khawzawl-ah Deputy CM Tawnluia Ropui taka hmuah a ni; District urban Development office a hawng

Aizawl | November 5, 2019: Vawiin chawhma khan Deputy Chief Minister Pu Tawnluia, bialtu MLA ni bawk chuan naktuka Khawzawl district thar lawmna tur pualin Khawzawl a thleng a, mipuii ropui takin an lo hmuak.
Deputy CM hian District Urban Development Office, Khawzawl a hawng a,  he hunah hian Veterinary & Fishery Board Vice-Chairman C Lalmuanpuia, MLA leh UD&PA Directorate a hotute leh thawktute bakah Khawzawl mipui thahnem tak an tel a ni.



He hunah hian Deputy Chief Minister Pu Tawnluia chuan mipuite duhsakna dawnga sawrkarna an chang chu lawmawm a tih thu a sawi a, ram leh hnam hmasawnna tura hnathawhna tipuitling tur chuan kawng tinrenga mipuite nena thawh ho a ngaih thu a sawi a ni. Ropui taka khawtlang hruaitu, school naupangte leh mipuiten an lo hmuak chu lawmawm a tih thu sawiin, mipuiin an aiawha rorel tura an thlanchhuah a nihna chu a ngaih pawimawh hle thu a sawi bawk. Deputy CM chuan hun rei taka a ta an lo beisei thin District nihna dinhmun an chang ta chu a lawmawm hle rualin a tih changtlunna kawngah hma lak mek zel a ni a ti a, chung hmalakna zinga pakhat DUDO hun reilote chhunga hawn theih a a awm chu lawmawm a tih thu sawiin tangkai taka mipuiten chhawr thei turin leh hmalakna la awm zel turah pawh khawtlang hruaitute leh mipuiten inhawng taka lo dawngsawng a,  a tul apianga lo tawiawm zel turin a chah bawk a ni.

Pu C Lalmuanpuia, MLA pawhin thu sawiin sawrkar hmalakna hrang hrang leh Khawzawl a DUDO kaltlanga hnathawhnaahte pawh neitu nihna thinlung pu chunga a tul apianga thawktute tawiawm thin turin a chah bawk.

Vawiin DUDO hawnna hun hi Pu Joseph H Lalramsanga, Director, UD&PA in kaihruaiin kalkhawmte lawmna thu a sawi a khawtlang hruaitu aiawh atanga thusawite ngaihthlak niin Pi Rita Lalnunmawii Pachuau, Joint Director, UD&PA in report a pe a, Pu H Lianzela, DC Khawzawl in lawmthu sawina hun a hmang bawk a ni.

Deputy Chief Minister Pu Tawnluia hian DUDO a hawn zawh hian Khawzawl Police station ah thil tisual man chhuah kawnga kumtlinglote police station a kawl leh thil zawhfiah a ngaih chang a an awmna tur, 'child friendly environment' awm theih nana buatsaih Children's Corner a hawng nghal bawk a, District Child Protection Office, Champhai leh Police Station, Khawzawl a thawktute nen inkawm hona hun an hmang nghal a ni.

UD&PA department hnuaiah hian District Urban Development Office 5 awm mekin chhungte chu lunglei, champhai, mamit, serchhip leh kolasib ahte a ni a, Khawzawl district DUDO hi a 6-na a ni.

Post a Comment

0 Comments