Kolasib district Electoral roll revision buatsaih mek endik; Roll a chuan dilna form 1128 lut tawh

Aizawl  | January 20, 2020: Vawiin chawhma khan DC Conference Hall, Kolasib district ah Electoral Roll Observer Pu Lalthangpuia Sailo hovin Kolasib district Electoral roll revision buatsaih mek a Booth Level Officer hnena Form hrang hrang hmanga dilna lutte enho a ni a, Electoral roll a chuan dilna 1128 a lut tawh. He hunah hian Political party hrang hrang aiawh, NGO te leh District Level Standing Committee member te sawm niin Pi Sangchhin Chinzah, District Election Officer, Kolasib district bawrhsap ni bawk chuan in he hun hi a kaihruai a ni.

Kolasib district ah hian MLA bial thum, Kolasib, Tuirial leh Serlui bialte awmin, E Roll a luh dilna 1128 awmin, hming paih dilna hi 224 a awm a, Roll a chuang tawh hming siamthat dilna hi 984 a lut a, Bial ngaiah hming ziah luhna siamthat dilna hi 161 a lut tawh bawk a ni.

Ni 1, January 2020 atanga ni 13, January 2020 inkara BLO te hnena dilna Form hrang hrang dawn dan dinhmun chu a hnuaia tarlan ang hi a ni a, hengte hi January ni 20 atanga ni 24 thleng endik hna kalpui tur a ni.

Form 6 hi India khua leh tui kum 18 tling tawh, Electoral roll a hming la chuang lo te tan inziahluh dilna a ni a, Form 7 hi Roll atanga hming paih dilna a ni. Roll-a inziaklut tawh te siamthat ngai a awmin Form 8 hmang a dil tur a ni a, Constituency ngaia hming ziahluhna thlak a ngaihin Form 8A hmanga dilna siam tur a ni bawk a ni.