SHC inthlan zo fel; inthlan result hriat a ni ta MNF & HPC ṭangkawpin sawrkarna siam dawn

Aizawl | November 6, 2019: Sinlung Hills Council (SHC) inthlan vawi khatna chu nimin khan boruak muanawm tak hnuaiah tluang taka zawhfel a ni.

1st Sinlung Hills Council General Election 2019 ah hengte hitlinga puan an ni.

1. Sakawrdai North - Lalthlamuana Hmar (HPC-MNF)
2. Ṭinghmun - Lalmalsawm Darngawn(HPC-MNF)
3. Khawlien - K. Hrangkung (HPC-MNF)
4. Phuoibuong -Vanlalsiemsang IND(INC le ZPM thlawp)
5. Suongpuilawn - Lalvenghim Hmar (HPC-MNF)
6. Vanbawng - Ricky Lalremsang MNF(HPC thlawp)
7. Ratu - H. Lalengzau MNF(HPC thlawp)
8. New Vervek  - Lalnuntluong MNF(HPC thlawp)
9. Sakawrdai South -Lalremruot Varte (HPC-MNF)
10. Zohmun - HC Lalmalsawm MNF(HPC thlawp)
11. Saipum -Lalrawngbawl Siekeng, (IND)

12. Saiphai - Lalbieknung HPC(MNF thlawp)


MNF & HPC ṭangkawp chuan hneh takin hnehna an chang a, sawrkarna an siam dawn a. Hetih lai hian tunge CEM dinhmun chelh ang a, Interim Sawrkar laia CEM ni lai Lalthlamuana Hmar hian a dinhmun ngai a luah leh ang em tih chu mi tam tak zawhna a ni nghal a ni.


Inthlan hi boruak muanawm tak hnuaiah neih a ni a, Mipuiin an ngaihlu hle niin kan thu dawnna chuan a tarlang.

 Mizoram Sawrkar chuan Sinlung Hills Council Inthanpui hi Sawrkar Hnathawk zawng zawng, (Central/State Public Undertaking) ten vote an thlak theihna turin SHC huam chhunga mi te tan  chawlh (public holiday)-ah a puang a. Vote a tla tha hle nia hriat a ni.

SHC huamchhungah hian Constituency 12; Khawlian Constituency, Phuaibuang Constituency, Suangpuilawn Constituency, Vanbawng Constituency, Ratu Constituency, New Vervek Constituency, Sakawrdai South Constituency, Sakawrdai North Constituency, Zohmun Constituency, Tinghmun Constituency, Saipum Constituency leh Saiphai Constituency te a awm.



Inremna ziah:
Mizoram Sorkar leh Hmar Peoples Convention (Democratic), HPCD chuan APril 2, 2018 khan State Guest House-ah Inremna thuthlung an ziak a.

Mizoram aiawhin Chief Secretary Arvind Ray an hming a ziak a, HPC(D) aiawhin HPC(D) Chairman Pu H.Zosangbera’n hming a ziak a ni.
An inrem dan chuan Sinlung Hills Development Council tih chu amaha inrelbawla, ram inpek thuah thuneihna a nei anga, sum leh pai ruahmanna budget pawh insiamin state sorkarah a thehlut anga, state sorkar kaltlangin central fund an hai ve remtih sak a ni dawn a ni. Sinlung Hills Council hian member 14 a nei anga, an zinga 12 chu thlan tur a ni a, 2 dang erawh state in SHC rawn chungin a dah thung ang. Chief Executive Member, Chairman leh Dy Chairman te inruatin executive member 4 an awm bawk anga, Sakawrdai emaw hmun dang remchang chu Council thuthmunah hman tur a ni a, Council hi inremna siam anih atanga thla 6 chhunga puitlin tura tih a ni.

HPC(D) in an Silai tung:
April 13, 2018 khan Mizoram sorkar leh Hmar People Convention (Democratic) HPC (D) te chuan inremna thuthlung Memorandum of Settlement an ziah tawh angin, HPC(D) hel pawlte chuan nunphung pangngai a awm turin CTI Sesawng ah an ralthuam te Mizoram sorkar ah an hlan ta. HPC (D) ten an ralthuam hi Home Minister Pu R Lalzirliana hnenah nimin chawhnu dar 1:30PM khan an hlan a, ralthuam chi hrang hrang an hlan ani, HPC(D) ten silai leh a mu (firearms leh ammunitions) an tun tak te chu hengte hi an ni: Sniper Rifle SRS A1 - 4, Self Loading Rifle - 1, AK Series Rifle - 9, Colt M4 Carbine - 1, Colt M16 Carbine - 1 leh Heckler & Koch Series- 6, DBBL - 1, Shot Gun - 1, M79 Grenade Launcher - 1, 9mm Pistol - 3, Baretta 9mm Pistol - 1 leh .32 Pistol - 3, Grenade - 5, M79 Grenade Launcher Shells - 10, Assault Rifle Ammunition - 2654, DBBL ammunition - 127, 9mm & .32 ammunition - 89, Detonator - 7, Weapon Magazine - 48 leh Radio Set - 5 te a ni.

Sawrkar lailawk lakluh:
Sinlung Hills Council sawrkar lailawk (interim) chu thla 6 chhung atan July 13, 2019  chhun dar 10 khan Aizawl bawrhsap, Dr. A. Muthamma chuan a office chamber ah a rinawmna tiam tirin Sawrkarin a ruat member 2 te nen 14 a la lut.
Lakluh inkhawm hi Pi A. Muthamma chuan kaihruaiin, SHC CEM, EM leh member ten thutiam  an la.

Mizoram Sawrkar leh HPC(D) inbiak laia spokeperson Pu Lalṭhalien chu CEM atan lakluh niin, Pu LT Hmar, Inbiak laia HPC(D) working Chairman chu Chairman atan lakluh a ni a. Pu Lalbiengnung, inbiak laia HPC(D) Army Chief chu Deputy Chairman a tan lakluh a ni.

EM atan mi pali, Pu Darliensang Ralsun, Pu JC Zairemkunga, Pu Lalthlamuana Hmar leh Nl. Melody Lalchhuangzeli te lakluh an ni a.

Council member atan Pu Rohringa Hmar, Py Lalrinsanga Ralte, Pu Benjamin, Pu B. Lalṭhachhunga, Pu Lalremruata te bakah sawrkar ruat pu Lalmalsawma Darngawn leh Pu Lalrammuanpuia te lakluh an ni bawk.

Interim sawrkar pawhsei vawi 1na leh Sawrkar lailawk lakluh vawi 2na:
Hemi hnu hian SHC chu thla ruk dang atan pawtsel lehin, February 7, 2019 khan SHC sawrkar lailawk chu a vawihnihna atan lakluh ni lehin Lalthlamuana Hmar chu CEM atan lakluh a ni a. Lakluh inkhawm hi Aizawl District addl DC 9DC Charge latu) VL Hruaizela Khiangte in a kaihruai a ni.


Interim sawrkar pawhsei vawi 2na:

Hemi hnu, July 4 2019 khan Mizoram  Sawrkar chuan SHC interim sawrkar chu thla 4 dang atan a pawtsel leh a, tun dinhmun hi a thleng ta  a ni.

Post a Comment

0 Comments