Higher Secondary Zirlaite tana hostel Mizoram CM in hawng

Aizawl| October 11, 2019: Mizoram School Education Department leh CYMA hmalaknaa sak, Aizawl-a Higher Secondary School zirlai awmna tur neilote awm theihna tur hostel, Rs. 520.48 lakhs hmanga Lawipu a sak chu nimin khan Mizoram CM Zoramthanga chuan a hawng.



Chief Minister Pu Zoramthanga chuan zirlai awmna tur neilo te tan hostel nuam leh him tha tak siam sak a ni chu lawmawm a tih thu sawiin, tangkai taka hman chhoh zel a nih a beisei thu a sawi a. CYMA te pawhin hostel din theihna tura ruahmanna fel tak an siam chu lawmthu a sawi. Chief Minister chuan ram hmasawnna tur atana hmalaknaah kan rama hmasawn theihna tur malsawmna kan neih sa kan resources awm ang angte hi ruahmanna fel tak, kim taka thlirna nen a tangkai thei ang bera kan hman thiam a pawimawh a ni, a ti a. Mizoram chu thenawm state leh ramte nen khaikhin chuan phai zawl rem tak tak, awlai taka hmalakna kalpui theihna hmun angin langlo mahse ram chhengchhe zawkte pawh tumruhna leh ngaihtuahna fing tak hmangin ram changkang a siam a nih thu a sawi a. Mizoram ah pawh assets awm sa hrang hrang - a chhunga chengte chawm zo thei ram zau, boruak nuam, ruahtui tha, lui tam tak leh a mi chengte pawh tawng khat hmang, sakhaw khat vuan - heng zawng zawng hmang tangkai hian Mizoram hmel hi a thlak danglam theih a ni, a ti. Mizote chu thiamthil chi hrang hrang nei ngah hnam, India ramah pawh tum phawt chuan hruaitu nih theihna nei ngah kan nih thu sawiin Chief Minister chuan Mizo nih a ropuizia lantir tura mawhphurhna chu Zoram mipui zavaia chungah a awm thu a sawi a. Chumi tur chuan ngaihtuahna seng ho a, mahni zawn theuh a tih theih leh tih turte thahnemngai taka thawk tlang turin Chief Minister chuan mipui a sawm a ni.



 Hostel hawnna inkhawmah hian School Education Minister Pu Lalchhandama Ralte chu khualzahawm niin Sports & Youth Services Minister Pu Robert Romawia Royte pawh a tel a ni. Hostel hi School Education hmalakna in NLCPR, DoNER Ministry atanga sum sanction hmanga sak a ni a. He hostel sakna hmun hi Central YMA ram niin, anni leh School Education Dept. chuan inremna an lo siam tawh angin a enkawl zui hna pawh vawiin hian Central YMA kutah hlan a ni. 


School Education Minister Hostel hawn a ni chu lawmawm tiin, hun rei tawh tak atanga CYMA leh School Education Department ten thawhdunna thuthlung an siam tawh rahchhuak pakhat a nih thu a sawi a. Ram zirna kawng hrang hranga hmasawnna tura an thawh dunna avanga hmalakna hmuh tur zingah tun hnaia zirtirtu 88 lak te, zirlaite tana tha zawk tura CCE kalphung siamthat te, school tan leh ban hun thlak te, zirtirtu ai kal tam lutuk tireh tura khawng taka hmalak a nih thu te chu a nih thu a sawi. Education Minister chuan kan rama kan mamawh ber chu "Education Revival" a ni, tiin infrastructure lamah hmasawnna awm mahse mihringin hma an sawn siloh chuan hmasawnna awmze neilo a nih theih thu a sawi a. Minister Pu Lalchhandama Ralte chuan a thalo lai siamthat hna chu department khat chuah thawh zawh theih a nih theihloh avangin YMA chu thawhpui zuiah sawmin, ziak leh chhiar thiam kawnga kan hnufual loh nan te leh skill development ah te zau zawka thawhho tha a tih thu a sawi. 

Sports & Youth Services Minister chuan  YMA ten zirlai te hma ngai taka an hmalakna chu fakawm a tih thu a sawi a. Tangkai taka hman a nih a beisei thu a sawi. Sports MInister hian infiamna khawvela sawrkar hmalaknaah Education Department leh Sports Department ten thawhhona tha an neih pawimawh a tih thu a sawi a ni.

CYMA President Pu Vanlalruata chuan thu sawi bawkin, Aizawl pawn atanga lehkhazirte tan a awmna tur hmun changtlung tak siam a ni chu phurawm a tih thu sawiin School Education Department hmalakna leh sawrkar chungah lawmthu a sawi a ni.

He Hostel project hi Design-Build Contractor atana thlan Northeast Consultancy Services (NECS) chuan 2013 khan a DPR siamin bul a lo tan a, 2014 khan DoNER Ministry atangin sanction hmuh a ni a. Ni 14th April, 2016 khan lungphum chu phum a lo ni tawh bawk. A sak hna hi May 2016 khan tan niin, April ni 18, 2019 khan a hun takah sak zawh a ni.

He hostel building hi block hnih - Block-A leh Block-B ah then a ni a. BIock-A ah hian chhawng thum awmin, Auditorium, Cafeteria, Lobby, Office, Meeting room, Dining room, Guest room leh staff quarter te a awm a. BIock-B hi hostel room awmna niin a vaiin chhawng li a awm a. Library dah a ni bawk. Main road atang a building panna tur hi kawngpeng luhna Ieh chhuahna hranpa neia siam niin, a building kawtzawl hi parking atan siam a ni a. Main road sir zau lai pawh hi parking area-a hman theih tura cheibawl a ni bawk.

Hostel-a awm zirlaite tana chawlh hahdam Ieh inkawmkhawmna tur roof terrace thutna awm siam ni bawkin, ruahtui dahkhawlna (rainwater harvesting tank) litre 1,00,000 dawng siam niin kangmei laka him nan firefighting equipment te pawh dah tel a ni. Hostel hi zauh belh duh hun atan ram ruak Ieh room atan siam theih turin hmun awl zuah bawk a ni.


Hostel hawnna inkhawm hi School Education Department Joint Secretary Pu K. Sangthuama chuan kaihruaiin, Addl. Director K. Laldingliana hnen atangin report ngaihthlak a ni a. School Education Joint Director Pu Lalhmachhuana chuan lawmthu sawiin hun a khar a ni.

Post a Comment

0 Comments