Thalai intelkhawmin CAB dodal; MP C Lalrosanga bang turin phut, Police in thalaite man khawm

Aizawl | December 13, 2019: Zoram Revolution Movement tia invuah thalai intelkhawm chuan vawiin khan Mizo National Front (MNF) Party hmunpui Mizo Hnam Run kawtah Citizenship Amendment Bill (CAB) duh lohna lantirin peaceful demonstration an nei.

Thalai pungkhawmte hian Mizoram MP neihchhun C Lalrosanga chu bang turin an phut a, an au rual a. Thalai lungawi lo pungkhawm an tam hle.


VIDEO:

Heng thalai kalkhawmte hnawtdarh tur hian Mizoram Police chu an thawkchhuak a, an hruaitu leh mi thenkhat an khawm a. Boruak erawh a hma aiin a sosang a, zual lam a pan zel.

Thalaite hi kiam lam aiin an pung zel nia thu dawn a ni.

 

MLA in Ṭhalaite thlavang hauh: Zoram Revolutionary Movement ten CAB duhloh vangin Hnam Run leh Vanapa Hall Kawt ah an pungkhawm mi 52 te chu Police in an man. 


Heng mite an man chhan leh an thlavang hauhin Tuirial Bialtu MLA Pu Andrew H Thangliana  chu a hmunah kalin a enpui bakah Magistrate pawh hmuin thil awm dan a zawtfiah a. Magistrate chuan, "SP Office ah thu zawhfiah tur a hruai anni a, chhuah leh nghal tur an ni," tiin MLA hi a lo hrilh niin kan thudawnna chuan a tarlang.

India rorelna sang inpui pahnih a CAB pawm a nih tak hnuah Northeast state hrang hrangah dodalna a sosang hle a. Meghalaya khawpui Shillong leh Assam khawpui Guwahati bakah Tripura khawpui Agartala ah te CAB duh lotuten kawng dan bakah khawpui laili-ah lungawi lohna an lantir a, dan kengkawhtu lamin khap daih an tum a. Mahse, boruakin zuallam a pan zel.

 

Assam district hrang hrangah curfew puan a ni a, Mobile internet pawh chawlhtir a ni tawh bawk.

Kan hriat angin Mizoram aiawha Lok Sabhaa MP ni lai C Lalrosanga chuan CAB pawm zawngin a vote a, thu a sawi bawk a, Assam MP tam zawk leh Meghalaya MP ten CAB an thlawp bawk. He thil vang hian thalai tam tak thinrim hmun hrang hrangah an pungkhawm a ni.

Delhi a Mizo awmte pawhin CAB an duh loh zia leh Zoram Revolution Movement an thlawp zia Delhi Mizoram House kawtah thuziak kengin an tilang.

A hnuaiah hian thuziak dang kan dah e:
>>>>>>>>>>>


David sailo>MSR
CAB VANGIN MLA IN BJP CHHUAHSAN 
December 13, 2019

A intiamna pawh ni miah lo ah CAB vangin IGP in a hna a bansan thu kan tar lang tawh a, tunah chuan MLA, Ruling(BJP) MLA Corporation Chairman ni bawk chuan CAB dodaltute hmaah BJP a chhuahsan thu a puang leh ta hmiah mai.

JATIN BORA -
Assam Film Star ni thin, BJP zawma Politics luhchilh ta a ni a, MLA ah tling zuiin  Assam State Film Finance Development Corporation ah Chairman a ni mek bawk.

Mahse a ram leh hnam tan a him lo tih hriain Aigupta thilte chu thlahlel hauh lovin Thursday khan CAB dodala pungkhawm mipui hmaah BJP a chhuahsan thu a puang a, a nihna chelhte a bansan vek thu a sawi bawk. Kutbeng leh au ri a ring ngei mai. Hei hi Politics dik tak chu a ni, Party Politics nilo, Ram Politics chu.

A thenin Vote zawn nan CAB a tawp thlenga dodal tura an intiam zawrh zawrh a, a thlang tlingtu mipui an phatsan duh laiin an ni hi chuan ram leh hnam tan an nihna ropui leh PARTY thlengin an dahtha ngam zawng a nih hi!!

STATE PATHUMIN HMAN TUM LO -
CAB chu a huam tur State, W.Bengal, Kerala leh Punjab CM te chuan huai takin an State ah an hman ve dawn loh thu an sawi tawh a, Central Sorkar lam pawhin vau let dan a ngaihtuah nasa nghal hle.

PROGRAMME A BUAI ZO -
Tun Sunday lo awm tura Japan PM, Shinzo Abe leh Modi te Guwahati a Meeting an neih tur chu thulh phawt a ngaih hmel, an cheimawi zawng zawng tih chhiat a ni. Bangladesh Finance Minister leh an Home Minister te ni 3 chama India lokal an tum pawh an thulh fel der mai. Ranjit Trophy leh ISL khelh tur pawh Cancel vek a ni bawk.

ASSAM , TRIPURA LEHMEGHALAYA -
Assam ah Dodalna lantirtu zinga mi pahnih kahhlum a nih thu tarlan a ni. CM bakah DGP Convoy te lung hmangin mipuiin an bei bawk. Assam bikah hian ni 10 chhung zirna in khar a nih tur thu an sawi a, Guwahati-Shillong kawng chu dan a ni bawkin an sawi. Assam BJP MLA, Binod Hazarika in chu halsak a ni a, Tinsukia ah dawr 6 hal a ni bawk.

Tripura leh Meghalaya ah pawh Assam ang bawkin Internet Off vek a ni a, thlawhna leh Rel Service chawlhtir lailawk a ni bawk.

PRAG NEWS -
Assam a Private News Chanel a ni a, nimin tlai lam dar 6 vel khan Ulubari a an Studio chu Police in luhchilhin Staff te kut an thlak a, boruak a tih sosan phah hle.

Ulubari ah hian Police ten khawlaia pungkhawm hnawt darhin inchhunga awm turin an hrilh a, Prag News Office tuala Staff awmte chu kut thlakin Office chhungah an hruailut a, Staff dangte pawh kut an thlak niin Managing Director, Bordoloi chuan a sawi a "Assam Police te hian Media laka hetianga an chetna ah hian rang takin ngaihdam an dil tur a ni" a ti.