Ni thum awh tur Zawlbuk Group YMA Sports Meet ṭan

Aizawl | November 12, 2019: Ni thum awh tur Zawlbuk Group YMA Sports Meet - 2019 hawnna chu vawiin khan  Sesawng playground a neih a ni a. Central YMA Vice president Lalhmachhuana'n khuallian niin a hmanpui.

Hawnna programme hi Zawlbuk group YMA president PC Lalbiakchama'n kaihruaiin Khuallian sports meet hawn nan YMA Puanzar a pawrpharh.


Khuallian chuan, YMA chu pawl thianghlim tak a nih anga thianghlimna vawng nunga, sports meet-a duhtawk mailo turin a chah. Ṭanpui ngaite ṭanpuitu pawlah in Baptist thar leh a, YMA principle/nihna ah ding nghet tlat turin memberte a sawm a.

Zirna chungchang sawiin, kan pi leh pute khan Zawlbuk huang chhungah tlawmngaihna, aia upa zah, hawihhawmna leh nungchang mawi chitin reng an lo zir ṭhin a. Lehkha zir ngawr ngawr ni lovin, heng nungchang mawi zawng zawng zirna hi a huam tel a ni a ti.

Khuallian chuan, Mizo hmeichhia ten hma an sawn chak zia ngaihtuah in, Mizo mipa ten ṭan kan lak a ngaih thu a sawi a. YMA chu pawl thianghlim, Kohhran zawng zawng, political party zawng zawng leh mitin mai hi YMA Flag zar hnuaiah kan leng vek a ni, a ti.

Zawlbuk Group YMA huam chhungah hian YMA Branch 23 awmin, YMA member 10,211 an awm a,  Sports meet ah hian YMA  branch 18 an tel a. Football (Mipa), Volleyball (Hmeichhia), Insuknawr (Mipa) leh intlansiak 200m (Mipa leh Hmeichhia) ah te inelna neih a ni ang.

Zawlbuk Group Sports Meet hi Chalfilh Group leh Ṭawitlang Group YMA ten an telpui a. Meet hi vawiinah ṭanin November 14 hian a ṭiak ang.

Post a Comment

0 Comments