HAPPY CHINESE NEW YEAR

新年快樂 (xīn nián kuài lè).

- Manga Thomte

Vawiin ni 25 January, 2020 hi Chinese Calendar-ah chuan kumthar ni a ni a, China leh khawvel hmun hrang hrangah an lawm luih luih mai a ni. 

Khawvel mi tam zawkte leh keini Zofate hian British ho tih dan zui vein Gregorian Calendar kan lo hmang ve a. Chuvangin December ni 31 zanah kumhlui thlahin, kum thar January ni 1 kan hmuak thleng ṭhin kha a ni a. 

Chinese kum thar hi, 'Lunar New Year' ti te pawhin an sawi a, 'Spring Festival' pawh an ti ve tho bawk. Chinese Calender hi kuthnathawktu te kum chhiar dan (Agriculture Calendar "Nóngli") a ni ber a, a ni leh hun nghet a awm lemlo a. Kum tin thla det ṭan tirh January ni 21 leh February ni 20 inkarah hman ṭhin a ni. 

Hetiang hi Chinese kum thar an lo hman tawh leh hman leh tur hun chu a ni:-

2019- 5th February

2020- 25 January

2021- 12 February

2022- 1 February

Chinese New Year hi Chinses ho chuan an la ngaihlu in an la hlut hle a, an lawm nasa thei hle ṭhin. Heng hunpuiah hian hal mawi (firework) te an hal a, chhungkua an  inhmuhkhawm a, chhungkua leh ṭhen leh rual chaw eikhawm nan te, ṭhian leh chhungkhat laina tlawh na te hun an hmang ṭhin. Lehkhaip (Envelope) sen chhungah pawisa te dahin an duhsak zawng te an pe ṭhin a, chutiang chu, "Angpao" an ti ṭhin. 

He hun hi China ram chhung leh, Chinese ram pawna awm (Sinophone) te bakah Singapore, Malaysia, Myanmar, Thailand, Cambodia, Philippines, Maritus, North America hmun engemawzat leh Europe hmun hrang hrang-ah te lawm a ni a. Khawvel mihring 20% velin he ni hi hmang/ lawm ang a chhut a ni bawk. 

Chinese hmanlai kum chhiar dan-ah chuan, kum hi Van lam arsi nen inzawm a ngaih a ni a. Chung arsi 12 te milin rannung sawmpahnih (12) te hi kum sawi nan hman a ni. 

Chung rannung kum sawi nana an hman te chu: Rat (Sazu), Ox (Bawngpa), Tiger (Sakei), Rabbit (Sazupui), Dragon, Snake (Rul), Horse (Sakawr), Goat (Kel), Monkey (Zawng), Rooster (Arpa), Dog (Ui) leh Pig (Vawk) te an ni.

Kumin 2020 hi Rat (Sazu) kum a ni a, nikim 2019 hi Pig (Vawk) niin, nakum 2021 hi Ox (Bawngpa) kum a ni leh ang. Heng kum te hian horoscope leh vanneihna hrang hrang te, vanduaina leh Lucky Number, Colour leh chi hrang hrang a nei ṭeuh a ni. 

Eng pawh nise, Chinese kum thar chibai le. 

Gong Xi Fa Chai 恭禧发财