Regional Saras Fair vawi 6na RD Minister in hawng

Aizawl | December 5, 2019: Ni 10 chhung awh tur Mizoram State Rural Livelihoods Mission (MzSRLM) leh Rural Development Department buatsaih, thingtlanga kut hnathawktu hmeichhiate kut chhuak zawrhna, Sale of Articles of Rural Artisans Society (SARAS) Fair vawi rukna chu vawiin khan Assembly Annexe Conference hall-ah Rural Development Minister Pu Lalruatkima’n a hawng.



Minister Pu Lalruatkima chuan Saras Fair chhim tura lokal zawng zawng te chungah lawmthu a sawi a. Sawrkar chuan thingtlanga chengte chawikanna tur schemes leh programme hrang hrangte a ngai pawimawh a, theihtawp chhuahin ruahmanna a duang zel a ni, a ti a. Minister Pu Lalruatkima chuan Chhungkua leh khawtlang chawikang thei MzSRLM paiwmawhna hriat hi a tha hle a ni, a ti a. Minister chuan MzSRLM hnuaia Self Help Group (SHG) member ten thahnem ngai takin an thawk a, hatsatna hrang hrang pawh an tawng thin tih sawrkar chuan a hriatpui a, an harsatnaah MzSRLM chuan SHG member te a chhawmdawl zel dawn a ni, a ti a. SHG hi bank a inngat an ni a, loan petu bank a hnathawkte an pawimawh hle a ni, a ti a. Minister Pu Lalruatkima chuan harsatna kirh tak avanga loan rul thei nganglo an awm anih chuan MzSRLM hotute hriattirin, chawikang dan ngaihtuah theih zel a ni bawk a ni, tiin a sawi a. MzSRLM hnuaia dan awmte zah turin SHG member te a ngen a, October thla a Mizoram atanga SARAS Fair, Delhi a kalte chu North East State zingah inhralh tha ber an ni chu lawmawm a tih thu a sawi.

 

He fair hawnna ah hian Pu Lalhmingthanga, IAS, Commissioner & Secretary, Rural Development chuan inlawmna thu a sawi a. Pi H. Lalchhandami, CEO, MzSRLM in SARAS Fair hman anih dan report a pe bawk a ni.

He hunah hian Aaward sem a ni a, Award semte hi MKSP Project hnuaia Agriculture leh Livestock Community Resource Person thawktha mi 8 hnenah te, Village Organization sum puk kawnga tithe- Hualtu VO, Thingdawl VO-1, Bilkhawthlir North VO hnenah te, SHG hmasawnna tura thawktha Branch Manager Pathum Christopher V.L Famkima, Khawbung Branch, Mizoram Rural Bank, Lalfakzuali, Siaha Branch, Mizoram Co-operative Apex Bank, Omega Leivon Kom, Ngopa Branch, State Bank of India hnenah Champion Banker award hlan an ni.

Hei bakah hian kum 2018-19 chhunga MZSRLM hnuaia Block tha bera thlanchhuah pathum Zawlnuam RD Block, Sangau RD Block leh Serchhip RD Block hnenah te award hlan a ni bawk.

SARAS Fair ah hian Mizoram chhung hmun hrang hrang Block 18 atangin Self Help Group member mi 166 ten dawr an hawng a. Stall 82 leh Food Court 2 hawn niin MZSRLM hnuaia SHG member te thil siam leh thar chhuah hrang hrang handloom, handicraft, thlai rep chi hrang hrang, pickle, chawhmeh leh thei tharlam tak tak te man man zawka hralhchhuah tura phochhuah a ni.

Pu CC Lalchhuangkima, Dy. Secretary, RD Department chuan lawmthu sawiin SARAS Fair hawnna hi a khar a ni.

SARAS Fair hi Ni 5 -14 December, 2019 chhungin Multi Level Parking, Tuikual South a neih tur a ni a. MzSRLM hnuaia Self Help Group (SHG) member hrang hrangte’n an thil thar leh siam chhuahte an zuar a ni.

Post a Comment

0 Comments