Mizoram State Games tiak; Aizawl East I pakhatna an ni

Aizawl | December 14, 2019: Mizoram pum huapa infiammite fuankhawmna, constituency 40 te intihsiakna, Mizoram chhunga Infiamna kutpui lianber Mizoram State Games 2019 chu hlawhtling taka neih a nih hnuah nimin khan a tiak a. Mzoram State Games 2019 kharna hun hi ropui takin Sipai Lammualah nimin chawhnu khan  result puanna leh lawmman semna hunte hmang telin neih a ni a. He hunah hian Governor PS Sreedharan Pillai chu khuallian a ni.

Mizoram State Games 2019 a MLA Constituency 40 intihsiakte zingah 25 Gold, 18 Silver, 16 Bronze Medal Medal la tu Aizawl East - I Constituency Contingent te chu Champion-ah puan an ni a. Anni hian Mizoram State Games 2019 Champion Nomawi  chu an chawi ta a ni. Aizawl West - I Constituency Contingent, 21 Gold, 10 Silver leh 18 Bronze Medal latu chu First Runners-up ah puan an nia, Aizawl East- II Constituency Contingent 17 Gold, 11 Silver leh 23 Bronze Medal latu chu Second Runners-up an ni thung a ni. Mimal inelna bikah 3 Gold leh 1 Silver Medal latu chu Nl. Elisian Madai, Lunglei East chu  Best Athlete(Hmeichhia) ah puan a ni a 5 Gold Medal latu Pu. Lalsangliana, Aizawl South - I  chu Best Athlete(Mipa) ah a ni thung a ni. 

Governor P.S. Sreedharan Pillai chuan Mizoram State a pian hnua State pum huap Infiamna Kut lian ber hlawhtling taka huaihawt a ni chu  thil chhinchhiah tlak tak a ni a.  MLA 40 rual ten phur taka an bial team te an buaipui chu thil danglam tak leh state dang te tan pawka entawn tlak a ni a. Mizoram MLA te an chhuanawm hle a ni a ti.

Mizoram infiammite hlawhtlinna chuan Mizoram mai ni lovin India a ti hmingtha a ni a ti a. Tunhnai maiah pawh Mizoram atangin infiammi hlawhtling tak tak an lo chhuak tawh tih a sawi a. “Jeje Lalpekhlua, tuna Indian Super League Player, India Team Captain leh inghahna te, Lalremsiami,Indian Women’s Hockey Team Player, Asian Games 2018 a Silver Medal vawchhuaktu te leh International Hockey Federation pawn Rising Star of The Year zinga a chhawpchhuah te, rit chawi chak Jeremy Lalrinnunga, India ram aiawh a Youth Olympics 2018 a Gold Medal la hmasa ber te hi kan Superstar an ni mai lova India chhuanvawr te an ni a. Ka chhuang takzet a ni”, a ti a.  I-League-ah tuma beisei lohin Aizawl FC an rawn champion te kha Mizoram mipui zawng zawng te kan inchhuanna tur a ni a. Tunah hian ISL-ah te Mizo Player tam tham tak an awm mek tih hriat te hian Mizoram thalai te hian Infiamna khawvelah theihna sang ber an nei tih a chiang a ni a ti. 

 

Chief Minister Pu Zoramthanga  pawhin thusawina hun hmangin kum 34 hnu ah Mizoram State Games neih a ni leh thei chu lawmawm a tih thu a sawi a. Mizoramin sports lama India ram leh khawvel huap thlenga lang phak theihna turin State Games chu theih tawp tihhmasawn zel a nih tur thu a sawiin, mipui pawhin hlut theuh turin a sawm a ni.

Mizoram pum huapa infiamna kawnga infiammite tih hmasawnna leh infimmi tha bik, Mizoram aiawh tur te zawn chhuahna atan Mizoram State Games 2019 chu buatsaih a nih thu Sports Minister Pu Robert Romawia Royte chuan a sawi a. 

 

Mizoram pum huapa infiamna kutpui hi hun hmasa lamah lo neih a ni tawh nain tun tum anga huapzo leh liantham zawk, awmze nei zawka ruahman leh Budget felfai taka siam a la awm lo a ni. Tun tuma State Games buatsaih a nih chhan ber chu infiammite zinga talent nei tha haichhuah, infiammi ti thei zual deuh te khalh fal leh sports tih hmasawn a ni a. Hei vang hian Mizoram State Games pawh hian Sawrkar laipui ngaihven pawh a hlawh hle a ni. State Games neih chhung zawng hian India ram Sports thuneitu sangber, Sports Authority of India(SAI) chuan infiamna hmun hrang hrangah SAI Scout te a duty tir vek a. SAI Scout te hian uluk takin infiammite hi an thlithlai reng a. SAi hotupa ber Pu Sandeep Pradhan, Director General pawh nimin lam khan Aizawl lo thlengin Venue hrang hrang a tlawh kual nghal a ni. Mizoram State Games 2019-ah hian infiammi 7447 an tel a, Sports Discipline 32 a awm a, event 221 a awm a, Inkhelhna hmun(venue) 24 a awm bawk a ni.  Team Game, Mimal inelna hrang hrang - athletics, Combat sports, aquatics,etc., te bakah Mizo Infiamna bik( Indigenous Sports) te pawh a State Games-ah hian a awm kim hle a ni. State Games a titha zual, medal la pha chin te tan hian Mizoram aiawha inkhelh kawng a in hawn bakah Sawrkar duhsakna pawh hnalak turah te a neih theih dawn a ni.

  

Mizoram State Games hmingpua inelna hi kumin hi a vawi thumna a ni a, State puitling kan nih hnuaa State Games neih vawi khatna a ni.

Mizoram pumhuapa inelna hi ṭum 7 buatsaih a ni tawh a, tun hi vawi 8-na a ni. Kum 1963-ah khan hetiang hi neih ṭan niin 1st Mizoram District Olympic-1963 tiin inelna chi sarih hmanga intihsiak a ni a, Aizawl Town chu point hmu hnem ber an ni.

2nd Mizo District Olympic tih chu kum 1965 khan neih leh niin inelna chi hrang pasarih hmang bawkin inelna neih a ni a, hemi tum hian Aizawl South an ti ṭha ber.

Kum 1973 rambuai lai khan Mizoram State Games chu neih leh a ni a, Aizawl huam chhung bial thum chauhin inelna an nei a, Aizawl Central chu pakhatna niin Aizawl South chu pahnihna an ni a, Aizawl North in an dawt.

Mizoram Olympiad 1977 chu Athletics leh Inbuan hmangin neih leh a ni a, hemi tum hian Lungdar chuan point an ti ṭha ber.

Kum 1981 khan Mizoram State Games chu inelna chi 12 hmanga neih leh a ni a, a pumpuiah Champhai an tiṭha ber a, a hnu 1985 khan inelna 12 hmangin neih chhunzawm leh a ni a, Aizawl East pakhatna an ni.

Mizoram State Sports Council hnuaia Asssociation hrang hrangte chuan kum 2006 khan 1st Mizoram Sports Festival an lo buatsaih tawh bawk.

Tun ṭum Mizoram State Games-ah hian Discipline chi hrang 32 hnuaiah hian mipa bik inelna 132 a awm a, hmeichhe inelna bik 88 awmin a vaiin inelna chi 221 a awm a. Mizoram chhunga infiammi 7227 an tel a, a pumpuiah Aizawl East -I in Gold Medal 25, Silver Medal 18, Bronze Medal 16) an Champion.

 

Mizoram State Games 2019 kharna inkhawm hi Pu H.Lalengmawia, Secretary, Sport &Youth Services in a kaihruai a. Chief Minister Pu Zoramthanga chuan Mizoram State Games 2019 Souvenir a tlangzarh a. He hunah hian Champion, Runners-up te leh mimal inelna bika Best Athlete(Hmeichhia) leh Best Athlete(Mipa) te hnenah lawmman hlan a ni. Mizoram State Games 2019 a MLA Constituency 40 intihsiakte zingah 25 Gold, 18 Silver, 16 Bronze Medal Medal la tu Aizawl East - I Constituency Contingent te chu Champion-ah puan an ni a. Anni hian Mizoram State Games 2019 Champion Nomawi  chu an chawi ta a ni. Aizawl West - I Constituency Contingent, 21 Gold, 10 Silver leh 18 Bronze Medal latu chu First Runners-up ah puan an nia, Aizawl East- II Constituency Contingent 17 Gold, 11 Silver leh 23 Bronze Medal latu chu Second Runners-up an ni thung a ni. Mimal inelna bikah 3 Gold leh 1 Silver Medal latu chu Nl. Elisian Madai, Lunglei East chu  Best Athlete(Hmeichhia) ah puan a ni a 5 Gold Medal latu Pu. Lalsangliana, Aizawl South - I  chu Best Athlete(Mipa) ah a ni thung a ni. State Games 2019 Closing programme-ah hian Deputy Chief Minister Pu Tawnluia, Minister te, MLA te leh Infiammite an tel a.  Mipui an pungkhawm tha hle a ni.