THINGTLANG KTP LEH KHAWPUI KTP

Rawlthar chhuah phat atanga KTP bel tlat mi, Chanvo pawimawh tak tak Group Leader, Chanchinbu Editor, Light & Sound Sub-Committee ah Secretary ni reng reng thin ka ni a, ka nihna hi ka chapopui vang ni loin KTP ka sawt duh vang hrim hrim ni loa KTP hmangaih hman tawkin kum 10 zet zawt chu ka lo inhmang ve tawh a, ka thil tawn hriat atang hian leh mi thil chik mi ka nihna ah hian inzirna tur tam tak kan neiin ka hria a, a haw duh chuan haw mahse ka pawiti hran lo a, he darthlalang hi ka chhawpchhuak duh mai chauh a ni.

Aizawl khawpui chhunga Branch engemaw zatah hian ka inkhawm ve tawh a, a tlangpui thu in tlangnel a harin Khawpui chhunga KTP Member te leh hruaitute hi an induh deuh ngulh hlawm a, khawilaia ruihhlo sim duh si, Krista hnen pan duh si te’n khawpui chhunga Branch KTP te hi Isua hnen hruai thleng turin inkhawm ta thin se an beidawng mai hian a rinawm. Kumpuan thupuiah Member hlate hnuh hnaih tih hmangtu te hi mithar rawn inkhawmte laka kan induh leh viau si dawn chuan kumpuan thupuiah neih loh ngam mai pawh a tha zawk awm e. Tin, Khawpui chhunga Branch KTP te hi chu mi neinung sa, vengchhunga mi nghet sa, mi pangngai chunglam te tan chuan a nuam ang. Mi mawl zawk leh mi hnuaihnung zawkte tan chuan tlangnel hleihtheih lohna tur niin a lang.  Chuvang chuan keimahni leh Pathian inkar a fel chuan duhtawk mai ila, a induhtawk chin hi chu hnaih buai hi tum lo ta law law ila Pathian kan hnaih zawk awm e. A helh zualpuiten ar chuk tui lo khawpin min bei let dawn tih hre reng mah ila ka pawisa chuang lo. Kan that tlanna tur zawk leh inenfiah tur tam tak an awm ve tho dawn tih ka hriat miau avangin min bei let tu turte hi engahmah ka ngai duh lem lo.

Ka lehkhabu ziah historical novel a nih thin avanginlehkhabu rawn mai chu a lo tawk thin loh avangin  thingtlang hmun kilkhawr ber berah te mi rawnin ka kal zel a, KTP inkhawm zan hi ka hmaih ngai lo. Thingtlangah chuan han inkhawm ila, inkhawmbanah min chibai let let a, khawi atanga lo kal nge ka nih, kan Branch hmalakna enge, tih min han zawt nak nak thin hi chu kan tlangnel thuai thuai mai a ni. Thingtlang khawte apiangah KTP member leh hruaitute Khawpui KTP member leh hruaitute aiin an hawihhawm zawk.

Kan Kristianna a dâk tial tial nachhan te hi ngaihtuah ila, kan mize ngheh loh vang chu thuhran nise Pastor biak ngam loh khawpa inhmuam-ûp, Kohhran Upa tum vuau mai te lakah hian tuinnge kan thlarau nun harsatna hi hrilh ngam tehlul ang?

-Apuia Chawngthu

(Thingtlang Kohhran ṭhalai leh Khawpui kohhran ṭhalai tiin lo chhiar la, KṬP hi kohhran ṭhalai tiin lo chhiar bawk la, kan zavaia tan inzirna tur awmin i hre ve em? Comment lamah i ngaihdan kan nghak e.)