Ni thum awh tur North East Riders Meet vawi 11na Chalfilhah tan

Aizawl | November 26, 2019: Royal Enfield Rider-te tana kum tina an hun pui leh kutpui, North East Riders Meet vawi 11na chu zanin khan ropui takin Chalfilh tlangah tan a ni.
He hunah hian Northeast leh India hmun hrang hrang atangin riders sang chuang an rawn tel a, kawng laka la thang mek leh Aizawl-a riak ta te pawh an la awm.

North East Riders Meet hi Aizawl Thunders in an thleng a, he hunah hian Aizawl Thunders kum 20 tlinna lawm a ni bawk ang.

NERM chhung hian chhun lamah rider-ten intihsiakna hrang hrang an hmachhawn ang a, Zanah hun hlimawm, Concert leh DJ nite ten hun an hmang ang.

 

NERM chu engnge?

NERM (North East Riders Meet) hi kum 2009 atanga Riders te tana hunpui atana bul tan niin, Royal Enfield nei ten an hlut hle. He hunpui hi North east chhunga Rider inzawmkhawmna NEAR (NorthEast Alliance of Riders) hnuaia pawl hrang hrangten a inchhawkin an dawlin an thleng thin a. NEAR din chhan angin thupui-ah  ‘When We Meet We Grow’ hman a ni thin. kumin hian Aizawl Thunders in an kum 20na pualin  Vanzau Tourist Resort, Chalfilh,  Khanpui khaw bul-ah an thleng a, he kut hian November 28 zan thleng a awh ang.

NEAR chu?

NEAR (North East Alliance of Riders) hi kum 2013 Champhai-ah North East Riders Meet (NERM) vawi 5-na neih a nih tum khan din a ni a, he pawl hian North east chhunga Rider pawl hrang hrangte a puarkhawm a, a enkawl a ni. NERM thleng tur hi NEAR chiefs, moderator-te leh NEAR hnuaia inchhunglut pawl hrang hrang aiawhte inhmukhawmin thutlukna an siam thin. Rider pawl hrang hrangte NEAR hnuaia inziaklut tur hian a zawnin NERM ah tum thum chhung an member mi 10 aia tlem lo an tirh ngei ngei a ngai.

NEAR hian hruaitu thlanna an nei ngai lova, kum tina NERM thlengtu tur club te hnenah khan thuneihna a awm mai thin a ni.

Aizawl Thunders:

Aizawl Thunders hi thianho Bullets (Royal Enfield Motorcycle) nei inzawmkhawmin  1999 a an din niin, chung hunlai chuan Aizawl Bullet Club tia koh an ni a.  1999 Niovember 5 khan Ride hmasa ber neiin chu chu an dinni atana pawm a ni a. mahse, 2003 khan miin an hriatlar nan Aizawl Thunders tiin an inko a, hmi hming hian hriatlar an lo ni ta bawk a ni.
Aizawl Thunders hi kan hriat theuh angin Tanpui ngaite tanpui kawngah an thawh hlawk hle a ni.

A hmun;

Vanzau tourist resort hi Chalfilh Tlang a awm niin,  Khanpui khaw bul lawka awm a ni a, Aizawl atangin km 100 vel lek a ni.