Naupang 22 hnenah huaisen chawimawina hlan; Mizo Nuapang pali tel

Aizawl | January 23, 2020: India president chuan nimin khan Indian Council for Child Welfare (ICCW) National Bravery Awards, 2019 dawng tura thlanchhuah Naupang huaisen 22 te chu chawimawina hlanin, heng zingah hian Mizo naupang pali an tel.

Mizo naupang pali Laliansanga Phullen, Vanlalhriatrenga Sairang Dinthar,  Carolyn Malsawmtluangi Zuangtui leh Lalkansung Muolbem (manipur) te chuan nimin khan Naupang huaisen chawimawina an dawng.

Heng naupang huaisen mahni nunna thapa mi dang tana inhlante hi Pathianni-a India Republic Day lawmnaah mipui sang tam tak hmaah an inlan ang.

Huaisen lawmman dawngte hian an nun an thap tak meuh meuh a. Lalliansanga s/o PL Vanlalhruaia chu March ni 29,2018 khan a thian te nen Tuivai luia an kal chu an haw lamah an thian pahnih  chu electric hrui chatin a man a. An hnunga tlan Lalliansanga leh Vanlalduhawma te chuan an thian te nun chhan tumin mau ro nen an bei a, Lalruatfela chu boralin Joel Lianthangpuia chu an chhanchhuak a ni. Huaisen lawmman dawng turin Lalliansanga hi thlan a ni a, Vanlalduhawma erawh kum 18 a pelh tawh avangin thlan a ni lo.

F Vanlalhriatrenga s/o F Vanlalhmunsanga, Sairang Dinthar hian naupang tui tla a chhanchhuah avangin huaisen lawmman hi a dawng dawn a ni. March ni 1,2019 khan naupang  tuiah an tla a, F Vanlalhriatrenga te thianho hian nang chingin ani chuan tuitla chu a chhanchhak a, CPR a pek hnuah naupang hi a harhchhuak  leh a ni.

Carolyn Malsawmtluangi d/o Lalsangzeli, Zuangtui Aizawl chuan Mizoram chhim lam khaw pakhata naupang kum 7 hi an rukbo a chhanchhuah avang leh Police ten a rubo tu Zonunsangi an man theihna atana a hnathawh that avangin huaisen lawmman dawng tur hian thlan bawk.

[ Caroline chanchin Explore Mizoram a dah tawh chu hetah hian a awm e. ]

Lalkansung S/o Hranglienkhum & Rachel Lalhminghlu  Muolbem Manipur hian July 2, 2019 khan Dila hmeichhe naupang pathum; muolbem lal  Lalmalsawm fanu Miriam Lallienpui (12), Lienkhothang fanu Mawineikim (14) leh Philip Laltlansang Fanu Jesica (13) te inbual tum tui tlate chu a chhan chhuak a ni. 

Naupang huaisen chawimawina hlan zingah hian Mipa 12 niin, Hmeichhe 10 a ni a, Mi pakhat chu a thih hnua hlan a ni.