PUC Miss 2019 Mimi C Rinpuii

Pachhunga University College nula chhuanvawr, PUC Miss 2019 Mimi C Rinpuii in tan kan rawn chhawpchhuak leh e. 

Mimi tia koh thin Mimi C Rinpuii hi Lalmuanpuii Colney leh Chawngthansanga te fanu neihchhun leh nupang ber niin, u nuta pahnih a nei a ni.


 

Mimi C Rinpuii hi 1999 March 14 khan a piang a, Mission veng, Aizawl a awm an ni a, Mizoram Presbyterian Kohhran ah an lawi.


Mimi C Rinpuii hian pawl 10 kha St Paul's HSS atangin 2015 khan distinction ah a pass a, Pawl 12 hi Oikos HSS atangin 2017 khan Distinction (6th rank) ah a pass leh a, tunah hian PUC ah B.A (Sociology) a zir mek a ni.

Hobby: Dancing, Reading

A duhzawng leh ngainat zawng hrang hrangte?
Lehkhabu duh: The best laid plans
Actor/Actress: Leonardo DiCaprio / Scarlett Johansson
Model: Barbara Palvin
Zaithiam: Beyonce, Andy Grammar
Chawhmeh: Bai, Alu, ar sa
Hla : Rise - Katy Perry
Hmun: Iceland ka tlawh chak ber a, Mizoram chhung khawi hmun pawh hi a mawiin a nuam vek em em bawk.
Rawng: Grey 
Ziaktu: Sidney Sheldon



 

Mize ngainat zawng: Mi tumruh leh taima ; a hun leh a hmun azira in adjust thiam , rilru zau tak pu mi ; hna engpawh thawk se , rinawm taka theihtawpa thawk mi , hmasawn tum mi leh Pathian tih mi.

Mize ngainat loh zawng: 
- Mi thatchhia , hmasawn tum lo; midangte dinhmun hrethiam duh lo leh rilru tê leh zîm tak nei; mi chapo.

Kawppui tura duhzawng?: 
- Nu leh pate thu ngaichang thiam, mi taima leh tumruh; ka tuina lama min tuipui a, min support tlat tu, mi rinawm, zaidam leh midangte dinhmun hrethiam tu, Pathian tih tlat mi.

Relationship status: single

Aim in life: IAS



***Website a fakna hi lo click ve keuh rawh le.***



College Miss thlanna a tel chhan?
-  Kan zirtirtute leh ka classmates, thian tha ten tel ve tura min thlan chhuah avangin ka tel a ni.

College Miss a I thlen chin? tuna I nihna hi thlen I ring reng em? 
- Pathian vang liau liauin Miss Puc title ka la a , he dinhmun hi ka thlen phak ka inring ngai lo a, a chhan chu ka telpui te hi kei aiin an tha vek a ni.

College Miss in I nuna nghawng a neih?? 
- Inrintawkna min pe a , thian thar tha tak tak ka neih phah bawk a, engkimah inzirna tur ka la ngahzia min hrilhfiah bawk a ni.

Modelling lam hi I tui em? 
- Tui em em lo.

College Miss thlan dan tlangpui? 
- Kan college-ah chuan screening an nei phawt thin a. Screening-ah chuan department hrang hrang atanga thlan chhuah 1-5 semester te kan marksheet kengin, interview kan hmachhawn a. Kan marksheet an analyse a, interview-a kan tihthat dan azirin top 10 an thlang chhuak ta a. Chung top 10 te chu kan inel a. Cultural round, As you like it round, evening gown round leh question&answer round te awmin, heng round hrang hranga kan chet that dan azirin miss PUC an thlang chhuak thin a ni.


 

Zawhna dang:
1. A tel lova i awm theih loh: Ka chhungte

2. I nun kaihruaitu: Ka nu leh ka pa .

3. Hringnuna i hlauh ber: Ka nu leh ka pa chawm let loh

4. I tih ngai miah loh tur: Ka mihringpuite hnuaichhiah / Hmuhsit

5. Mizo Tualzal nuna ṭha i tih: Tlawmngaihna , chhiatni thatnia kan inpuih tawn thinna .

6.  Quote i duh ber: Define success on your own terms, achieve it by your own rules , and build a life you're proud to live . 
    - Anne Sweeney 

7. Mizoram leh Mizo tualzal nuna Mizo hmeichhiate dinhmun: 
- Hmanlaia Mizo hmeichhiate dinhmun ngaihtuah chuan tunah chuan Mizo hmeichhiate dinhmun hi a tha thawkhat viau a , kawng engkimah hnam dang aiin Mizo hmeichhiate kan zalen bik hle a , Mizo mipaten kan dinhmun chawi san kawngah min pui nasa em em bawk a , kan dinhmun hrethiamin min duat thiam a . Hna hrang hrang leh lehkha zirna kawngah pawh hma kan sawn em em a , dinhmun sang leh tha ber berah kan awm ve tawh a ni. 

8. Hnam hmingṭhat leh hmingchhiat kawngah Hmeichhiate'n mawhphurhna: 
- Hnam hmingthat leh hmingchhiat kawngah chuan Mizoram pawna Mizo hmeichhiate nun dan hian a hril thui berin ka hria a . Hnam dang bula kan awmin , kan "mizona" hi kan theihnghilh tur a ni lova , zahawm tak leh hawihawm taka hnam dang bula awm a tulin ka hria a . Kan hnam tih dan phung leh inchei dan te hnam dangin an lo hriat a, an ngaihsan theih nan , kan nungchang leh Kan incheina uluk a thain ka hria a , Mizo society chu conservative society kan nih miau avangin.  Tin , lehkha zirna kawngah te leh kan hnathawhna kawngah rinawm takin a "ber" nih kan tum tlat tur a ni .

9. Hnam ziarang chawinun kawnga Hmeichhiate mawhphurna: 
- Hnam ziarang chawi nun kawngah hian hmeichhia te hi kan pawimawh em em a , a chhan chu Mizo tam tak puitling taka enkawl chhuaktu chu tu dang nilovin nu a ni a . Nuten fate enkawlna kawngah mahni hnam ziarang ngaisang thei tur leh zah thiam thei turin fate hrilh hriat an ngai em em a . Mahni hnam ziarang ngaihhlut a pawimawhzia tetlai atanga an hriat chuan puitling an nih thlengin hnam tan a tangkai dawn em em a . Tin , hmeichhiate hian kan ngaihsan zawng hi kan uluk a tul ve hlein ka hria , hriat loh hlanin kan Mizo mipa te hian kan ngaihsan zawng anga awm ve hi an lo tum thin a , mahni hnam ziarang kan ngaihsan thiam chuan , Mizoram pumpuia chawi nung ang kan ni dawn a ni . 

10. Mizote tan 'Fa neih tlem' inzirtir hi a ṭulin i hria em? 
- Mizote hi kan la tlem em em a , fa neih tlem hi a tul ka ti hran lo a . Mahse , chhungkua kan inang lo a , chawm zawh loh tur fa tam tak neih ai chuan , family planning mumal tak neiha , mahni chawm zawh tawk fa neih tluk a awm lo in Ka hre ve a . Family planning tha tak kan neih vek theih chuan intluk tlang takin kan khawsa zawk thei ngeiin ka ring. 

11. Mizo hnam ṭhanmawh bawk nia i hriat?
-  Thatchhiatna hi a ni ber maiin ka hria a. Social media kan khawih vek a, ram changkang zawkte hmasawnna kan hmu a , kan awt em em vek a . Mahse a tak tak a tih tum ve na , mahni kea din tumna tak tak hi kan nei chiah lo hian ka hria a. Hnam dangte 'work culture' hi kan lakluh hi a tul hle in ka hria . Chuti lo chu hnam intodelh kan ni har lutuk palh ang.


 

12. Mizo hnam damna atana  kawng awm nia i hriatte? 
- Hmasawn tum tlatna rilru kan put vek hi a ngaiin ka hria a, nula awm mai mai, tlangval awm mai mai nih te hi a zahthlak a. Hnam dangten min zah theih nan leh min chung en ve theih nan hnam inlungrualna a pawimawh hle in ka hria a. Hnam dang Hausa te tham lungawi theih ni lo turin kawng engkimah rinawmna kan neih a ngai a, kan "mizona" hi thil thing sawi nana hmang lova, kan ngaihsan tlata Kan ngaihhlut phawt chuan kan hnam hi a dam em em ang.

13. Hnam chhan nana Hmeichhiate ṭangkaina leh mawhphurna? Sawi tawh ang khan , hnam dangte bula kan awmin zahawm takin kan awm thiam tur a ni a . Mahni hnam nihphung kalha kan khawsak loh phawt chuan kan hnam chhanna kawngah hma tha tak kan la tihna a ni a . Mizo mipaten nasa taka hnam tana an beih laia , theihtawp chhuaha an hnung kan dawl zawh thiam phawt chuan , Mizo hmeichhe nu hnâp hian Mizo mipate chakna tam tak kan pe thei a ni . Tin , zirna kawngah pawh a ber nih tum theuh ila , hnam dangin an thawh theih chu kan thawk ve thei a ni tih hriain , chimral ni lo turin theihtawp kan chhuah tur a ni.

14. Zirna, Khawtlang leh Kohhran hi? 
- Mizo kan nih chhung chu zirna , khawtlang leh Kohhran hi lak hran theih a ni lovin ka hria a . Kan hnam tan theihtawpin zirna lamah hma kan la tur a ni a , Mizo nunze mawi tak Tlawmngaihna kan lan chhuah tir theihna chu khawtlang leh Kohhran hi a ni a , kan kristiannain a ken tel tlat chu Kohhran hi a ni bawk a . A pawimawh dan inang tlang vekin ka hria a . Mahse zirlai nih chuan thahnemngai taka inhman kim vek a har em em a , chutah tak chuan time management hi a pawimawh hle in ka hria a . Time management kan thiam chuan rual khai takin zirna, khawtlang leh Kohhran ah hian kan tangkai vek thei a ni.

15. Khawtlang, Kohhran leh nangmah: 
- Zirlai ka la nih angin , khawtlang leh Kohhran a a kul a taia inhman hi ka la thei chiah lo a . Mahse ka theihna mualah chuan tangkai ka tum ve hle a . Kohhran lamah hian theihtawp chuan ka inhmang ve a , khawtlang lamah erawh hi chuan chhiatni thatni tih lohah chuan tangkai belhna em em hi ka la nei hran lo a ni.


 

16. Social Media leh Nangmah: 
- Instagram leh WhatsApp ka khawih a. Social media hi chuan min tibuai em em hian ka hre hran lo a. Ka hmang tangkai ve bawkin ka hria. A bikin WhatsApp hi a tangkai ka ti hle a, a informative hlein ka hria . Chuan, video hmuh nuam lo tak tak leh thu dengkhawng leh belhchian dawllo an post thin hi chu ka lo ngaimawh thin .

17. Mizoram ṭhalai tam tak tlakchham: Mizoram thalaite hi kan changkangin hma kan sawn em em a . Mahse a tam zawk hi chuan hmasawn tumna rilru kan la nei lo mah mah in ka lo hre ve a . Tih tak tak peihna nun , rilru nghet leh tumruhna hi kan la nei fumfe lo deuhin ka hria a . Chuan , tum mumal nei lem lova lehkha zir hi kan la thahnem deuhhlek bawk a .

18. Mizo ṭhalaite hian ngaihsan tur dik an ngaisangin i hria em? 
- Ngaihsan tur dik leh dik lo bik hi a awm hran lo a , thil engpawh emaw tupawh emaw lo ngaisang ila , kan nuna nghawng tha tak aneih chuan a tha a ni mai a . Mizo thalai te pawn ngaihsan zawng tha tak tak kan nei teh meuh mai , mahse an nun dan phunga a tha lam lak hi kan harsat ka ti a , a tha lo lam lakluh hi ka ching deuh zawk mahin ka hria.

19. Ngaihsan tur dik nia i hriat: 
- Kan ngaihsan zawngte hian kan nun a nghawng thui em em a . Tupawh lo ngaisang ila , a tha vek a , mahse pawimawh chu Kan ngaihsante khan Kan nunah nghawng a nei ngei ngei dawn a , a tha lam zawngin nghawng (influence) a nei em tih hi kan in zawh nawn fo a ngai a . Kha kan mi ngaihsan khan kan career ah contribution eng anga tam nge a neih tih te inzawt thin ila . Tun atanga kum 5-10 ah chuan engemaw tak nih Kan duh theuh a, chu kan thil nih tum chu thleng thei turin Kan mi ngaihsan zawng hian min pui em tih hi Kan ngaihtuah rân tur a ni . Chutiang kan ngaihtuahnaa a awm phawt chuan ngaihsan tur dik tak kan ngaisang vek ngei ang.

20. Hlawhtlinna tura pawimawh: 
- Ka ngaihdanah chuan hlawhtlinna tur atana pawimawh chu sap tawnga consistency kan tih hi a ni a , tei rei peihna ,beih fan fan peihna te pawh a ni awm e. Mizote hi kan thluak a tha em em a, thil engpawh zirin thawk ila , kan man zung zung thei a . Chutiang khawpa thluak tha nei si hi kan tuar a fei lo mah mah thin a , a sang ber a kan awm hma in Kan chawlhsan leh mai zel a , hei hi a pawi Ka lo ti ve em em thin a . Beidawng lova kan beih tang tang peih chuan tupawh mai hi kan hlawhtling thei a ni.

21. hloh i hlauh ber: 
- Keimah leh keimah hi inhloh ka hlau ber . A chhan chu mahni ka inhloh chuan midang tana ka tangkai ve theihna te , midang tana ka thiamna ka hman ve theihna te a bo anga , khawtlang leh Kohhran tana ka tangkai ve theihna te a bo bawk anga . Keimah leh keimah ka inhloh chuan hnam chhan leh chawisanna kawnga Ka tih theih ve tawk , zahawmna te a bo zo anga , ka chhungte, thiante leh zirtirtute pawh ka rul let thei dawn si lo a , chuvang chuan mahni leh mahni inhloh ka hlau ber a ni . 

I thalaipuite tan fuihna-
-- Sawi ngai bawk han sawi leh ila . Mizo thalaite hi tih tak takna nun kan neih a ngai a, kan tei rei peih phawt chuan Kan tum ram hi kan thleng vek thei ang. Chuan mahni hnam chhan leh humhim kawngah theihtawp chhuahna chang hi hria ila, Mizoram bak hi ram dang kan nei lo tih hre chungin, Mizo takin hnam dangte chimral ni lo turin hnam intodelh nih tum theuh ila. A tawp ber atan thil dang daih han zep lawk ila. Mental health hi ngai pawimawh ila ka ti em em a, Kan bul hnaia mi te tan harsatna leh hrehawmna kan thlen em tih hi inzawt ila, midangte rilru natna thlentu kan ni ang tih hi a hlauhawm hle a. Midangte tana malsawmna nih tum theuh ila, midangte rilru hahna te, an hrehawmna te, an harsatna te hriatthiam puia, sut tlang pui turin midangte tanpui inpeih reng turin Ka thalaipuite ka sawm mawlh mawlh bawk a ni. Midang tih tura dah bik lovin Kan hmazawna thil pawimawh awm chu tha taka kan lo tih ve mai hian hlimna a thlen zawk a ni.  

 

exploremizoram.com i hmuh dan: 
- Explore Mizoram hi a tha ka ti em em a, a bikin Mizo thalaite tan exposure tha tak niin ka hria. News bengvarthlak tak tak kan hriat theih phah a, mi tam takin kan lo hriat loh leh ngaihven lem loh te kan hriat phah thin a, a nachang in hria ka ti em em a ni. Tin, keimahniah ngei pawh hian interview kaltlanga ngaihtuahna min hman tir ringawt pawh hi a hlu em em a ni.



Admin - Columnist

EXPLOREMIZORAM.COM


***Website a fakna hi lo click ve keuh rawh le.***




_________________

TT Arts, Chanmari Aizawl-ah T Shirt print hrang hrang an ti thei a, Explore Mizoram T Shirt pawh cheng 600 in lei tur a awm bawk e.


Call/ WhatsApp +919615332721









(A hnuaia fakna hi lo hmet ve rawh.)

1 Comments

He post chungchanga i ngaihdan lo sawi ve rawh:

  1. Van chhang tha em.Nun dik Tak in awm chho zel a.i tum ram future thleng ngei la.God be with u and keep you

    ReplyDelete

Post a Comment

He post chungchanga i ngaihdan lo sawi ve rawh:

Previous Post Next Post