Have Thine Own Way Lord

Kum 1902 khan Adelaide A. Pollard-i chu Africa ramah Missionary nitur a kal a duh a. Mahse Africa ram kal tur chuan pawisa a nei hauhlo mai a. Amah hi November ni 27, kum 1862 a Bloomfield, Davis County, Iowa, USA a piang a ni a. Hetih hun laia USA atanga Africa khawmualpui kal hautak tur zia chu kan chhut thiam awm e.

Chutia beidawng taka a awm lai chuan tawngtaina inkhawmna hmun pakhatah kalin nu pakhat hian kan hmalam hun awm dan tur zawng zawng chu keini lo tihdanglam emaw lo siam chawp ve emaw theih a nilo a; kan nun dan tur leh kan hmalam hun chu Lalpa, i thu thu a ni ti a a tawngtai hi a hria a.  Chu thu chuan Pollard-i chu a khawih ta hle mai a. Tichuan Jeremia bung 18:3-6 thu kha ngaihtuah chhuakin a chhiar ta a.  Bel vawtu chuan a kut a hlum awm chu tha a tih ang ang a sawngbawlin bel siamna atan a hmang thin a. A bel siam lai chu a that loh chuan bel vawtu chuan a duh danin bel dang a siam leh mai thin a. Chuti ang chiah chuan Pathian chuan bel vawtu kuta hlum ang maiin keini hi a duh dan ang angin min siam thei a; kan nunna leh kan engkim hi Pathian kut a awm a nih zia kha a ngaihtuah chhuak ta a.

Tlai lama in a haw hnuah veleh chuan chuan khawvela Pathian hla ropui ber pawl, mahni inhlanna hla ril tak ‘Have Thine Own Way Lord’ (Lalpa, I thu ang ni zel rawh se) tih hla ropui tak mai hi a lo phuahchhuak ta a. He hla a phuah atanga kum nga hnuah George Stebbins-a chuan a thluk hi a siam sak ta a. Kum 1907 ah Northfield Hymnal with Alexander’s Supplement ah he hla hi tihchhuah a ni a, he mi kum vek hian hla bu lar tak Ira Sankey’s Hallowed Hymns New and Old leh Sankey and Clement’s Best Endeavor Hymns ah te telh niin khawvel pum a deng chhuak nghal a.

He hla mawi tak mai hi Kristian Hla Bu kan hman mek number 450-naah awmin Rev. Dr. R.K. Nghakliana’n Mizo tawngin mawi tak maiin min lehlinsak a nih kha. He hla hi zaithiam hrang hrangin an sa nasa a, Mahalia Jackson, Marty Robbins, Johnny Cash, Eric Copeland, Cristy Lane, Jim Reeves, John Fogerty, Ned Beatty te leh kum 2009 ah khan Ronnie Milsap chuan mawi tak maiin a sa bawk a nih kha.

He hla ropui tak mai phuahtu Adelaide A. Pollard-i a duh ang ngeiin Africa ramah hian Missionary in va kal a, Indopui pakhatna a lo chhuah avangin a tum angin a awm rei talo a. America ah haw lehin a dam chhungin rawngbawlin hun a hmang zo a. October ni 6, 1945 ah khan Catskill, New York ah a lo boral ta a ni.

Kan nunna leh kan hun zawng zawng hi Pathian ta a ni a; a duh anga a hman a tan leh a remruatna anga awm tura inpumpek tawp mai chu kan tihtur a nih zia he hlaah hian kan hmu chiang hle a. Pathian hman tlak leh Tharau Thianghlim chenchilh nun neitu kan nih theihna tur chuan a zawng zawng a Pathian hman tur a kan impek luh a; bel vawtu kut a hlum awm ang kan nih ngam a tul zia he hlaah hian kan hmu a ni.

{Kan Male Voice Conductor F. Lalnunpuia chuan he hla mawi tak hi B.D. (2016-2020) Final Year Mipa hoin B.D. kan zir chhunga kan ‘Special Number’ tawp berna turah thlang chhuakin kan sa a ni}

Have Thine Own Way Lord

(Lalpa i thu ang ni zel rawh se)

Lettu: Rev. Dr. R.K.Nghakliana

Lalpa i thu ang ni zel rawh se,

Belvawtu i ni, kei bellei chu;

I duh ang ngeiin min rawn siam la,

I thua awman ka inpe e.

Lalpa, i thu ang ni zel rawh se,

Min enfiah ang che, tunah ngei hian;

Vur aia varin min rawn sil la,

I hmaah Lalpa ka lo kun e.

Lalpa, i thu ang ni zel rawh se,

Mangang, hliam tuar hi min rawn pui la,

Thiltihtheihnate i ta a ni,

Aw ka Chhandamtu, min tidam rawh.

Lalpa, i thu ang ni zel rawh se,

Ka nunna chungah thu rawn nei la;

Thlarauva khatin Lal Isua chauh,

Ka nunnaah hian a lan theih nan.