Dungtlang-ah TZP inkhawmpui nei mek; Doctor awm lohna PHC-ah Sawrkarin Doctor dah rawh se - TZP

Aizawl | January 8, 2019: Tuipuiral Zirlai Pawl (TZP) General Conference Vawi 35 na ni thum awh tur nimin atanga 'Zirlaite leh tunlai khawvel' thupui hmanga Dungtlang Community Hall-a hman mek chuan resolution pathum; East Tuipui huamchhungah Sawrkarin Civil SDO dah rawh se, Sawrkar enkawl HSS din ni rawh se tih leh Doctor awm lohna PHC-ah Sawrkarin Doctor dah rawh se tih te chu lungrual takin an pawm.

He inkhawmpui hi vawiin khan  I&PR Minister Pu Lalruatkima chuan 'Vangtlang Inkhawm' -ah khuallian niin a hmanpui a, East Tuipui bialtu MLA leh Bamboo Link Road Board Vice Chairman Pu Ramthanmawia chu khualzahawm a ni. Inkhawmpui hi nakzanah a ṭiak ang.


Khuallian chuan Tuipuiral Zirlai Pawl kaihhruaina hmanga General Conference tum 35 na lai neih ani thei chu ropui a tih thu leh khawtlang tanrualna a fak a. Tuipuiral khuate chu khaw inthurual leh nuam tak anih thusawiin, amah ngei pawh a inthlahrung loh thu leh nuam a tih thu a sawi a. Bialtu MLA thahnemngai tak an nei chu an vanneihpui hle a hriat thu sawiin, Tuipuiral chu miropui tak tak te lo chawrchhuahna hmun a nih thu sawiin, an tha chhang dawltu tur awm loh a hlauhawm thu sawiin, Zirlaite chu an hniakhnung zui ve thei tura tan la sauh sauh turin a fuih a. A thiam leh hmangchang hriate dinchhuah zelna khawvel a kan awm avangin kan elpuite laka dingchanga hlawhtlinna chang tur chuan kan hriam ve tawk angai a ni, a ti a. Minister chuan hnam tlemte kan ni a, hnam chak leh ropui ni thei tur chuan tam turin fa neih tam inzirtir angai a, kan ram hmun ramri dep thlenga kan luahlum angai ani, a ti a. Mizo mipate chu pasal tlak, rilru puitling leh eizawnna ngelnghet nei thei tura kan inzir angai ani, a ti bawk.

Pu Lalruatkima chuan hmasawnna ruhrel din kawngah rinawm leh taima taka kan thawh angai ani tiin, hlep tam aia hna tha thawh tam lamah inel a tul a, he ram hmasawnna hi kan kutah a awm a, neitu thinlung kan put phawt chuan nakin lawkah ram nuam leh duhawm tak kan siam thei dawn ani, a ti a. Kalkhawmte chu khawtlang tana hnawksak a awm lo tur leh mahni theihna zawn ang zelah theihtawp chhuah turin a chah a. Zirlaite chu taima leh rinawm taka lehkha zir tura fuihin, zir thiamna chu hnathawh thiamna a ni, a ti a. Khawtlang leh ram mamawhte hian min auchhuak se, tun aia tang lehzuala zirna lama beihpui kan thlak angai a, chu chu nakin zela hnam damna tur ani, a ti bawk. Bial mamawh resolution thlente pawh Sawrkarin ngaihtuahna sengin a tul ang zela hma a lak tur thu a sawi a. Sawrkarin Zirna ngaipawimawhin Zirtirtu 900 chuang a la thar a, nakin zela zirna tihhmasawnna turin khawtlang pawh lo inruahmana inpuahchah turin a chah a. Zirlaite chu rinawmna, taihmakna, tumruhna leh dawhtheihna nena zoram din thar tura rilru leh ngaihtuahna seng thar turin a sawm nghal a ni.


He hunah hian Kum 2019 chhunga High School leh Higher Secondary School-a Zirlai First Division chin chunglam a pass te, Bachelor leh Master Degree neite, HSLC Exama 100% School pass- 3 te leh Special Award dawngtu 7 te chawimawina neih ani a. Zorammawia, Asst General Secretary-in lawmthu sawina neiin hun a khar a ni. Chawhnu lamah thupui zirna hun neih niin, Pu H.Lalhminghlua, Addl DPC, SSA Champhai District, Ex-President, TZP chuan thupui 'Zirlaite leh tunlai khawvel' tih hmangin zirtirna a pe a ni.

Tuipuiral Zirlai Pawl hi kum 1986 a din niin, 'Learn for Wisdom' tih chu an thupui ber a ni a, East Tuipui bial Khaw hrang hrang 25 atanga intelkhawm zirlai pawl lian ber a ni. General Conference hi kum tin neih thin niin nakumah Khankawn khuain a thleng dawn a ni.

Vawiin General Conference-ah hian Zirlaite, Tuichangral Zirlai Pawl aiawh, Tuipuiral NGO aiawh, hruaitu hlui leh Tuipuiral chhunga Zirtirtu te'n an hmanpui a ni.

I&PR, Rural Development leh Revenue changtu Minister Pu Lalruatkima chuan tukin khan NLCPR sum cheng nuai 369.89 senga sak mek Khawbung Mini Sport Complex, a huna zawh hman loh pawh a hmunah kalin a enfiah a. Thal hna thawh theih hun chhunga hnathawh ngai chu zo hman ngei tura hmalakpui a tum thu khawtlang hruaitute a hrilh a, Minister hi Pu A. Chhalai, EE, Rural development department leh midang engemaw zatin an tawiawm a ni. Mizo Hlakungpui Muala nauban khawite a him zawkna atana Hlakungpui Committee-in hung an duhthu an thlen pawh Khawbung BDO nena ruahmanna lo siam turin a hrilh a. Minister hian tukin khan BDO Complex a tlawh bawk a, BDO Pu Vanlalchhuanliana leh Staff te'n lo dawngsawngin quarter sak ngai leh thil tul hrang hrang an lo thlen a ni.


•| Sponsored by TT Arts |•
_________________

TT Arts, Chanmari Aizawl-ah T Shirt print hrang hrang an ti thei a, Explore Mizoram T Shirt pawh cheng 450 in lei tur a awm bawk e.


Call/ WhatsApp +919615332721



Post a Comment

0 Comments