NULATE HNENA THUCHAH

- Maroa Tahan

Kawl thufing pakhat chuan;

Hling chunga Hnah a tlakin Hnah a pawp a, Hnah chunga Hling a tlakin Hnah bawk a pawp ṭhin, a ti.

He thufing tawi te hi kan nulate hian changvawnah nei thei sela ka va han duh tak em!

Model: Rody Chhangte, Designer: Leoni Ralte

Mizote hi tun hma kha chuan tlangvalin nula inah lengin an va rim ṭhin a. Nulain inleng a neihte chu a chhungten an hre ve vek ṭhin. Chuvangin tlangval ṭha leh ṭha lo chu chhungkuain an hre tlang ṭhin a ni. Nupui pasal tur atana ṭha leh ṭha lo tur pawh chhungte nen an hre tlang vek a, an ngaihtuahho hnuah chauh nupui pasal an nei ṭhin ti ila a sual tam pui lo vang. Chutianga chhungkaw thuruala nupui pasal nei an nih avang chuan nupa inkarah harsatna a lo thlenin chhungte nen an hmachhawn ṭhin a ni. 

Tun laiah erawh chuan chutianga inrim chu a awm ta meuh lo. Social media kan hmang nasa a, Smart Phone hmangin kan inrim tawh a ni ber e. Smart Phone aṭang chuan hmel chauh a hmuh theih a, nungchang erawh a hmuh theih ve tawh si loh avangin nupui pasal thlang sual ta te pawh an tam hle niin alang. Hmel aṭang ringawt hi chuan nupui tur atana ṭha leh pasal atana ṭha tur chu a hriat theih tak tak loh reng a ni.

Nulatena kan hriat makmawh chu mipa dinhmun leh hmeichhe dinhmun inang lo hi a ni. Tlangval chuan nula theih hi a inuanna a nih laiin, nula erawh chuan pasal a neih hma zawng him taka nun a vawn ṭhat chu a mawhphurhna a ni thung. Mipa, hmeichhe ngai tam chu pasalṭha anga ngaih a nih laiin, hmeichhia, mipa ngai hnem erawh chu mi hmuhsit leh endawng chauh a hlawh ṭhin a ni. Duh ve ve reng chunga chesual pawh ni se, mipa dinhmun chu hling ang a ni a, hmeichhe dinhmun erawh chu hnah ang lek a ni. Hling a pawp ngai lo va, hnah erawh chu a pawp ṭhin. Chuvangin mipa leh hmeichhiate pahnihah hian dinhmun chhe zawk changtu chu hmeichhia a ni.

Nulate u, Sweet December a lo thleng dawn. Mas leh Kum thar pawh a hnai ta. Sweet December lawmin hlim rawh. Mas hlim takin hmang ang che. Kum thar pawh hlim takin i lawm dawn nia. Mahse, chah duh che ka nei a nia. Febuary, March thla a lo thlen huna Sweet December, Mas leh Kum thar i hman danah i inchhir lehna tur thlentu a nih dawn ai chuan i chhungte bulah awm ve mai mai la, i dam chhung atan a ṭha zawk ngei ang. A nih tur zawng zawng a thlen kim tawh hnua inchhir leh si hi khawvela thil sawt lo ber chu a ni. Inchhirna tur a thlen hma ngeiin inveng ṭha ang che.

Hnah chunga Hling a tlakin Hnah a pawp a, Hling chunga Hnah a tlakin Hnah bawk a pawp ṭhin asin, fimkhur ang che aw.