Mizo Idol 2015 Rebecca Selate chungchanga i la hriat ngai lohte i hmaah kan rawn chhawp e.
Rebecca Selate tia hriat lar Rebecca Zorintluangi hi Thangchungnunga leh Lalrindiki te fa pali zinga fa hmingkoh a ni a. Sihhmui, Sairang-ah an cheng mek.
Rebecca Selate hi Zorin, Beki emaw Rebecca tein an ko thin a. Unau pali an nia, Mipa pahnih leh Hmeichhia pahnih an ni a. October 27, 1996 khan a lo piang a ni.
Rebecca Selate hian 2012 khan Govt.High School, Sairang atangin pawl 10 a pass a, 2014 khan Staines' Memorial School, Chanmari Aizawl atangin pawl 12 a zo bawk.
Rebecca Selate hian Music Video hrang hrang a siam nual tawh bakah Music Video album pathum a siam tawh bawk.
Ngainat zawng hrang hrangte:-
Rawng- Black
Chawhmeh- Thil kan tello in chaw ei har ka ti hle🤣Bai hi awm bawk se ka ti
Incheina- Simple thei ang ber.
Rimawi- Ka ngaithla kual nasa a, variety khawp mai. Jazz rawngkai erawh sak nuam ka ti.
Hla- Isua Neih Ka Duh ber.
Mize ngainat zawng:
-Nui peih, Hlim hmel pu reng thei, Tawng duh leh Mi rilru tha leh Rilru lang tlang tak.
Ngainat loh:
-Mi rêl reng leh Mi chanchin sawi tur hrereng mai te, Engtik lai pawh a túm reng mai te.
Hobby:-Zai leh Zinchhuah
Relationship status-Plural🤣
Kawppui atana duhzawng:
- Pathian mi, Kristian Chhungkua ka dinpui theih tur, Mi fel, Zaidam, Mi hriatthiamna ngah leh dawhthei tak.
Zawhna dang:-
1. A tel lova i awm theih loh: Sana
2. A tel lova i awm theih loh: Bible leh Pathian Hla
3. A tel lova i awm theih loh: Mi beidawng nih
4. I tih ngai miah loh tur: Mi chhiatna tur atan thil tih ka duh lo. Ka tum lo bawk.
5. Mizo Tualzal nuna ṭha i tih: Aia upa zah.
6. Quote i duh ber:
Kei a tân erawh zawng Pathian hnaih hi atha a ni.
- Sam 73:28
7. Mizoram leh Mizo tualzal nuna Mizo hmeichhiate dinhmun:
- Kan tunhma ngaihtuah chuan Hmeichhiate hi kan dinhmun a tha in hmasawnna kawng tam tak-ah a awm ka ti. A thatlohna leh duhthusam tawk lohna awm mahse, Kei chuan tun hma nen a tualzal nun ka khaikhin chuan Mizo hmeichhiate hi kan dinhmun a tha tawh ka ti.
8. Hnam hmingṭhat leh hmingchhiat kawngah Hmeichhiate'n mawhphurhna:
- Hnam hmingchhiat leh that kawngah hian Hmeichhiate hian mawhphurhna kan nei sàng hle. Abikin hnam dangin min tehna kawng ah hian, Kan Mizo hnam hmingthat leh humhim hi Hmeichhiate hian kan tih makmawh. Kan ko a tla a nihna lai a tam zawkin ka hria Mipa te ai hian.
9. Hnam ziarang chawinun kawnga Hmeichhiate mawhphurna:
- Hnam ziarang chawikan kawngah hian Hmanlai kan Mizo hmeichhiate nun dan kha kan ngaihtuah nawn a tulin ka hria. Kan ze mawi tam tak hmeichhia ten a kan vawn nun reng theih leh ngai tam tak ala awm. Tin, min tehna a la ni fo thin khang ziarang te kha. Chuvang chuan kan mawhphurhna hi kan hriat angai hle in ka hria.
10. Mizote tan 'Fa neih tlem' inzirtir hi a ṭulin i hria em?
- Kan dinhmun leh khawsak dan chu a inchen lo nameuh mai. Amaherawhchu, Fa neih tlem inzirtir hi keimah lamah chuan a tul ka ti chiah lo.
11. Khawtlang, Kohhran leh nangmah:
- Khawtlang leh Kohhran-ah hian ka theih tawk in ka inhmang ve a, a kúl a tài chuan ka thei hauhlo. Chutihrual erawh chuan Khawtlang leh kohhran Inkaihhruaina te hi Mimal tin tan a kan nun kaihruaitu a nih avangin kan va inhmang tam thei lo a nih pawn a rual a kal thei kan nih a tulin ka hria.
12. Social Media leh Nangmah:
- Ka hmang tangkai hle a, Keimah hi a hlim thei chi leh tunlai tawngkam tak a 'Nàwi' chi ka lo nih vang nge a tlangpui thuin Ka uang viau mai zel a. Chutihrual erawh a ka vei ve em em chu Kan Thalai thenkhat ten, Kan duh dan chu kan tarlang thiang vek. Amaherawhchu, thil thleng apiang mai a hlimchhawn a thil pawi anih dawn leh dawn loh thliar lo a kan bengvàr thin lutuk erawh sim a ngai ka ti. Thinrim han ân chiam mai leh Zia thalo zawng zawng tihlan kan tum emaw tih mai tur hi chu a tha lo. A pawi lo, him chin, mi dangte tan a hlimna tur ah erawh kan hman thiam angai ka ti.
13. Mizoram ṭhalai tam tak tlakchham:
-Dawhtheihna/Nghah peihlohna tin rinchhan tur kan neih hian kan puitling har bawk.
14. Mizo ṭhalaite hian ngaihsan tur dik an ngaisangin i hria em?
- Hei chu 'Aw' a nih na lai a awm ka ti. Mizo thalaite kan thangharh zel. Kan ngaihsan zawng tam tak hi chu a dik tan viau tawh in ka hria.
15. Ngaihsan tur dik nia i hriat:
- Kawng hrang hrang in a teh theih ang. Kei ka ngaihsan te hi chu Diklo chu záwm lo ngam, Mi tihlawm nan mai a a der awm lo. Thudik tan ngam te, hei hi chu a dinhmun azir a thliar theih ni mahse Mihring nun bikah chuan khing mite khi ka ngaisang.
16. Hlawhtlinna tura pawimawh:
- Taihmak, Nghah peih leh Beidawng lova beih hram hram.
17. I nuna hloh i hlauh ber:
- Ka mizia leh ka Nungchang.
18. Zofate inpumkhatna hi a tak a thlen theih i ring em?:
- Ka ring a, ka beisei tlat a ni.
Thalaipuite hnena chah duh:
- Engpawh ti ila, Hna sang kan thawk emaw kan hna a hniam emaw, Theihtawp i chhuah zel ang u. Tin, zir mek kan nih pawhin Kan tum ti hlawhtling zel tur hian i bei ang u. Kan Nun ah hian engpawh tih duh, tih chak leh nih châk kan nei anih pawn 'I thei' tih hi kan infuihna ni fo rawh se.
- Explore Mizoram hi tha ka ti. Tha ka ti ngawih ngawih. Abik takin Thalaite tan hian tha ka ti lehzual. A bengvar thlak. Malsawmna tam tak nen Kal zel se tih hi ka duhsakna a ni.
•| Sponsored by TT Arts |•
_________________
Call/ WhatsApp +919615332721
Post a Comment
He post chungchanga i ngaihdan lo sawi ve rawh: