Mizo Pasaltha Vanapa hriatrengna lungphun

Hnahlan | December 5, 2019: Mizo Pasalṭha hmingthang Vanapa (Thangzachhinga) hriatrengna lung chu vawiin khan a thlah (tuchhuan) kal zel ten a ruang zalhna hmun, Hnahlan ram Tuiṭhoh lui kamah an  phun a. He hunah hian Vanapa thlah ten Hnahlan khawtlang an sawm angin ruai nen khawtlang huapin Vanapa Lung hi phun a ni.

He huna khuallian Pu Lalchuailova, Deputy Director, Art & Culture Dept. chuan, “A hming kan sawi apianga a huaisenna leh a tlawmngaihna kan hriat reng tawh tur Vanapa hriat rengna lung phun chu lawm takin ka hawng a ni” a ti a. "Vanapa chanchin leh a thihna hmun/ thlan hi chhui dan hrang hrang awm mah se,  kan innghahna leh kan rin ber tur chu, kum 1926-a Mizo leh Vai Chanchinbu-a ziaka awm leh, Mizo Historian, Pu B. Lalthangliana ten ziak ngeia an lo dah te hi a ni tur a ni dawn lawm ni," a ti.

Vanapa tuchhuan zinga mi, Pu C.Ṭhasiama, Bawngkawn, Aizawl pawhin thu sawiin, "Kan pu, Vanapa thlan awmna hmun chungchang hi mi thiam tam tak ten a awmna hmun an sawi dan inang lo mahse, kan chhungkaw thu rochhiaha kan inhlan chhawn zelah chuan, kan pu Vanapa thlan awmna chu 'Hnahlan ram, Tuiṭhoh lui kam' tih chiah hi a ni. Amaherawhchu, Tuiṭhoh lui awmna tak hi kan hriat loh avangin, kan pu thlan hmun hi kan hre thei mai lo va, hetia Hnahlan khawtlanga tlawmngai pawl ten min zawn hmuh sak avanga vawiina a thlan hmun ngeia a hriatrengna lung kan phun thei hi kan lawm tak zet a ni," a ti.

 

He hunah hian Pu JC Dailova Ngopa valupa Vanapa chanchin hun rei tak lo chhui tawh chuan thu sawi in..  Kan hriat tawh angin, Vanchiaua’n Hranghleia leh fanu Chawnpuithangi a nei a. Chawnpuithangi fapa chu Mihranga a ni. Mihranga chuan fapa T.D. Sena (Thir Deng Sena) a nei a. Kum 1976 vela Ngopa Val Upate’n Vanapa thlan kan ngaihven lai khan Committee-in T.D Sena kawmna an nei a, ani chuan, “Kan pu Vanapa chu Diltlang aṭanga Khuanglam kai buai hnu hret, an inbawk hlimah a thi a. A thihna pawhramhnuaiah a ni a, a thlan pawh tunah chuan ramhnuai a ni a, chutianga awlsama zawn hmuh mai mai chi a ni lo ang,” tiin a sawi a..  “Henghun leh kum vel hian Hnahlan Branch YMA-te chuan Vanapa in buaipui awm kan la hre si lova, kan lo kal ta lo a ni,” a ti.

Pu J.C.Dailova chuan, Pu C. Ṭhasiama pa Mamtuka, Khawdungsei chu 1976 khan Ngopa damdawiina a awm chu kan kan a, kan titi naah ‘In pu Vanapa hi khawiah nge thia inhriat’? ka ti a. Ani chuan, ‘Diltlang aṭanga Khuanglam an kai buai hlimah, Khuanglam awm tawh hnuah ram hnuaiah a thi’ tiin a sawi, Pu Dailova chuan Pu Kawlchhawnan Rabunga zin turin min sawm a, kan ngaihdan a inang dawn lo tih ka chian tawh avangin ka kal duh ta lo law law a ni. Rabung lam leh Hnahlan lam chhui dan kan han zir chiang ve ve a, Rabung lam chhui dan hi pawm dawn ila Zawlnghaka thi tur chuan Vanapa hi kum 130 chuang a dam a ngai a. A kum nen Zâwlnghak hi thleng thei turah kan ngai lo. 

A thlan hmun pawh a phumtuten an thlang thiam. Sa vakvel pawhin a pal loh tur, leiminin a chhilh theih loh leh tuilianin a hrût theih loh, ṭhangthar thiamna hmang pawha chei danglam rem lo tlâng pâwng laia a awm hi a  inhmeh lehzual a ni tiin...

He lungphun programme hi Pu C. Biakthankhuma, Hnahlan Branch YMA President-in a kaihhruai a, Upa K. Lalnunzira’n hunserh a hmang a ni.