zaithanpuia Leh Elvina Leivon hian January 9 @12:00 noon khian BCM Shalom, Mission Vengthlang aizawl ah tiam tlat e an ti dawn ta ani.

TBC-a hi zofate zingah chuan hrelo kan awm a rinawm loh, LDF Cable network ten Youth Idol an buatsaih ațanga zofate hriat țan niin, vawiin ni ah chuan tbc-a hre lo hi awm meuh pawh a rinawm tawh loh hial ani.

TBC Zaia nupui tur ELVINA LALMUANPUII hi Union Public Service Commission buaitsaih civil services examination, December 2015 leh ‘Personality Test’ atana  interviews March-May, 2016-a  an neih țuma India ram pum huapa Rank 1018 hauh pha ngat niin, tunah hian Indian Audit and Accounts Service(IA&AS) ni lai mek a ni nghe nghe a, kum 1987 December ni 24 khan Dr.L.R.Kom(L) leh Pi R.Lalveni te inkarah a lo piang a, unau pali zinga a pathumna niin, Apa Dr.L.R Kom hian 2019 khan a lo boralsan tawh a ni.

- Vanlalruata Pautu

Mizo Zaithiamte Chanchin 'MzC' 

TBC Zaithanpuia chu kan hriaa, a nupui tur Elvina chu tunge?

Union Public Service Commission buaitsaih civil services examination, December 2015 leh ‘Personality Test’ atana interviews March-May, 2016-a an neiha India ram pum huapa Rank 1018 hauh pha Nula Elvina Lalmuanpuii Leivon hi kum 1987 December ni 24 khan Imphal-a Dr.L.R.Kom leh Pi R.Lalveni te inkarah a lo piang a, unau pali zinga a pathumna a ni a. A nu Pi R.Lalveni hi Dr.R.Zokhuma pa farnu fa a ni.

Maria Montessori school, Imphal-ah lehkha zirin a thiam thei em em hran lo va, a zir taima hrim hrim a, Matric chu 1st Division-ah pass in English, Mathematics leh Science subject-ah te letter a hmu a. Class XI leh Class XII chu Kendriya Vidyalaya, Imphalah a kal a, Class XI an zir kum hian an zirpuite chu Mathematics-ah an tihchhiat hlawm em avangin sikul dangah te an insawn hlawm a, Elvina Lalmuanpuii erawh chuan zirtirtute a bel a, an ina tih tur tul apiang tihsakin zirtirtute inah lehkha thiam a duh avangin a riah chilh tawp thin a. Chutiang taka a zir avang chuan Class XII pawh 1st Divisionah pass in English leh Biology subject-ah letter a hmu leh a ni.

Tichuan, India ram puma zirlai tam takte ang bawkin leh a pa Dr.L.R.Kom thurawn angin MBBS zir thei turin a inbuatsaih leh ta a, vanduaithlak takin a tling zo ta lo va. Kum 2005 khan Delhi University-ah a subject duh ber Psychology a zir ta a, he subject hi a tui zawng tak a nih bakah he subject thiamna hmang hian professional career a hmu ngei ang tih ringin a zir a, B.A tha taka a zir zawh hnuin 2008 kum khan M.A (Psychology) zir chhunzawmin tha tak bawkin a zo ta a ni.

Delhi leh Imphalah te hna a han thawk ve lawp lawp a, Competiton Exam hmachhawn turin a rilru a siam fel ta a, New Delhi leh Imphal kar tawnin coaching te a kal zak zak a, nasa takin a inbuatsaih a, 2013 kum UPSC civil service exam dawn tep-ah a zir nasa lutuk chu a taksa-in a tuar ta lo va, a dam lo ta a. A duh angin a chhang tha hlei thei ta lo va, a tling zo lo ta reng a ni.

Hemi tuma a hlawhchham hi beidawn phah na a hmang mai lo va, nasa zawkin a inbuatsiah leh a, a zir a zir a, question hlui te la khawmin darkar thum chhunga question tam tak rilru fim taka chhang zo zung zung turin amah-in exam chinna a nei deuh reng a, a changin a zirtirtute question a set tir a, a chhanna paper chu a changin a mahina endik a, a changing a zirtirtute a endik tir a.

Darkar 3 chhunga idea flow tawp, a duka duk zur zur thei tura ziah ran leh ziah kim tumin anwer writing chu a bei chhin ngar ngar mai a ni. zawhna pakhat chhan nan minute 7 hun ka nei ti te-in a chhut kilhkelh a. Tichuan 2014 kum UPSC hnuaia civil service exam a han chhang leh chu a lo ring tawk leh lutuk kha a chetsual phah ta thung a, question chhiar tha hman lo khan a chhang zung zung ta mai a, huntawp dawn tepa a han enchian chuan a zawhna ni lo a lo chhang a ni tih a hrechhuak! Phengphehlepa khua a tlai zo ta! Beidawn erawh a la tum lo!

Kum 2014 khan Nula Elvina Lalmuanpuii hian Minipur leh Mizoram-ah MCS ni turin MPSC buatsiah Civil service exam a chhang ve ve a, mak tak maiin Mizoram Public Service Commission hnuaia MCS Exam 2014 Final result-ah pakhatna a ni a, Manipur Public Service Commission hnuaia civil service exam 2014 final result-ah overall rank 12 na leh ST rank 4 na a huah pha a ni. Tum chuan kawng a awm tih thu chu Elvina Lalmuanpuii hian tisaah a chantir ta a ni.

Tichuan, duhthlang thei dinhmunah a din a, nula Elvina Lalmuanpuii rilru-ah hian Mizoram a lang tlat mai a. Manipur hnuchhawnin Mizoram sorkar hnuiah 15.01.2015 khan JUNIOR GRADE PB-3 Rs 15,600-39,100+GP Rs 5,400-in hna pek a ni a, SDC, Lunglei hna a chelh ta a, Mizoram sorkar thuchhuaka a lan dan chuan Elvina Lalmuapuii hi a dam a nih ngai chuan 31.12.2047 thleng sorkar hna thawk tur a ni.

Elvina chuan Lungleiah a hna chu a zawm ta a, a nute-i te hi Lunglei Electric Veng Mualte sir-ah an awm a, chutah chuan a awm a. Lunglei SDC office a officer-a a luh ni chiah chu UPSC hnuaia Civil Service Exam hmachhawn tura a inbuatsaih țan ni a lo ni leh ta.

Bei la, bei la, bei nawn rawh tih thu ang khan Laptop atangin internet-ah a inzir reng a, Union Public Service Commission buaitsaih The civil services examination, December 2015 leh ‘Personality Test’ atana interviews March-May, 2016-a an neiha Elvina Lalmuanpuii hian India ram pum huapa Rank 1018 hauh pha a, IAS a pha lo chu a rilru a na deuh hlek a, mahse Mizo mipuite’n a hlawhtlina an lawmpuizia a han hriat chuan a lawm ta em em a, Central sorkarin eng hna pawh pe se lawm taka pawma thawk turin a rilru a siam fel ta a, tunah hian a hna chan tur chu IA&AStih a chiang ta.

- – Familia Fanai Lalţansanga