Open Letter to CM & Dy CM

Open Letter to:

1) Pu Zoramthanga,                       

Honourable Chief Minister Mizoram, Aizawl.

2)   Pu Tawnluia, 

Honourable  Dy. Chief Minister Mizoram, Aizawl.

From:  Lalthanliana              

Former Corporal K.Battalion MNA.

Ka pu, Chibai ule.

Mizoram zalênna atân independent sualin in hnung zuiin kan rammu a, Kan hrehawm tuarna leh retheih dân te kha chu sawi ngai lovin a hretu in nih kha.  Kan țhiante mi tam takin thisen chhuaka nunna hial an chân tawh hnûin, "Zalênna kan sual chhan ber Zoram mipui ten rambuai an tlin tawh ngang lo va, an mangang authawm leh NGOs leh Kohhran te ngenna a zahawm si a, STATE hi kan duhthusam ni lo mahsela kan inrem phawt a ngai a ni, State hi kan tawpna tûr a ni lo va, over ground in kan bei chhun zawm zêl dawn a lawm," in tih avângin, hreh tak chung leh mittui tla chungin kan râlthuamte tungin rammut kan chawlhsan ta a nih kha.

Khatih lai khân hlauhthawn rûk lian tak kan neih avângin, "Zoramah chuan hawng ta ila nangni kan hotute chu Minister te MLA te in ni anga, keini in sipaite hi engtin nge kan awm ve tâk ang ? Rethei takin mi hmuhsit leh nuihzatburin kan awm mai ang tih kan hlau a ni," tih zawhna in chhânna kha in la hre reng em le? "A fawng kan vuan dawn alawm lungngai suh u, in rethei lo vang," in ti a nih kha. Tichuan, Nangni chu Chief Minister te, Minister te, MLA te in lo ni ta ngei rênga, lawm em em in kut bêngin kan lo lâm ve a ni. Nimahsela, hmân a kan hlauhthâwn rûk ngei mai kha a takin a lo thleng ta !

Nangni kan pute ho leh kan sipai pui in zâr zo phâk chin mi tlêmte te chu building ropui chhûngah, in duh leh châk a piang ei a in theiin, in duh a piang silh a fêng theiin, in duh leh in ît zawng a piang lei a nei theiin, Sofa seat dûp nuam taka țhu a, Khum changkàng leh nuam thei ang ber a mu a, țhutthleng vir thei a in țhut vir muai muai lai leh high class tak meuh a in khawsak tawh lai hian, KEINI zalênna in sual pui, hrehawm taka in hnung zuitu in sipai te,   "Va kal rawh, va kâp rawh, i thih pawh in i thihna hi a dik a ni," ti a râl kâr a ring rawlh tak meuh a in tirh țhin te, in chawei a tui lo anga rilțamin in awm palh ang tih hlau va rim taka in ei tûr ngaihtuah a thawk chhuak tute, thin thiin in mu lo palh ang tih hlau va chhûn zân zawm a in lû vêng țhin tute, remna avânga Mizoram a in hawpui in sipai tam zawkte erawhchu, mi In hnuai luah a rethei taka khawsa ve țawk țawk in, nupui fanaute bulah hmai uanglo leh zak ngawih ngawihin kan nung ve hram hram a, kan țhian zalênna kan sual puite ngei RUANG mi In hnuai ațanga zawn chhuak a, Thlânmual lam kan han pan pui ve țhin te hi nâ kan ti em em a, kan mittui a tla țhin a sin !

Mi tam tak hi chu nun dân kan thiam loh êm avânga rethei kan nih rual in, mi tam zawk hi chu ding khawchhuak ve tûra ngaihsak kan hlawh loh avânga rethei, kal ngaihna hre lo va Zû leh Drugs ngawlvei ta mai mai te kan ni a sin !

Mahse, hetiang taka dinhmun chhia ah hian in sipai te hi ding rih mahila, kan hmabâk hi retheih luat vânga rûkrûk leh mi pawi khawih avânga mi ten, "zalênna sualtu nuihzatthlâk," min tih mai loh na tûra retheihna khur ațanga min chawi chhuaktu tûr Sawrkar thar nei leh ta ah in ngaiin kan thinlung chhûng ril hi a lo lawm ve em em a ni.

1986 a mizoram a kan haw chhoh hnû hian kan tangka dawn tawh zawng zawng hi     Rs 1,34,860 chiah niin ka hria a, chu pawh a hlawm ni lo lehnghal in. (Ka hriat sual chuan min ngaidam ula) Heti zât tangka hian chênna tlâk In leh Lo pangngai tak hi nangni ngei pawh hian in din theih bîk ka ring lo.

Chutiang chu in sipaite dinhmun a nih laiin, Kan mikhual Tuikuk ho, an duh thu ngei a kan ram chhuahsan a, Mizote min that a, Central Sawrkar hnên a dawta min hêka, Court a min khing tute erawhchu, Mizoram a an rawn kîr leh chuan,                                 

(1)  Financial Assistant atân Rs 4 lakh chhûngkaw pakhat zêl ah pêk an ni ang.     

(2)  In sak nân Rs 1,50,000 an dawng ang.                       

(3)  An rawn thlen a an chênna tûr Rs 7,500 man zêl ngaihtuah sak an ni ang.                            (4)  Thla tin Rs 5,000 chhûngkaw pakhatah kum 2 chhûng pêk an ni ang.                       

(5)  Buhfai free Ration puitling pakhat tân 600 gram, naupang tân 300 gram kum 2           chhûng an dawng ang.                                 

(6)  Blanket leh thildang atân Rs 3,500 an dawng ang, tiin tiam an ni em kha ?

   Mizoram tâna zalênna sual a in rammut pui te chan erawh chuan kan mikhual Tuikuk te chan chu sawi loh, Maian chan pawh a tluk zo lo leh mi tam tak ten, zalênna sual ah pawh min ngai lo va Gang rual ang leka in sipaite min han sawi țhin te hi a va na teh lul em !  Nangni Lalțhutthleng a țhu te berin mahni sipai te pawh ngaihsak lo va, min thlauh thlâk avângin chu chu kan chan tûr a nih mai loh nâk ah !

Sawrkar hnaah a theih chin chin chu Mizoram Sawrkar in min thun a alawmawm tak zet a ni. Nimahsela, mi tam zawkte hi chu 4th grade bâk thawk phâk ve lo kan nih avângin, hlawh ațanga In leh Lo din a harsat zia chu min hriat thiam pui ka ring.

Awle, tunah kan pu te Chief Minister leh Dy, Chief Minister in lo nih leh tâkah chuan, in duh a piang ti zêl thei chu in ni bîklo tih chu kan hria, mahse, zalênna in sualpui, thih leh rûam khatah, dam leh mual khatah aw in tihpui, remna avânga in hawpui ngei mi tlêmte nangni nên mi 572 te kha, In leh lo kan din ve a kan dam khawchhuah ve theih nân Rs nuai 40/50 thleng pawhin plan leh budget siam in emaw, kawng dang emaw pawh dap ta ula, kan ram mipui tam zawk hian min thîk chu sawi loh min lawmpui lutuk anga, politician țha ber leh hmangaihna nei tiin chawimawina Nopui an dawm tîr zawk ngei ang che u.

A tawp berah chuan, nangni kan pu te ho Chief Minister te, Minister te, MLA te in lo nih theih nachhan hi in la hre reng em aw? Pu Laldenga kha MNF president a nihna ațang mai pawh ni lo vin, MNF primary member ațanga paih chhuah a ni a, nangni pahnih pawh Delhi ațanga Capital Headquarter in rawn thlen leh khân, kha tih laia MNF president khân in hmêl pawh a hmu țha duh lo che u a nih kha. Pu Laldenga leh a sangawizâwnpui te chu dam reng chunga politics a in lû phûmbo hlauh an tum lai che u khãn, kha tih lai a Vice President Pu Rualchhina leh in sipaite hi in hmâah dingin, kan hotu lian in lam țanglo zawng zawng te kha nam kiangin, MNF chhûngkaw lalțhutthleng kha Pu Laldenga leh nangni ho kutah khân kan hlân lêt leh a nih kha. Chuvâng tak meuh chuan vawiin ah hian Chief Minister te, Dy. Chief Minister te, MLA te niin, in Motor ah VIP light in vuah thei a, VIP Bungalow ah mi pawimawh niin in chêng thei ta a, tun a in dinhmun in luah theih nachhan hi in sipai tun a in ngaihsak duh loh te thawhrimna avâng chauh hi a ni a sin.

Chuvângin, remna avânga Mizoram a in hawpui te hi rilru nâ leh beidawng a siam lo vin, țhatna in rûl ve ngei rawh u. Chu chu a Pathian thu em em a ni. In thih ai pawh thi ngam khawpa hmangaihtu che u, Peace Accord MNF Returnee te'n chênna tlâk in kan duh ve a, mualpho taka in dîl ngai lo va theih tawp tak meuh a min ngaihsak hi chu in bat a ni tlat a ni. 

In Kutah thil tih theihna a awm tih hriain, in  sipai te'n kan thlîr reng a che u.          

                                            

Pathianin awmpui che u rawh se.

(LALTHANLIANA )