THLASIK RIM

- Samuel Lushai

Tukhumvilik leh Lailên pawh an lo lan leh tak hi. Tukhumvilik pawh a awm mai mai thei bik lo, chul pik kara Khawmhma kûng zík a bêl tlat a,dâi tla tle sar sar thlir niawm hrimin a melh ngai a melh reng a, a ngawi kara, a chang leh a hnung thak hiat ve niawm hrimin a hnung chu rang zet zet hian a chilh deuh arh arh a.

Lailên nupa pawh an bâng bik lo, kawtzawl rem tak, dâi tla-ina a a tihhnâwn hiam mai hmunah te chuan rang zet zetin an vak zar zar a, A chang leh hniamtein an thlawk zar zar a, chaw zawng niawm hrimin lei hnâwm dâi hiam mai te chu an han chuk leh karh karh a. Mipa naupang in Marble thâp au bengchheng thâwm te chuan an han ûm darh leh ang lâwp lâwp a. In chung sâng lai an bêl a, mei tikáng vah vahin an kal tárh tárh a, an hmuhnawm ṭhin hle mai.

Tlangsam leh Tlaizawng pawh an awm mai mai thei bik hek lo, zan lama dâi tla chu lo dawngin, ni lo chhuah ruala mihring tih lawm ngei tum ve niawm hrimin zing ni chhuah rualin an lo dawn khawl dâi chu an chhun tlêt tir sar sar a, chung lamin duhtaka a siam, mihringte tan chuan a mawi ngawih ngawiha, khawvel hi a hlu bik a, A thlir thiam te tan phei chuan a mawi dan hi mawi zuala, chhungril nun pik tak pawh a hahdam phah sawng sawng ṭhin.

Kawr kam vela Sava chi khat, Mitval rual chiar nak nak te hi an mawia, rimawi mawi tak pakhat an tling ṭhin, kawr kam hnâwng lai, Ni(sun)in-a lung tileng tawk leka a chhun en riai riaina karah te chuan an hlimthla a lang zeuh zeuh a, en chian chuan an pawr sang maia, an duhawm bik riau ṭhin. Fur khawpik laia tui lian-ina a hnâwl bo hman loh kawr kama thingbul mawih, dâi tlai-na  nasa tak maia a tih dum lehzual ringawtte pawh hi hmuhnawm a tling hial ṭhin nia.

Khawchhung han fang ila, "Vawiin chu buh vuak kan tuma, in fapa in fanu hi kan lo sawm e, buh phurh hlawh tur emaw tha sût leh tur pawhin nise, kan lo ring tawp e aw" tih ang ṭawngkam te leh "Vawiin kan buh vaw tur chu kan lâwm te hi Arsa nge Vawksa rep kan hmeh pui ang Nu-i" tih thâwm te chu in tin maiah hian a ri nawk nawk a, suangtuah mitthlaa thlir ringawt pawh hian lung a lêng sa em em a ni.

Ni e.....heti'ang hun a lo thlen hi chuan lung hi a lêng zual a, suangtuahnain nunhlui kan fanga, lungkham nei map lova panlai nun hman hunlaite kha a ngaihawm thar ṭhin. A rim hi a tui bik pawh a ni lo, eng emaw tak hi a paia.Thlasik rim a nam chêk chêk tawh hi chuan nunphung hi a danglam ṭan ni berin ka hre ṭhin. Hei vang hi a ni ngei ang, Lal fâ pawh khan a rawn pan ni.

Ni e........lung hi a leng ṭhin em a ni. 

Ziah ni: ni 9.11.2019