Khawi lamtluang nge?

- Lalhruaitluanga Chawngte

Kan ramah a rukin mikhual an rawn lut a, an inbengbel mai a ni lo, ram leilung faah inchhalin chhun khaw engah ngei min cho ngam ta.

Citizenship Amendment Bill (CAB) a piang a nih chuan mikhual rawn lut duhte tan a ruk khera rawn luh pawh a ngai tawh lo titih ang a, khua leh tuia an inchhal kher pawh a ngai tawh lo ang; India hian khua leh tui a lo nihtir thin ang! Kan pi leh pute lo sah zau ramah hian an thlah ni lo mi dang hnenah khua leh tui nihna chu zawng thei semin an sem chur chur mai ang tih a va hlauhawm em!

CAB chuan Mizoram min huam dawn lo an ti a, ILP hmanna state pathumte leh Sixth Schedule hmanga inrelbawlna hmunte a huam dawn lo an ti. Chutah chuan thenkhat an lawm a, thenkhat erawh an lawm chuang lo. 

'CAB hian ILP hmanna state a huam lo ang' tih hi 'CAB hian ILP hman lohna state-te a huam lo ang' tih nen a ngelngheh dan leh ngelngheh loh dan a inang reng lo'm ni ka ti a, 'Sixth Schedule hmanga inenkawlte a huam lo ang' tih te pawh 'Sixth Schedule hmanga inenkawl lote a huam lo ang' tih nen a derdep dan leh derdep loh dan a inang reng lo'm ni ka ti. A huam tur nih ai chuan a huam loh tur nih chu, a thlan chu a thlanawm zawk ang chu; thum vawrah pawh a vannei zawk nih te chu kan duh zawk a nih ngai hi. Mahse chutiang chu a ngelnghet lo a, khawvel hian thil ropuiah a ngai lo. 'ILP hman lohna state-te a huam lo ang' ti lova 'ILP hmanna state-te a huam lo ang' an ti palh hlauh hi ILP hmanna state-te tan thawk huaina tur khawp a lo ni a nih pawhin, hlawhtlinnaa ngaia tha han thlahna tur khawp em ni dawn? Lawm em em chunga vanneihna nghah hi kan tih tur em ni dawn? Lucky ticket i leiin theihtawp i chhuah ngai em ni?

'Hawh u, i inthurual ang u,' tih pawh awm chuang lova CAB chungchangah hmarchhak kan inlungrual thup mai hi a mak a, min awptu India lakah hetia kan han lungawi lo tlang thup mai te hi, nationalist i nih ngai chuan i tan thil hmuhnawm leh ngaihnawm a tling ang! India-in tlawhchhan leh tanchhan pawh nei chuang lova hmun thenkhat huamtira hmun thenkhat a huamtir loh a nih pawhin, hmarchhak inlungrualna tihchhiat a ni mai ang tih i hlau ang a, tha i thawh thei lo a nih pawhin awmhmunah i tang tang tang tho ang! Nationalist i nih loh erawh chuan chutiang thu te chu tingtang hrui nei lo ang maia awmze nei lovah i ngai ang a, atthlak te pawh i ti ang.

Ziak leh chhiar thiam hma pawha ram leh hnam humhalh tuma theihtawp lo chhuah tawh thinte thlahte hian ram leh hnam tan eng nge kan tih dawn? Khawi lamtluang nge kan zawh dawn le?