MPSC Chairman atan Lalramthanga Tochhawng ruat

Aizawl | January 9, 2019: Mizoram Governor chuan Mizoram Public Service Commission (MPSC) chairman thar atan Lalramthanga Tochhawng IA&AS (Retd) chu a ruat.

Lalramthanga Tochhawng IA&AS (Retd) MPSC chairman atana ruatna hi vawiin khan Mizoram Sawrkar chuan thuchhuah siamin a puang a. MPSC chairman hi Mizoram Public Service Commission (Condition of Service) Regulations 2019 hnuaiah a thawk ang.

Mizoram Public Service Commission (Condition of Service) Regulations 2019 in a tarlan dan chuan MPSC chairman hian a hna a zawm atanga kum 6 chhung emaw amah kum 62 a tlin emaw, a hmasa zawk zawk thleng a thawk dawn a ni.

MPSC chairman thar hian thla tin cheng 2,25,000 bakah hamthatna dang a dawng bawk ang.

 

Pu Lalramthanga Tochhawng hi Pu Lalthanzama(L) leh Pi Neihthangi (Zote Bakery) te fapa niin kum 1986 IA&AS batch a ni a, India ram hmun hrang hrang hna thawk kualin tawnhriat nei tha tak a ni a, Mizoram sawrkar hnuaiah pawh Director & Secretary, Social Welfare Department leh Director, Secretary & Commissioner, Agriculture Department hna te a chelh tawh a. Kum 2007 ah Accountant-General Office Mizorama din anih khan Accountant-General, Mizoram hmasa ber a ni a, kum 2011 ah Principal Accountant General ah kaisangin Principal Accountant General, Mizoram hmasa ber a ni. Kum 2015 a Telengana State siam thar anih khan Principal Accountant General (Audit), Telengana hmasa ber ni turin sawn a ni a, kum 2019 January thla khan Principal Accountant General, Mizoram ni turin a rawn kir leh a ni.

Pu Lalramthanga Tochhawng, IA&AS (retd) hi Principal Accountant General, Mizoram dinhmun a chelh lai khan Additional Deputy Comptroller and Auditor General, HAG+ Grade, Pay Matrix-a Pay Level 16 ah a kaisang a. Mizo  IA&AS zingah he dinhmun thleng hmasa ber a ni.