TWO-WHEELER TAXI

- James Ramdinmawia

Vawiin chu Chaltlang Dawrkawn-ah Two-wheeler Taxi ka chăng a, chhungkaw Programme hmang zovin kan Office, Zàmzo Real Estate, Khatla-a lêt leh tum ka ni.

Pic: James Ramdinmawia

 Two-Wheeler Taxi rawn tlăn apiang mai chuan Passenger an nei zel a, han pakài maina tur a awm lo. Taxi pangngai ka lâk chuan Traffic Jam-ah ka tang ang tih ka hlau bawk si. Rei ngial ka din hnu-ah pa pakhat, Scooty khalh hian, "Chhuk ve duh in awm em?" tiin kan bulah a rawn ding a. Ka bula nutling pakhat ding ve kha ka kian deuh e ka tia, ani lah chuan midang a lo nghak emaw ni, a lo 'yes' ta si lo a. Chu pa vêk chuan, "Chhuk ve duh in awm em?" tih pahin min rawn melh phei leh a. Chutah kei chuan, "E, duh tehlul e," tiin a Scooty-ah chuan ka va chuang nghal a. Kan titi ta thla bawrh bawrh a.

 Kan titi-na ațang chuan Raj Bhavan thleng a kal dawn tih te, Governor PSO a ni tih te ka hre ta. Tichuan Raj Bhavan thleng kan inphur phei ta. Kan Office chu hnăi tê a ni tawh. Lawmthu sawi pahin, "Taxi Fare hù tal ka pe ve ang che," ka ti a, a la duh bau lo. A va felin a va tlawmngai êm!

 Tuna thlalâka in hmuh khi a Scooty chu a ni a. Night Duty nei turin Raj Bhavan a lut mêk a ni. A pawi ka sawi lo turah ka ngai, a hming chu Pu Zâma a ni, Țhuampui Veng-a chêng, ka hmelhriat ngăi hauh loh a ni. Hetiang mi, mi tlawmngai leh mite tana malsawmna nih tum tlat hi eng emaw zat in awm tih ka hria. Mizo nih hi a va nuam țhin êm!

 Kum 2006-07 vela Mizoram University Annual Magazine Editor ka nih lai khan "Varsity Chronicle" kha Fortnightly (kâr hnih dan)-ah kan tichhuak țhin a. Ka awmna te'n Computer an nei si lo, Mizoram University Students' Union (MZUSU) Office kha Chaltlang-ah a awm a. Zan khaw tairêk thleng thlenga MZUSU Office-a hna thawh châng kha ka nei țhin. Mahni inhlawh chawpa lehkha zir ve hram hram kan nih avangin lirthei neih kha chu kan tan vàn-a rah ang a la ni si. Zanlai-ah ke-in Chaltlang ațangin Electric Veng-ah ka haw thla hnak hnak țhin. Mi țhenkhat, car leh bike nalh tak taka leng te khan min rawn tlàn pel fua fua zel. Zan khat chu chutia ka haw thla hnak hnak chu Sumo Driver pakhat hian, "Țhianpa, i rawn chhuk thla ve duh em?" tiin a motor-ah min phur thla a, ka va han lăwm tehlul. Kha Sumo kha khawi khaw Sumo nge, tu nge a Driver hming, etc. engmah ka hre chhuak zo ta lo.

 Hetiang laklawh leh hmanhmawh thilah hian motor ka hawl chhuah chuan ka hmelhriat ngăi loh hi ka lo phur ve zauh zauh tawh. A chhan chu, ka mi hriat ngăi miah loh, mi ropui leh milăr pawh ni lo, Kohhran leh khawtlanga hming langsar ni bawk si lote hi ka tân Vàn Angel tluka hlu an lo nih fo tawh vàng a ni.

 Chaltlang ka kàl dawn hian Tennis Court leh Treasury Square-ah Two-wheeler Taxi ka chăng hlawhchham țhak. A chhan chu, mipui mamawhna a sâng lutuk a, an supply sêng lo a ni. Ka țhianpa, PS Zauva, Ramhlun Indoor Stadium-a a inkhel tur a rawn tlàn hlauh a, ani hian min han thlah kual ta a ni.

 'Chuan, rawtna ka nei; Two-wheeler Taxi hi Aizawl khawpui-ah Sorkar ruahmanna-in an intlànchhawk mek. Mahse public demand a sang si, Peak Hour-ah chuan an Stand-ah hian an ding hman meuh lo. An intlanchhâwk loh pawh hian Traffic ti-jam tham an ni lêm lovin a lang, 400 vel chauh an ni. Chuvangin Public Demand a sàn dan ngaihtuah chungin kan Sorkar hian intlànchhawktir tawh lovin, an vai hian nîtin tlàntir se mi nâwlpui tan hian a va țha dâwn êm!