Joshua lu ruh hmuh hnuah a ruhro dang hmu leh!

Mi pakhat ruhro hmun hnihah hmuh a ni?

Aizawl | January 7, 2019: Tunhnai khan 2017 March 13 a chin hriat lova bo ta Joshua Hmangaihliana S/o H Dari Thingsulthliah Camp Area ruh ni ngeia hriat chu 2019 a hmuh a nih hnua-ah hmuh leh a ni a. Vawiin hian Police in an enfiah dawn.

2019 July khan  Pu K Lalremliana Thingsulthliah khaw pa  rawtuai khawrh chuan Pu Lalromawia (L) huan mawng, Saibual lui kam ramah Mihring luruh ro a hmu a.

He lu ruh hi Joshua Hmangaihliana S/o H Dari Thingsulthliah Camp Area a nih ngei rinna avangin Police punin, Forensic Expert te endik tir a ni a.

A nu DNA leh a unaute DNA lak a nih hnuah Forensic Expert ten uluk taka an endik hnuah Dt.September 27, 2019 khan Police lam aṭangin Joshua Hmangaihliana ngei a nih thu Thingsulthliah lam hian an dawng niin kan thu dawnna chuan a sawi.

Thingsulthliah VC leh YMA Joint Committee chuan ngun taka ngaihtuahin an rel zui nghalin a chhungte ngenna angin September 27, 2019 chawhnu chuan vuiliam a ni a.

A ruh dang hmuh leh a ni!

Hmardari fapa Joshua Hmangaihliana ruhri ni ngeia hriat, ruhro dang leh a thawmhnaw te la telin chu tunhnai khan Thingsulthliah ram chhung Pu Kamlova huan mawng ah hmuh leh a ni a.

Hei hi a unau te pawn an zu enfiahin Joshua ngei a ni tiin, a thawmhnaw aṭang pawhin amah ni ngeia an hriat duh an sawi niin kan thu dawnna chuan a sawi.

Vawiin hian Police in an endik dawn niin kan thudawnna chuan a sawi bawk.

Tunhnaia hmuh hi Joshua ruhro chu lo ni ta se, nikkuma Joshua luruh ngei nia hriaa, Forensic lamte nena finfiah hnua an phum tak kha tu ruhro nge ni ta ang?

Tin, Forensic lamin tihsual an nei em ni? Forensic lam lo dik ta se, tuna mi hi tu ruhro nge ni ta ang? tihte chu zawhna awm ta chu a ni.


| Heng thute hi Social Mediaa darh a ni a. Thu chiang zawk ngaihven mek a ni. |