CAB HIAN MIN HUAM VE DAWN LO MAHSE

Tuna Parliament-a putluh an tum mek CAB hian sawi a hlawhin North East-ah dodalna a nasa hle mai. Mipui mimir tan chuan 'Mizoram min huam dawn loh chuan a va lawmawm ve' ti a ngaihtuah mai hi thil âwm tak a ni. 'Mahse, ngaihtuah chian a ngai hle mai.' Hei hi North East Devide & Rule tuma beihna a ni a, N.E hi englai pawha kan ṭanrual ṭhap reng loh chuan engtik niah emaw a mal malin min kher leh anga, kan mal ṭan fai vek mai dawn tihna a ni.

Kum 1994-a Union Home Minister SB Chavan-a'n, "No Inner Line restriction would be impose while Restricted Area Permit requirement for foreigner is lifted, as that would mean welcoming of foreigners while keeping out of Indians" tih a sawi a. ILP min hlih sak dawn emaw ti a Arunachal, Mizoram leh Nagaland kan phût dual ṭum khan North East Students' Co-Ordination Committee (NESCC - NESO hming hmasa) meeting-ah kan zualko a. ILP hmang ve lo state te pawhin min thinur puiin 15 August, 1994 khan lungrual takin N.E Total Bandh min lo thlawp pui tawh a, khami ṭuma N.E ṭanrualna avang khan vawiin thlengin Central sorkar hruaitu lawk ka aṭang chuan ILP ngaimawhna thu an la chhak chhuak leh ngam lo. Tuna CAB an pass tum danah hian Mizoram kan him dawn niin kan hria a, kan thlamuang ta mai anga kan awm hi in ngaihtuah chian a ngai hle mai. A himlo state te kan phatsan bik tur a ni lovang.

CAB ai chuan Uniform Civil Code (UCC) hi kan tan a ṭhalo lehzual zawk dawn a, UCC hi BJP next move tur a nih hmel. Assamese leh Meitei ho hi Hindu an ni a, an tân engmah pawina a awm dawn lo. Hetah tak hian N.E ṭanrual a ngai leh dawn a, UCC min barh luih an tum hunah Christian ho Meghalaya, Mizoram leh Nagaland ringawtin do dawn ila, kan chak tawk lovang, ṭanrual pui atan Arunachal, Assam, Manipur leh Tripira hi kan mamawh hle dawn. Mahni sahimna chin zela kan in phatsan rem rum chuan UCC hi nasa taka protest a ṭul hunah he'ng ho hian min phatsan ve mai chuan a manganthlak viau ang. NESO-ah chauh hian N.E kan ṭangrual thei a, chuvangin kan support tlat tur niin ka hria.

Tunhmaa ILP ngaimawh ve em em ṭhin Assamese ho pawh NESO-a state tin zirlai pawlte thawhhona a zarah ILP hlih lohna tura na taka min ṭantu an ni tawh. Chuvangin tun ṭuma CAB an pass tumah hian keini him dawb angin lang mahila, kan hmalam hun kalzel tur thlirin N.E kan ṭanrual zia tilangtu zingah tel ve ila, NESO support-in December ni 10, 2019 (Thawhlehni) a *NORTH EAST SHUTDOWN* hi i thlawp ṭheuh ang u.

- Lalmuanpuia Punte